قازاقستاندا تۇرمىستىق زورلىق-زومبىلىققا جازانى قاتايتۋدى سۇراعان ەكى جىل بۇرىنعى پەتيتسيا قايتا جاندانىپ، وعان قول قويعاندار 65 مىڭنان استى. ءبىر كۇن بۇرىن بۇل كورسەتكىش شامامەن 40 مىڭ بولعان. 

سالتانات نۇكەنوۆانىڭ ولىمىنەن سوڭ الەۋمەتتىك جەلىدە ايەل قۇقىعى ماسەلەسى قايتا كوتەرىلىپ، وتباسىنداعى كۇش كورسەتۋ وقيعالارى جيىلەپ كەتكەنى ايتىلدى.

ونلاين-پەتيتسيا اۆتورلارى قازاقستاندا تۇرمىستىق زورلىق-زومبىلىق، پەدوفيلياعا جازا جەڭىل ەكەنىن ايتىپ، بۇل ەلدەگى وسى قىلمىس ءتۇرىنىڭ كوبەيۋىنە دە بەلگىلى ءبىر دارەجەدە اسەر ەتىپ وتىرعانىن جازعان.

"قالىپتاسقان جاعدايعا بايلانىستى ۇكىمەت پەن پارلامەنتكە تۇرمىستىق زورلىق-زومبىلىق كورسەتكەنى ءۇشىن جازانى قاتايتۋ ماسەلەسىنە قايتا ورالۋدى، اتاپ ايتقاندا قىلمىستىق كودەكستەگى 108 جانە 109-باپتاردى ("ۇرىپ-سوعۋ" جانە "دەنساۋلىققا قاساقانا جەڭىل زيان كەلتىرۋ") قالپىنا كەلتىرۋدى، تۇرمىستا بولاتىن وزگە دە زاڭسىزدىقتارعا اكىمشىلىك جاۋاپكەرشىلىكتى كۇشەيتۋدى تاپسىرۋىڭىزدى وتىنەمىز" دەپ جازىلعان پەتيتسيادا.

بۇرىنعى ۇلتتىق ەكونوميكا ءمينيسترى قۋاندىق بيشىمباەۆ 11 قاراشادا استانا سوتىنىڭ شەشىمىمەن "ادام ءولتىرۋ" بابىمەن ەكى ايعا قامالعان. بيشىمباەۆ ايەلى سالتانات نۇكەنوۆانى ءولتىردى دەگەن كۇدىككە ىلىنگەن. 31 جاستاعى ايەل استاناداعى مەيرامحانالاردىڭ بىرىندە قاتىگەزدىكپەن ۇرىپ-سوعۋدان كوز جۇمعان. بۇل وقيعادان كەيىن قوعامدا تۇرمىستىق زورلىق-زومبىلىق ماسەلەسى قايتا كوتەرىلىپ، كىنالىلەر كوپ جاعدايدا جازاسىز قالاتىنى ايتىلىپ جاتىر. 15 قاراشادا پرەزيدەنت قاسىم-جومارت توقاەۆ ىشكى ىستەر مينيسترلىگىنە بۇل ءىستى "ەرەكشە باقىلاۋدا ۇستاۋدا" تاپسىرعانىن اقوردا جازدى.

2017 جىلعى شىلدەدە "ۇرىپ-سوعۋ" جانە "دەنساۋلىعىنا قاساقانا جەڭىل زاقىم كەلتىرۋ" باپتارى قىلمىستىق كودەكستەن اكىمشىلىك قۇقىق بۇزۋشىلىق تۋرالى كودەكسكە اۋىستىرىلعان.

ستاتيستيكاعا سۇيەنسەك، ەلدە قازاقستان ايەلدەرىنىڭ باسىم بولىگىنە كۇيەۋى نەمەسە سەرىگى كۇش قولدانادى. پوليتسياعا جىل سايىن تۇرمىستىق زورلىق-زومبىلىق تۋرالى 100 مىڭنان استام حابارلاما كەلىپ تۇسەدى.

قازاقستان ءىىم بيىل مامىردا جاريالاعان مالىمەتى بويىنشا، ەلدە جىل باسىنان بەرى تۇرمىستىق زورلىق-زومبىلىققا قاتىستى 35 مىڭنان استام ارىز-شاعىم كەلىپ تۇسكەن. تەك از بولىگى عانا جازالانعان.

بۇۇ مالىمەتىنشە، ەلدە جىل سايىن شامامەن 400 ايەل كۇيەۋى نەمەسە سەرىگىنىڭ قولىنان قازا بولادى. حالىقارالىق Human Rights Watch ادام قۇقىعىن قورعاۋ ۇيىمى قازاقستاندا تۇرمىستىق الىمجەتتىك ازايماي وتىرعانىن ايتقان.

Abai.kz