باس پروكۋرور بەرىك اسىلوۆ ەكس-شەنەۋنىك، ايەلىن ءولتىردى دەگەن كۇدىكپەن ۇستالعان قۋاندىق بيشىمباەۆتىڭ ىسىنە قاتىستى پىكىر ءبىلدىردى.  

«جۋىقتا ازاماتشا س.نۇكەنوۆانىڭ استانا قالاسىندا كىسى قولىنان كوز جۇمۋى ينتەرنەت كەڭىستىكتى ءدۇر سىلكىندىردى. وتباسىنداعى جانە تۇرمىستىق زورلىق-زومبىلىقتان قورعاۋ تۋرالى پەتيتسياعا 150 مىڭعا جۋىق قازاقستاندىق قول قويدى. بۇل باعىتتا جۇمىس جالعاسا بەرەدى»، – دەدى بەرىك اسىلوۆ ۆەدومستۆونىڭ زاڭدىلىقتى ساقتاۋ جونىندەگى ۇيلەستىرۋ كەڭەسىنىڭ جيىنىندا.

سونداي-اق ب.اسىلوۆ تۇرمىستىق زورلىق-زومبىلىقتان مەملەكەتكە كەلەر قاۋىپ قانداي ەكەنىن ايتتى.

«وتباسىنداعى كەلەڭسىزدىكتەر، زورلىق-زومبىلىق فاكتىلەرى مەملەكەتىمىزدىڭ العا دامۋىنا كەرى اسەرىن تيگىزەدى. سوندىقتان پرەزيدەنتىمىز ايتقانداي، مۇنداي زاڭ بۇزۋ ارەكەتتەرىمەن تۇتاس قوعام بولىپ كۇرەسۋ قاجەت»، – دەدى باس پروكۋرور.

ايتا كەتەيىك، قر پرەزيدەنتىنە وتباسىلىق-تۇرمىستىق زورلىق-زومبىلىقتان قورعاۋ بويىنشا قىلمىستىق جانە اكىمشىلىك زاڭنامانى رەفورمالاۋ جونىندەگى پەتيتسياعا قول قويعاندار سانى 15 قاراشادا 59 مىڭنان استام ادامدى قۇراعان بولاتىن. اشىق ۇندەۋ eotinish.kz پورتالىنا جاريالاندى.

ەسكە سالايىق، بيىلعى 9 قاراشادا استاناداعى باۋ مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمباەۆ ءوزىنىڭ جۇبايىن سوققىعا جىقتى. ايەل جەدەل جاردەم كەلگەنشە كوز جۇمدى.

كەيىن ىشكى ىستەر مينيسترلىگى قۋاندىق بيشىمباەۆتىڭ ۇستالعانىن راستادى.

ەلوردا پوليتسيا دەپارتامەنتى قر قىلمىستىق كودەكسىنىڭ 99-بابى 1-بولىگى بويىنشا تەرگەۋ امالدارىن باستادى.

11 قاراشادا استانا قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى قۋاندىق بيشىمباەۆتى 2 ايعا قاماۋعا الۋ بويىنشا بۇلتارتپاۋ شاراسىن سانكتسيالادى.

12 قاراشادا كىسى ءولىمى بولعان «گاسترو-ورتالىق» مەيرامحاناسىنىڭ ديرەكتورى ۇستالدى.

15 قاراشا وتكەن كەڭەستە پرەزيدەنت ق.توقاەۆ ءىىم-گە بيشىمباەۆتىڭ ءىسىن ەرەكشە باقىلاۋعا الۋدى تاپسىردى.

Abai.kz