قازاقستاندا بالالاردىڭ پايداسىنا بورىشكەرلەردەن 23 ملرد تەڭگە اليمەنت ءوندىرىلدى.

«140 مىڭ بالانىڭ پايداسىنا 23 ملرد تەڭگەگە قارىز وتەلدى، سونىمەن قاتار قارىز ەسەبىنە بورىشكەرلەردىڭ 322 مۇلكى ءوندىرىپ الۋشىلارعا بەرىلدى.

بۇگىندە قارىز سوماسى 22 ملرد تەڭگەنى قۇرايدى.

وسىعان بايلانىستى پروكۋراتۋرا ورگاندارى بورىشكەرلەردىڭ ەسەپكە الىنباعان جانە جاڭا كىرىس كوزدەرىن انىقتاۋ ءۇشىن جاڭا تاسىلدەر مەن الگوريتمدەر ازىرلەدى: تاكسي قىزمەتىندەگى موبيلدىك قوسىمشالار ارقىلى جۇمىس ىستەۋ (ياندەكس، inDriver, DiDi, Uber), بۋكمەكەرلىك كەڭسەلەردەگى ستاۆكالار، ەلەكتروندىق ءامياندار جانە تاعى باسقاسى»، - دەلىنگەن باس پروكۋراتۋرا مالىمەتىندە.

اتالىپ وتكەندەي، اليمەنت تولەمەۋدىڭ نەگىزگى سەبەبى – بورىشكەرلەردىڭ جۇمىسقا ورنالاسپاۋى، تۇراقتى تابىستىڭ بولماۋى. سول سەبەپتى پروكۋراتۋرا ورگاندارى سوت ورىنداۋشىلارى، پوليتسيا، اكىمدىكتەر جانە باسقا دا ۋاكىلەتتى ورگاندارمەن بىرلەسە وتىرىپ جۇمىس اتقارادى.

ناتيجەسىندە 200-گە جۋىق ۆاكانسيا ۇسىنىلعان جارمەڭكە ۇيىمداستىرىلعان.

«جۇمىسپەن قامتۋ ورگاندارىندا 20 مىڭ جۇمىسسىز بورىشكەر ەسەپكە الىندى، ونىڭ 9,5 مىڭى جۇمىسقا ورنالاستى. 500-دەن استام ءتۇرلى ىنتالاندىرۋ شارالارى وتكىزىلدى (اكتسيا، رەيد، الەۋمەتتىك روليك، بيلبوردتار جانە باسقالار).

اليمەنت وندىرۋدەن جالتارعان 6 مىڭعا جۋىق بورىشكەر اكىمشىلىك جانە قىلمىستىق جاۋاپتىلىققا تارتىلدى.

700 قاداعالاۋ اكتىسى بويىنشا تارتىپتىك جازادا 825 جەكە سوت ورىنداۋشى جازالاندى.

جۇيەلى جانە كەشەندى شارالار قابىلداۋ پروبلەمالىق ءىس جۇرگىزۋلەردىڭ سانىن ۇشتەن بىرىنە دەيىن قىسقارتۋعا مۇمكىندىك بەردى نەمەسە – 75 مىڭنان 50 مىڭعا دەيىن»، - دەلىنگەن باس پروكۋراتۋرا اقپاراتىندا.

فوتو: اشىق دەرەككوزدەن

Abai.kz