بەيسەنبى, 29 اقپان 2024
بيلىك 1247 1 پىكىر 25 قاراشا, 2023 ساعات 15:41

گەندەرلىك زورلىق — زومبىلىققا قارسى بەلسەندىلىكتىڭ 16 كۇنى. ايدا بالاەۆا نە دەيدى؟

جىل سايىن 25 قاراشادا «گەندەرلىك زورلىق — زومبىلىققا قارسى بەلسەندىلىكتىڭ 16 كۇنى» اتتى ايەلدەرگە قاتىستى زورلىق-زومبىلىقتى جويۋ ءۇشىن حالىقارالىق كۇرەس ناۋقانى باستالىپ، 10 جەلتوقسانعا دەيىن جالعاسادى. اتالعان ناۋقاندى 1991 جىلى ءبىرىنشى جاھاندىق ايەلدەر كوشباسشىلىعى ينستيتۋتىنىڭ بەلسەندىلەرى قۇرعان بولاتىن.

الەمدەگى بارلىق ۇيىمدار بۇل اكتسيانى ايەلدەر مەن قىزدارعا قاتىستى زورلىق-زومبىلىقتىڭ الدىن الۋعا جانە جويۋعا شاقىرۋ ماقساتىندا ءتيىمدى پايدالانادى. قازاقستاندا ايەلدەر مەن قىزداردىڭ گەندەرلىك تەڭدىگىن قامتاماسىز ەتۋ جانە ولاردىڭ قۇقىقتارى مەن مۇمكىندىكتەرىن كەڭەيتۋ ماقساتىندا قازاقستان رەسپۋبليكاسىنىڭ مادەنيەت جانە اقپارات مينيسترلىگى حالىقارالىق جانە ۇلتتىق سەرىكتەستەرمەن تىعىز ىنتىماقتاستىق ءىس-ارەكەتتەر جۇرگىزۋدە.

ەلىمىزدىڭ مادەنيەت جانە اقپارات ءمينيسترى ايدا بالاەۆا: «بۇگىن ايەلدەرگە قارسى زورلىق-زومبىلىققا قارسى حالىقارالىق كۇن. بۇل داتا ءبىزدىڭ قوعام ءۇشىن نەسىمەن ماڭىزدى؟ ءمانى نەدە، ءتالىمى قانداي؟ بۇل سۇراققا جاۋاپ قوعامنىڭ وزىندە جاتىر. وكىنىشكە قاراي، ەلىمىزدەگى ايەل زاتىنا قارسى جاسالعان قىلمىستار سوڭعى كەزدە جانتۇرشىگەرلىك سيپات الۋدا. ەڭ سوراقىسى قوعامنىڭ ءبىر بولىگى وسىنداي زومبىلىققا ەتى ۇيرەنىپ، تۇرمىستىق ادەتكە ىسىرا سالۋعا بەيىم. ال وسى كۇنى تاياق پەن قورلىقتان، پسيحولوگيالىق، جىنىستىق ءتىپتى ەكونوميكالىق تۇرعىدان زارداپ شەگىپ، ءومىرىن وكسىتەتىن مىڭداعان ايەل كەيبىرەۋ ءۇشىن ءتىلسىز ستاتيستيكا»،- دەدى.

2022 جىلدان باستاپ «بۇۇ ايەلدەر» ۇيىمىمەن بىرلەسىپ قازاقستاندا گرانتتاردى جۇزەگە اسىرۋ جۇمىستارى باستالدى. بۇۇدب – مەن بىرلەسە وتىرىپ ايەلدەردىڭ قۇقىقتارىن قۇرمەتتەيتىن جانە ساقتايتىن ۇيىمدار مەن جۇمىس ورىندارىندا گەندەرلىك سەرتيفيكاتتاۋ باعدارلاماسى باستالدى. اگرەسسورلارمەن پسيحولوگيالىق جۇمىس جۇرگىزۋ بويىنشا پيلوتتىق جوبا ىسكە قوسىلدى. ءبىرىنشى كەزەكتە قر مادەنيەت جانە اقپارات مينيسترلىگى مامانداردىڭ بىلىكتىلىگىن ارتتىرۋعا ەرەكشە نازار اۋداردى. ناتيجەسىندە داعدارىس ورتالىقتارىنىڭ 70 قىزمەتكەرى، ايەلدەردى زورلىق-زومبىلىقتان قورعاۋ توبىنىڭ 280 ينسپەكتورى، سونداي-اق 5 ءوڭىردىڭ اۋداندىق ينسپەكتورلارى اگرەسسورلارمەن جۇمىس جۇرگىزۋ بويىنشا وقىتۋ كۋرستارىنان ءوتتى. «گەندەرلىك زورلىق — زومبىلىققا قارسى بەلسەندىلىكتىڭ 16 كۇنى» حالىقارالىق ناۋقانى اياسىندا قازاقستاندا 100-گە جۋىق ءىس-شارا وتكىزۋ جوسپارلانعان.

Abai.kz

1 پىكىر

ۇزدىك ماتەريالدار

ادەبيەت

قاۋىرسىن

ءالىمجان ءاشىمۇلى 1634
ءالىپبي

لاتىن جايى

بيجومارت قاپالبەك 1707