مادەنيەت جانە اقپارات ءمينيسترى ايدا بالاەۆا الەۋمەتتىك جەلىلەرگە باقىلاۋ قالاي جۇرگىزىلەتىنىن ءتۇسىندىرىپ، كەيبىر اككاۋنتتاردىڭ اقپارات تاراتۋىنا شەكتەۋ قويىلۋىنا قاتىستى تۇسىنىكتەمە بەردى، دەپ حابارلايدى Ulysmedia.kz.

بالاەۆا مادەنيەت جانە اقپارات ءمينيسترى  قۇزىرەتتى ورگان رەتىندە الەۋمەتتىك جەلىلەرگە مونيتورينگ جۇرگىزەتىنىن اتاپ ءوتتى.

«اككاۋنتتاردىڭ كونتەنتتەرىندە زاڭ بۇزۋ فاكتىلەرى انىقتالسا، ونى قۇقىق قورعاۋ ورگاندارىنا جىبەرەمىز. قۇقىق قورعاۋ ورگاندارى ول كونتەنتتىڭ زاڭعا قانشالىقتى سايكەس ەكەنىن انىقتاپ، زاڭ بۇزعانى دالەلدەنسە، ءىس قوزعاۋعا قۇقىقتارى بار»، - دەدى مينيستر.

ۆەدومستۆو باسشىسىنىڭ دەرەگىنشە، جىل باسىنان بەرى ءار باعىتتاعى 800-دەن استام زاڭ بۇزۋ فاكتىسى تىركەلگەن. ونىڭ ىشىندە پورنوگرافيالىق مازمۇنداعى، ەسىرتكى تاراتۋمەن بايلانىستى، ىرىتكى سالۋ، جالعان اقپارات سياقتى فاكتىلەر بار.

سونداي-اق، ايدا بالاەۆا الەۋمەتتىك جەلىدە بەتىن تۇمشالاپ الىپ كونتەنت تاراتاتىن قىز-كەلىنشەكتەر جايلى پىكىر ءبىلدىردى.

«تۇمشالانۋ ماسەلەسى ءالى زاڭمەن رەتتەلمەگەن. ويتكەنى ول ماسەلەنى ءبىز ەندى-ەندى قارايمىز. دەپۋتاتتار وسى ماسەلەنى بىزگە ساۋال رەتىندە جولدادى. ءبىز ونى جان-جاقتى زەردەلەپ جاتىرمىز. بىرىنشىدەن،  بۇل - ۇلتتىق قاۋىپسىزدىك ماسەلەسى»، - دەدى مينيستر.

ايتا كەتەيىك، بۇدان بۇرىن قازاقستاندا قوعامدىق ورىنداردا ءدىني كيىم كيۋگە تىيىم سالىنۋى مۇمكىن ەكەنى حابارلانعان.

Abai.kz