بۇگىن قر قارجىلىق مونيتورينگ اگەنتتىگى الماتى وبلىسىندا اۋرۋحانادان 2,1 ميلليارد تەڭگەدەن اسا قارجى ۇرلانعانىن حابارلادى. قما مالىمەتى بويىنشا، الماتى وبلىسىنداعى اۋرۋحانانى باسقارعان كومپانيانىڭ باسشىسى مەن ەسەپشىسى وزدەرىنە باعىنىشتى ۇيىمداردان مەديتسينالىق بۇيىمداردى كورىنەۋ جالعان ساتىپ العان.

قما اۋماقتىق دەپارتامەنتى اسا ءىرى مولشەردە ۇرلىق جاسادى دەگەن كۇدىك بويىنشا تەرگەۋ جۇرگىزىپ جاتىر. ايتا كەتەيىك، مەديتسينالىق مەكەمە 2020 جىلدىڭ قازاندا سەنىمگەرلىك باسقارۋعا بەرىلگەن.

«2020-2022 جىلدار ارالىعىندا الەۋمەتتىك مەديتسينالىق ساقتاندىرۋ قورىنان بولىنگەن 2,1 ميلليارد تەڭگەدەن استام قاراجات ۇرلانعان.
اتالعان تۇلعالارعا قاتىستى قاماۋعا الۋ تۇرىندەگى بۇلتارتپاۋ شاراسى قولدانىلدى. تەرگەۋ جالعاسىپ جاتىر»، - دەلىنگەن حابارلامادا.

حابارلاما دا "قر كونستيتۋتسياسىنىڭ 77-بابىنىڭ 3-تارماعىنىڭ 1-تارماقشاسىنا جانە قر قىلمىستىق-پروتسەستىك كودەكسىنىڭ 19-بابىنىڭ 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەتىنى» دە جازىلعان.

الەۋمەتتىك مەديتسينالىق ساقتاندىرۋ قورىنا قاراجات ەكى كوزدەن – مەديتسينالىق كومەك كورسەتۋدىڭ مەملەكەتتىك قورىنان (مەملەكەتتىك بيۋدجەت قاراجاتى ەسەبىنەن تەگىن مەديتسينالىق كومەكتىڭ كەپىلدىك بەرىلگەن كولەمى) جانە مىندەتتى الەۋمەتتىك مەديتسينالىق ساقتاندىرۋدان (مەملەكەت قاراجاتى ەسەبىنەن مىندەتتى الەۋمەتتىك مەديتسينالىق ساقتاندىرۋ جانە ازاماتتار) تۇسەدى.

بيىل كوكتەمدەگى ءماجىلىس وتىرىسىندا ءماجىلىس دەپۋتاتى اسحات راقىمجانوۆ دەنساۋلىق ساقتاۋ مينيسترلىگىنە ءمامس پەن ميب جۇيەسىندەگى اشىق ايتىلمايتىن دەرەكتەرگە قاتىستى باستاما كوتەرگەن ەدى.

دەپۋتات ءار التىنشى ادامنىڭ ءمامس جۇيەسىنە قاتىسسىز ەكەنىن جانە ولاردىڭ كوبى اۋىل تۇرعىندارى ەكەنىن ايتقان ونىڭ سوزىنشە، اۋىل تۇرعىندارىنىڭ دەنى ەڭبەك كەلىسىمشارتى بويىنشا جۇمىس ىستەيمەيدى، سوندىقتان دا ولارعا ەشكىم مەديتسينالىق ساقتاندىرۋ ءۇشىن قارجى بولمەيدى.

اسحات راقىمجانوۆ وسىنى ايتا كەلە، دەپۋتاتتىق ساۋال جولداعان.

«مەنىڭ ءبىرىنشى سۇراعىم، مۇنداي ساناتتاعى ادامدار مەديتسينا كومەگىن قالاي الا الادى؟ ۇكىمەتتەن ناقتى جاۋاپ ەستىگىمىز كەلەدى. ءمامس تولەمىن رەسمي تولەمەيتىن قانشا قازاقستاندىق بار؟» – دەگەن ول.

دەپۋتات بۇعان: «قازاقستاندىق جۇيەنى حالىقارالىق تاجىريبەمەن سالىستىرۋعا كەلمەيدى. سەبەبى بۇكىل الەم نە بيۋدجەتتىك، نە ساقتاندىرۋ، نە بيۋدجەتتىك-ساقتاندىرۋ جۇيەسىن ۇستانادى. ال بىزدە وسىنىڭ بارلىعىن ءبىر جۇيەگە سالىپ، «بارداك» جاساپ وتىر. قازاقستاندا بيۋدجەتتىك مەديتسينا، ساقتاندىرۋ مەديناسى، مىندەتتى ساقتاندىرۋ مەديتسيناسى جانە نارىقتىق جۇيە دە بار. وسىنىڭ بارلىعى بولا تۇرا تاعى اقىلى مەديتسيناعا جۇگىنەمىز.

بەيرەسمي دەرەكتەرگە سۇيەنسەك، قازاقستاندىقتاردىڭ 15 پايىزى عانا ءمامس جۇيەسىن قولدانادى. قازاقستاندىقتار دارىگەرگە بارسا دا، بارماسا دا اقشا تولەپ وتىر. ايىنا كەم دەگەندە 14 مىڭ تەڭگە تولەسە، جىلىنا ورتا ەسەپپەن 170 مىڭ تەڭگە تولەيدى. دەگەنمەن بۇل اقشانى حالىق قانشالىقتى قولدانادى دەگەن سۇراق تۋىندايدى»، - دەگەندى قوسىپ، دەنساۋلىق ساقتاۋ مينيسترلىگىنەن 2017 جىلدان بەرى ءمامس-كە قانشا قارجى جينالعانىن اشىق ايتۋىن سۇرادى.
اسحات راقىمجانوۆتىڭ ايتۋىنشا، ءمامس قاراجاتىن پايدالانۋ بويىنشا تولىق اۋديت جۇرگىزۋ قاجەت. مەديتسينالىق قىزمەت تاريفىنە نە كىرەتىنى ءتىپتى شەنەۋنىكتەرگە دە قۇپيا. تاريفتەردىڭ قالاي ەسەپتەلەتىنىن قارجى مينيسترلىگى دە بىلمەيدى. دەنساۋلىق ساقتاۋ مينيسترلىگى تاريفتەردى كوتەرۋ بويىنشا بارلىق شەشىمدەردى تاۋەلسىز ساراپتاماسىز ءوز بەتىنشە قابىلدايدى. بۇل جەردە تەك باقىلاۋشى ورگاندارعا عانا ەمەس، بارشا قازاقستاندىقتارعا كوبىرەك اشىقتىق قاجەت.

Abai.kz