ۋكرايناعا قارسى سوعىسقا قاتىسقان 34 جاستاعى قازاقستاندىق الەكسەي شومپولوۆ التى جىل سەگىز ايعا سوتتالدى. بۇل تۋرالى قاراعاندى وبلىسى سوتىنىڭ ءباسپاسوز قىزمەتى حابارلادى.

شومپولوۆ رەسەي جاعىندا «ۆاگنەر» جاساعىنىڭ قۇرامىندا بولعان. شومپولوۆقا «جالداندى» جانە «بەيبىتشىلىك پەن ادامزات قاۋىپسىزدىگىنە قارسى اۋىر قىلمىستىق قۇقىق بۇزۋشىلىق جاسادى» دەگەن ايىپ تاعىلدى، ودان 205 590 رۋبل كولەمىندە اقشا تاركىلەۋگە شەشىم قابىلداندى. سوتتىڭ مالىمەتىنشە، ول اقشانى قىلمىستىق جولمەن تاپقان.

سوتتا شومپولوۆ كىناسىن مويىنداپ، سوعىسقا اقشا كەرەك بولعان سوڭ بارعانىن مالىمدەدى. «ۆاگنەر» جاساعىنىڭ قۇرامىنا ول الەۋمەتتىك جەلىدەگى جارناما ارقىلى كەلگەن. وعان 240 000 رۋبل ايلىق تولەۋگە ۋادە بەرىلگەن.

شومپولوۆ اپپەلياتسيالىق شاعىمىندا «ۆاگنەرمەن» كەلىسىمشارت جاساۋ كەزىندە زاڭدى بۇزىپ جاتقانىن بىلمەگەنىن، وعان «ۋكراينادا سوعىس ەمەس، بەيبىت تۇرعىنداردى بوساتۋ ءۇشىن ارنايى وپەراتسيا جۇرگىزىلىلىپ جاتقانى» ايتىلعانىن اتاعان.

قازاقستان بيلىگى ۋكرايناعا قارسى سوعىستى تىكەلەي ايىپتاماسا دا، رەسپۋبليكا ازاماتتارىنىڭ شەتەلدىك سوعىستارعا قاتىسۋىن زاڭسىز دەپ تانيدى.

«جالدامالىلىق»  تۋرالى باپ بويىنشا مۇلكى تاركىلەنىپ، 12 جىلعا دەيىن باس بوستاندىعىنان ايىرۋ جازاسى، ال اۋىرلاتاتىن جاعدايلاردا – ازاماتتىعىنان ايىرا وتىرىپ، ءومىر بويىنا باس بوستاندىعىنان ايىرۋعا دەيىن ۇكىم شىعارىلۋى مۇمكىن.

فوتو: اشىق دەرەككوزدەن

Abai.kz