ەنەرگەتيكا ءمينيسترى الماسادام ساتقاليەۆ قازاقستانعا قوسىمشا كولەمدە سۇيىتىلعان گاز جەتكىزۋ باعىتىندا «قازروسگاز» كومپانياسىمەن جاسالعان كەلىسىم تۋرالى ايتتى.

«بۇل جاعداي سۇيىتىلعان مۇناي گازىنا قاتىستى. «قازروسگاز» ءبىزدىڭ گاز كوندەنساتىن رەسەي فەدەراتسياسىندا وڭدەۋ ناتيجەسىندە 90 مىڭ تونناعا (جىلىنا) جۋىق سۇيىتىلعان مۇناي گازىن سىرتقى نارىققا نەمەسە قازاقستاننىڭ ىشكى نارىعىنا جەتكىزە الادى. ال ىشكى نارىقتا سۇيىتىلعان مۇناي گازىنىڭ تاپشىلىعىن ەسكەرە وتىرىپ، ءبىز «قازروسگازدىڭ» بۇل كولەمدى قازاقستانعا تاسىمالداۋدى سۇرادىق»، – دەدى ا. ساتقاليەۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

بۇل تۇرعىدا ول مينيسترلىك ەلىمىزدە سۇيىتىلعان گازدى ساتىپ الاتىندارمەن ءتيىستى كەلىسسوز جۇرگىزگەنىن ايتتى.

«ياعني، قازىر سۇيىتىلعان مۇناي گازىن تۇتىنۋشىلارمەن، ءىرى ونەركاسىپتەرمەن، جانارماي قۇيۋ ستانتسيالارى جەلىلەرىمەن، بولشەك ساۋدا نارىعىنىڭ ءىرى قاتىسۋشىلارىمەن كەلىسسوز ۇيىمداستىرىپ، ولاردى رەسۋرستارمەن قامتاماسىز ەتتىك. اتاپ ايتقاندا، جالپى ىشكى نارىقتى گازبەن قامتاماسىز ەتۋ ءۇشىن بىزدە ءالى دە قوسىمشا رەسۋرستار بار»، – دەپ ءتۇسىندىردى ۆەدومستۆو باسشىسى.

ەنەرگەتيكا ءمينيسترى سۇيىتىلعان گاز نارىقتاعى باعامەن جەتكىزىلەتىنىن اتاپ ءوتتى.

«ولار ەكسپورتتىق باعامەن جەتكىزەدى. بۇل رەتتە حالىقارالىق باعا بولادى جانە ءبىز ەكونوميكالىق نەگىزدى ەسكەرە وتىرىپ، «قازروسگازعا» قاتىستى قانداي دا ءبىر ىشكى باعانى قولدانبايمىز»، – دەدى الماسادام ساتقاليەۆ.

بۇدان بۇرىن حابارلانعانداي، جاقىندا ەنەرگەتيكا ۆيتسە-ءمينيسترى الىبەك جاماۋوۆ «قازروسگازعا» كومپانياسىمەن ورىنبور مۇناي وڭدەۋ زاۋىتىنان سۇيىتىلعان مۇناي گازىنىڭ قوسىمشا كولەمىن باعىتتاۋ تۋرالى كەلىسىلگەنىن ايتتى.

قازىر ەلىمىزدە رەسپۋبليكادا ايىنا 135 مىڭ توننا سۇيىتىلعان مۇناي گازى وندىرىلەدى. تەڭىزشەۆرويلمەن ىشكى نارىققا اي سايىن 10 مىڭ توننا گاز جەتكىزۋگە ۋاعدالاستىق جاسالدى.

Abai.kz