پرەمەر-مينيستر ءاليحان سمايىلوۆ جول ساپاسىنا بايلانىستى سىننىڭ كوپ ەكەنىن ايتتى. 

«باستى ماسەلە – جول قۇرىلىسىنىڭ ساپاسىن قامتاماسىز ەتۋ. جول ساپاسىنىڭ ناشارلىعى تۇرعىنداردىڭ نارازىلىعىنا سەبەپشى بولىپ وتىر. اسىرەسە، ساپاسىز جوندەۋ جۇمىستارىنا قاتىستى ايتىلىپ جاتقان سىن كوپ. تەك وسى جىلدىڭ وزىندە مەملەكەتتىك ورگاندارعا اۆتوموبيل جولدارىنا قاتىستى 19 مىڭنان استام ارىز-شاعىم كەلىپ ءتۇستى»، - دەدى پرەمەر-مينيستر ۇكىمەتتىڭ بۇگىنگى وتىرىسىندا.

مىسالى، جول ازابىن تارتقان قوستاناي وبلىسىنىڭ تۇرعىندارى ۇزىنكول ستانتسياسى مەن تروەبراتسكوە اۋىلى اراسىنداعى ابدەن توزىپ بىتكەن جولعا قاتىستى ۇجىمدىق حات جازعان. بۇل جول وسى ءوڭىردى كورشىلەس سولتۇستىك قازاقستان وبلىسىمەن بايلانىستىرادى جانە رەسەيگە قاراي ترانزيتتىك جول بولىپ سانالادى. بيىل اقتوبە وبلىسىنىڭ جۇرىن ستانتسياسى مەن ورقاش اۋىلى اراسىندا قيىرشىق تاس توسەلمەگەن ساپاسىز جول سالىنعان.

ال تاراز قالاسىنىڭ تۇرعىندارى قاراسۋ شاعىن اۋدانىندا 1 جىلدان استام ۋاقىت بويى بىتپەي جاتقان جول جوندەۋ جۇمىستارىن اياقتاۋدى تالاپ ەتىپ كەلەدى. مۇنداي مىسالدار بارلىق وڭىردە كوپتەپ كەزدەسەدى.

«اكىمدىكتەر دە جەرگىلىكتى جولداردىڭ ساپاسىنا ساراپتاما جاساۋ جۇمىستارىن دا دۇرىس جۇرگىزە الماي وتىر. كەيبىر وڭىرلەر قۇرىلىس-مونتاجداۋ جۇمىستارىن تەحنيكالىق قاداعالاۋ تاراپىنان باقىلاۋسىز جۇرگىزەدى. ۇزاق جىلدار بويى جول سالاسىندا شەشىلمەي كەلگەن پروبلەمانىڭ ءبىرى – بيتۋم تاپشىلىعى. تاپشىلىقتى يمپورت ەسەبىنەن جابۋعا ءماجبۇر بولىپ وتىرمىز. بيتۋم بويىنشا پايدالانۋ تەحنولوگياسى ساقتالمايدى. بۇل دا جولداردىڭ ساپاسىنا كەرى اسەرىن تيگىزىپ وتىر»، - دەدى ءا.سمايىلوۆ.

سونىمەن قاتار اكىمدىكتەر قۇرىلىس جانە جول بويىنداعى قىزمەت كورسەتۋ نىساندارىنىڭ جوبالارىنا ارنالعان جەر ۋچاسكەلەرىن بەرۋ ۋاقىتىن سوزۋدا. وسى فاكتورلاردىڭ بارلىعى سالانى دامىتۋعا كەدەرگى بولىپ وتىر.

«كولىك مينيسترلىگى اكىمدىكتەرمەن بىرلەسىپ، اۆتوموبيل جولدارىنا قاتىستى بارلىق جوسپارلانعان جوبالاردى ۋاقىتىلى ىسكە اسىرۋى قاجەت. كولىك مينيسترلىگى مەن «قازاۆتوجول» كومپانياسى بيتۋمدى ساقتاۋ ينفراقۇرىلىمىن قۇرۋ بويىنشا شارا قابىلداۋى قاجەت. سونداي-اق اكىمدىكتەرمەن جانە جول اكتيۆتەرىنىڭ ۇلتتىق ساپا ورتالىعىمەن بىرلەسىپ، بيتۋم ساقتاۋ جانە پايدالانۋ تەحنولوگياسىنىڭ ساقتالۋىن باقىلاۋى كەرەك. اۋىل شارۋاشىلىعى مينيسترلىگى ەكولوگيا مينيسترلىگىمەن جانە اكىمدىكتەرمەن بىرلەسىپ، قۇرىلىس جانە جول بويىنداعى قىزمەت كورسەتۋ وبەكتىلەرىن كەڭەيتۋ جوبالارىنا جەر ۋچاسكەلەرىن بەرۋ ءتارتىبىن وڭايلاتۋدى پىسىقتاۋى كەرەك»، - دەدى ۇكىمەت باسشىسى.

فوتو: اشىق دەرەككوزدەن

Abai.kz