قازاقستاننىڭ "اسپان اربا", Da Group 22 جانە وزبەكستاندىق Mvizion كومپانيالارى ەۋرووداق ازىرلەپ جاتقان رەسەيگە قارسى كەزەكتى سانكتسيا تىزىمىندە بار، دەپ حابارلادى ازاتتىق.

ەۋروكوميسسيا وكىلىنىڭ ايتۋىنشا، بۇل قۇجاتتار وسى اپتادا قارالا باستايدى. جاڭا پاكەت ۇيىمنىڭ 14-15 جەلتوقسانىندا بريۋسسەلدە وتەتىن سامميت كەزىندە قابىلدانۋى ءتيىس.

قۇجاتتاعى مالىمەتكە سۇيەنسەك، قازاقستاننىڭ "اسپان اربا" كومپانياسى درونداردى يمپورتتاپ، رەسەيلىك Skymec كومپانياسىنا جونەلتىپ وتىر دەگەن كۇدىككە ىلىنگەن. ودان ءارى بۇل دروندار رەسەي ارمياسىمەن بايلانىسى بار كومپانيالارعا ساتىلعان.

رەسەيدىڭ كەدەن قىزمەتى مالىمەتىندە Da Group 22 بىلتىر مىڭداعان ميكروچيپ ەكسپورتتاعان كومپانيا رەتىندە كورسەتىلگەن.

وزبەكستاننىڭ Mvizion كومپانياسى سانكتسيا ەنگىزىلگەن رەسەيلىك فيرماعا ەلەكتروندىق كومپونەنتتەردى ساتقانى ءۇشىن اقش "قارا تىزىمىنە" ەنگەن.

ەۋروكوميسسيا قۇجاتى ءالى تولىعۋى مۇمكىن.

ازاتتىقتىڭ بيىل ماۋسىم ايىنداعى زەرتتەۋىندە دە بىرقاتار قازاق جانە قىرعىز كومپانيالارىنىڭ ەلەكترونيكا تاۋارلارىن رەسەيگە جونەلتىپ جاتقانى كورسەتىلگەن.

Abai.kz