جەلىدە «ينفوسىعاندارعا» قارسى پەتيتسيا پايدا بولدى.

Alashonline پورتالىنا جاريالانعان ماتىندە الەۋمەتتىك جەلىلەردە وزدەرىن ينفوبيزنەسمەن، بيزنەس-ترەنەر، كوۋچ، موتيۆاتور دەپ اتايتىن «ينفوسىعاندار» قالىڭ كوپشىلىككە ىسكە العىسىز اقپاراتتىق ونىمدەر (گايدتار، كۋرستار، كىتاپتار) ۇسىناتىنى تۋرالى جازىلعان.

«اتالعان ادامدار وزدەرىن ساراپشى رەتىندە كورسەتە وتىرىپ، پايداسىز عانا ەمەس، سونىمەن بىرگە شىندىققا ساي كەلمەيتىن، ءتىپتى زياندى اقپاراتتى دا ناسيحاتتايدى.

وسىلايشا شىن اقپارات بەرەتىن ناعىز ساراپشىلاردىڭ بەدەلىنە دە نۇقسان كەلتىرەدى»، دەپ جازادى پەتيتسيا اۆتورى.

ماسەلەگە الاڭداۋشىلىق ءبىلدىرۋشى ازاماتتار مىناداي شارالار قابىلداۋدى تالاپ ەتتى:

- پايداسىز اقپاراتتىق ونىمدەردى جاساۋعا جانە ساتۋعا بايلانىستى قىزمەتتىڭ جولىن كەسۋ ءۇشىن زاڭنامالىق جانە ۇيىمداستىرۋشىلىق شارالار قابىلداۋ;

- تۇتىنۋشىلاردىڭ جالعان اقپاراتتىق ونىمدەر تۋرالى ساۋاتىن ارتتىرۋ ءۇشىن حالىق اراسىندا اقپاراتتىق اعارتۋ جۇمىسىن جۇرگىزۋ.

پەتيتسيا كەشە كەشكى ۋاقىتتا جاريالانعان. ازىرگە پەتيتسياعا ەشكىم قول قويماعان.

Abai.kz