بيىل قازاقستان بانكتەرى قانشا تابىس تاپتى؟
قازاقستاندا ەكىنشى دەڭگەيدەگى 21 بانك جۇمىس ىستەيدى. جىل باسىنان بەرى ولاردىڭ اكتيۆتەرى 48,4 ترلن تەڭگەنى قۇرادى. بۇل جونىندە قر قارجى نارىعىن رەتتەۋ جانە دامىتۋ اگەنتتىگى توراعاسىنىڭ ورىنباسارى ولجاس قيزاتوۆ ايتتى، دەپ حابارلايدى Kazinform تىلشىسى.
«قازىرگى ۋاقىتتا بانك سەكتورى تۇراقتى دامۋدا. بانك سەكتورىن كاپيتالداندىرۋ كورسەتكىشتەرى جوعارى، بۇل اعىمداعى كۇيزەلىستەردى ەڭسەرۋگە مۇمكىندىك بەرەدى. بانك سەكتورىندا 21 ەكىنشى دەڭگەيلى بانك بار. ونىڭ ىشىندە شەتەلدىڭ قاتىسۋىمەن 11, مەملەكەتتىڭ 100% قاتىسۋىمەن 2 بانك جۇمىس ىستەيدى. 2023 جىلعى 10 ايدىڭ قورىتىندىسى بويىنشا بانكتەردىڭ اكتيۆتەرى 8,6%-عا ۇلعايىپ، 48,4 ترلن تەڭگەنى قۇرادى. بانك جۇيەسىندەگى كليەنتتەردىڭ سالىمدارى 4,8%-عا ءوسىپ، 33,1 ترلن تەڭگەنى قۇرادى»، - دەدى سپيكەر ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
و.قيزاتوۆ حالىق پەن بيزنەس دەپوزيتتەرىنىڭ تۇراقتى ءوسىپ كەلە جاتقانىن اتاپ ءوتتى. ولار 5 جىل ىشىندە ەكى ەسەگە ۇلعايعان.
«جىل باسىنان بەرگى ۇلعايۋ 4,8%-دى قۇرايدى، بۇل بانك جۇيەسىنە دەگەن سەنىمنىڭ جوعارى دەڭگەيىن راستاپ وتىر. دەپوزيتتىك بازانى دوللارلاندىرۋ دەڭگەيى جىل باسىنان بەرى 36,7%-دان 29,5%-عا دەيىن تومەندەدى. بانك سەكتورىنىڭ قازىرگى سىن-تاۋەكەلدەردى وتەۋ ءۇشىن جەتكىلىكتى كاپيتال قورى بار. نەگىزگى كاپيتالدىڭ جەتكىلىكتىلىك كوەففيتسيەنتى – 19,3%، مەنشىكتى كاپيتالدىڭ جەتكىلىكتىلىك كوەففيتسيەنتى – 21,8%، بۇل زاڭنامادا بەلگىلەنگەن نورماتيۆتەردەن ەداۋىر اسادى»، - دەيدى و. قيزاتوۆ.
بانك سەكتورىنىڭ مەنشىكتى كاپيتالى 6,4 ترلن تەڭگەگە جەتكەن، ول بولىنبەگەن پايدانى ۇلعايتۋ ەسەبىنەن جىل باسىنان بەرى 22,7%-عا ۇلعايدى.
«2023 جىلعى 10 ايدا بانكتەر 1,8 ترلن تەڭگە مولشەرىندە پايدا الدى، بۇل 2022 جىلعى وسىنداي كەزەڭمەن سالىستىرعاندا 53,7%-عا كوپ. ول كوپ جاعدايدا بانكتەردىڭ پايىزدىق كىرىستەرىنىڭ ۇلعايۋىنا بايلانىستى بولدى. بانك اكتيۆتەرى رەنتابەلدىلىگىنىڭ كورسەتكىشى 4,6%، كاپيتال رەنتابەلدىلىگى 36,2%-دى قۇرادى. 1 قاراشاداعى جاعداي بويىنشا بانكتەردىڭ وتىمدىلىگى جوعارى اكتيۆتەرى 14,6 ترلن تەڭگەنى نەمەسە اكتيۆتەردىڭ 30%-ىن قۇرادى. بۇل بانكتەردىڭ كليەنتتەر الدىنداعى مىندەتتەمەلەرىنە تولىق كولەمدە قىزمەت كورسەتۋىنە مۇمكىندىك بەرەدى»، - دەدى توراعانىڭ ورىنباسارى.
سونىمەن بىرگە، پورتفەل ساپاسىنىڭ كورسەتكىشتەرى دە ايتارلىقتاي جاقسارعان.
«جۇمىس ىستەمەيتىن كرەديتتەر كوەففيتسيەنتى تاريحي تۇرعىدان ەڭ تومەن مانگە جەتىپ، 2022 جىلدىڭ باسىنان بەرى 3,3% دەڭگەيىندە ساقتالىپ وتىر. بۇل كولەمنىڭ 73,1%-ى پروۆيزيالارمەن، قارىزداردىڭ قالعان بولىگى تۇراقتى كەپىل تۇرلەرىمەن وتەلدى»، - دەيدى ولجاس قيزاتوۆ.
Abai.kz
