قازاقستاننىڭ 10 وڭىرىندە «Eolus» كومپانياسىنىڭ قارجى پيراميداسىنىڭ قۇرىلىمدىق بولىمشەلەرىنىڭ باسشىلارىنا قاتىستى قىلمىستىق ىستەر تەرگەلىپ جاتىر، دەپ حابارلايدى قر قما ءباسپاسوز قىزمەتى.

قىلمىستىق ءىس اباي، اقمولا، اقتوبە، اتىراۋ، شىعىس قازاقستان، باتىس قازاقستان، جەتىسۋ وبلىستارىندا، سونداي-اق الماتى، استانا جانە شىمكەنت قالالارىندا تىركەلدى.

ۇيىمداستىرۋشىلار «ENERGY EOLUS QAZAQSTAN» جشس-ءىن ءبىر ازاماتتىڭ اتىنا تىركەۋ ارقىلى ونى وزدەرىنىڭ قىلمىستىق ءىس-ارەكەتىنە تارتقان.

سالىمشىلار قاراجاتتى ينۆەستيتسيالاۋ كەزىندە اقشانى الۋ ءۇشىن قاجەتتى سومانى جيناقتاي وتىرىپ، كۇن سايىن 2,5-تەن 3,5% - عا دەيىن پايدا الادى.

جاڭا پايدالانۋشى تارتىلعان كەزدە سالىم سوماسىنىڭ 10% مولشەرىندە بىرجولعى اقشالاي سىياقى، سونداي-اق جاڭا پايدالانۋشىنىڭ جىل ىشىندەگى كۇندەلىكتى تابىسىنىڭ 4%-ى تولەنەدى. وسىلايشا، سىياقى سوماسى جىلدىق 3 000%-دى قۇرادى.

قازاقستانداعى وكىل اقشا قاراجاتىن ەكىنشى دەڭگەيدەگى بانكتەگى ءوز شوتىنا قابىلدايدى، سودان كەيىن كريپتوبيرجاعا اۋدارىپ، ايىرباستاۋدى جۇرگىزەدى. سوڭىندا كريپتوشەلەك ارقىلى «energyeolus.top» پلاتفورماسىنداعى ءوز شوتىنا اۋدارادى.

كەمىندە 3 000-عا جۋىق ادام قىلمىستىق ارەكەتكە تارتىلعان، ونىڭ ىشىندە 1 773 سالىمشى 259 ملن تەڭگە سوماعا مۇلىكتىك زيان كەلتىرىلگەنى جايلى ءوتىنىش بەرگەن.

ەسكە سالا كەتەيىك، قارجى پيراميدالارىن قۇرعاندار قىلمىستىق جاۋاپكەرشىلىككە تارتىلادى جانە مۇلكى تاركىلەنىپ، 10 جىلعا دەيىنگى مەرزىمگە باس بوستاندىعىنان ايىرىلادى.

Abai.kz