استانا قالاسى بۇگىنگى تاڭدا ەلىمىزدىڭ مادەني ورتالىعىنا اينالىپ ۇلگەرگەنى جاسىرىن ەمەس. مۇندا مەملەكەتتىڭ ءھام جەرگىلىكتى اكىمدىكتىڭ قولداۋىمەن كۇن سايىن ءتۇرلى ەلىشىلىك ءھام ەلارالىق مادەني ءىس-شارالار ۇيىمداستىرىلۋدا. سولاردىڭ ءبىرسىپىراسىن Abai.kz وقىرماندارىنا ۇسىنعاندى ءجون كوردىك. 

«ۇستازعا ارناۋ» كونتسەرتى

قازاقستاننىڭ مادەني قاۋىمداستىعى اتاقتى وپەرا ءانشىسى ءارى ۇستاز، قازاق كسر ەڭبەك سىڭىرگەن ءارتىسى، «قۇرمەت» وردەنىنىڭ جانە ەۋروپانىڭ جاراتىلىستانۋ عىلىمدارى اكادەمياسىنىڭ (گاننوۆەر، گەرمانيا) «ۇلكەن كۇمىس جۇلدىز» وردەنىنىڭ كاۆالەرى، قر عىلىم جانە جوعارى ءبىلىم مينيسترلىگىنىڭ جاك پروفەسسورى قانات ومارباەۆتىڭ 80 جىلدىعىن اتاپ وتەدى. «ۇستازعا ارناۋ» كونتسەرتى «استانا وپەرا» تەاترىنىڭ ك.بايسەيىتوۆا اتىنداعى كامەرالىق زالىندا 23 جەلتوقساندا ۇسىنىلادى.

قازاق ۇلتتىق ونەر ۋنيۆەرسيتەتى ۆوكالدىق ونەر جانە ديريجەرلەۋ كافەدراسىنىڭ پروفەسسورى قانات ومارباەۆ كوپ جىلدىق شىعارماشىلىق مانسابىندا جارقىن ارتىستەردىڭ تۇتاس شوعىرىن تاربيەلەپ شىعاردى. بۇگىندە ونىڭ شاكىرتتەرى رەسپۋبليكامىزدىڭ جانە شەتەلدىڭ جەتەكشى ساحنالارىندا جارقىراي ونەر كورسەتۋدە. وسىناۋ كەشتە شەبەردىڭ شاكىرتتەرى – تەاتردىڭ جەتەكشى سوليستەرى – قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆ، «قۇرمەت» وردەنىنىڭ كاۆالەرى ايزادا قاپونوۆا، تالعات عالەەۆ، بەيىمبەت تاڭارىقوۆ، رامزات بالاكيشيەۆ، ەرۇلان كامەل جانە تاعى باسقالارىنىڭ ورىنداۋىندا قازاقستاندىق كومپوزيتورلاردىڭ تانىمال وپەرالارىنان اريالار مەن دۋەتتەر، بەلگىلى رومانستار مەن اندەر شىرقالادى.

«استانا وپەرانىڭ» جەتەكشى ءسوليسى ايزادا قاپونوۆانىڭ شىعارماشىلىعىندا قانات ومارباەۆ ماڭىزدى ءرول اتقاردى، سەبەبى ءارتىستى كاسىبي ۆوكال ونەرىنە ۇيرەتكەن شەبەردىڭ ءوزى بولاتىن.

- قانات نۇرمۇحامەدۇلى – مەنىڭ ومىرىمدەگى ايتۋلى تۇلعا، 2004 جىلى استاناعا كەلىپ، قازاق ۇلتتىق ونەر ۋنيۆەرسيتەتىنىڭ ۆوكال كافەدراسىنا وقۋعا تۇسكەنىمدە ماعان كاسىبي ۆوكال ونەرىن ۇيرەتكەن وسى كىسى بولاتىن. ءتورت جىل بويى وسى ۇستازىمنىڭ كلاسىندا ءبىلىم الدىم، ودان كەيىن ەكى جىل ماگيستراتۋرانى وقىدىم. ماعان دۇرىس باعىت كورسەتىپ، 3-كۋرستا وقىپ جۇرگەنىمدە ك.بايسەيىتوۆا اتىنداعى وپەرا جانە بالەت تەاترىنا سوليست بولىپ جۇمىسقا ورنالاسۋىما سەبەپشى بولدى. قانات ومارباەۆ – ونەردەگى اكەم دەسەم، ارتىق ايتپاعان بولار ەدىم. ول ماعان: «قانشالىقتى اتاقتى ءارتىس، جۇلدىز بولساڭ دا، ومىردە ادام بولىپ قالۋ – ەڭ ءبىرىنشى مىندەتىڭ بولۋى ءتيىس» دەپ ايتىپ وتىراتىن. سونداي-اق ول: «ساحنادا ونەرىڭدى پاش ەتكەننەن كەيىن قانشاما كورەرمەن كەلىپ، وڭ نەمەسە تەرىس پىكىر ايتىپ تۇرسا دا، ءاندى قالاي ورىنداپ شىققانىڭدى ءوزىڭ بىلەسىڭ، سوعان تالداۋ جاساپ، سونىمەن جۇمىس ىستە» دەپ ايتاتىن. سەكسەننىڭ سەڭگىرىنە شىعىپ وتىرعان ۇستازىما دەگەن قۇرمەتىم شەكسىز. ءالى تالاي دارىندى شاكىرتتەردى تاربيەلەپ شىعارسا ەكەن دەپ تىلەيمىن. وسى كونتسەرتتە ۇستازىما دەگەن ەرەكشە جىلۋلىقپەن جانە العىسپەن ساحناعا شىعامىن، - دەپ پىكىرىمەن ءبولىستى ايزادا قاپونوۆا.

«ۇستازعا ارناۋ» مۋزىكالىق كەشىنەن بولەك، جەلتوقساندا ك.بايسەيىتوۆا اتىنداعى كامەرالىق زالدا اسقاق ونەر جانكۇيەرلەرىن كونتسەرتتەردىڭ مازمۇندى باعدارلاماسى كۇتەدى. سونىمەن، 3 جەلتوقساندا Astana Opera حالىقارالىق وپەرا اكادەمياسىنىڭ تىڭداۋشىلارى «براۆو، وپەرا» ۆوكالدىق مۋزىكا كەشىن ۇسىنادى.

20 جەلتوقساندا وتەتىن «ءانىم مەنىڭ – استانا!» كونتسەرتى ەلوردانىڭ 25 جىلدىعىنا ارنالادى. قازاقستاننىڭ ەڭبەك سىڭىرگەن ءارتىسى عاليا بايعازينوۆا ەلوردا تۇرعىندارى مەن قوناقتارىنا ءوز ونەرىن تارتۋ ەتەدى. سونداي-اق سوپرانو داۋىستى انشىمەن بىرگە ازامات جىلتىركوزوۆ، ارتۋر گابديەۆ، باتىرجان سماقوۆ، اسەم كيىكباەۆا، جۇلدىز نىسانباەۆا ونەر كورسەتەدى. فورتەپيانو پارتياسىندا – جانار احمەتوۆا. كونتسەرتتى ك.بايسەيىتوۆا اتىنداعى كامەرالىق زال جەتەكشىسى مارجان جاكەنوۆا جۇرگىزەدى.

كوپتەن كۇتكەن قىسقى مەرەكەلەر قارساڭىندا «باروككو ستيلىندەگى روجدەستۆو» ۆوكالدىق-اسپاپتىق مۋزىكا كەشى وتەدى. 24 جەلتوقساندا تەاتر سوليستەرى تاتيانا ۆيتسينسكايا، اسەم سەمبينا، گۇلدانا الدادوسوۆا، ءاليحان زەينوللا، شاقىرىلعان سوليست ءارى جوبا اۆتورى باتىرجان سماقوۆ، سونداي-اق قازاق ۇلتتىق ونەر ۋنيۆەرسيتەتى حور كاپەللاسىنىڭ كامەرالىق قۇرامى (حورمەيستەر – مارينا بۋحۆالوۆا) جانە Anima di Barocco ىشەكتى اسپاپتار ءانسامبلى (كوركەمدىك جەتەكشىسى – قازاقستاننىڭ ەڭبەك سىڭىرگەن قايراتكەرى رايسا مۇساقوجاەۆا) ساحناعا شىعادى. فورتەپيانو پارتياسى – تەاتردىڭ مۋزىكالىق كەڭەسشىسى، قازاقستاننىڭ ەڭبەك سىڭىرگەن قايراتكەرى راۋشان بەسكەمبيروۆا.

27 جەلتوقساندا ديريجەر قازاقستاننىڭ ەڭبەك سىڭىرگەن قايراتكەرى ايدار ءابجاحانوۆتىڭ باسقارۋىمەن «استانا وپەرا» كامەرالىق وركەسترىنىڭ ورىنداۋىنداعى مۋزىكالىق كەش وتەدى.

جاڭا جىل قارساڭىنداعى ونەر كورسەتۋلەر تىزبەگىن 29 جەلتوقساندا «جاڭا جىلدىق كونفەتتي» مەرەكەلىك باعدارلاماسىمەن تەاتردىڭ بالەت ستۋدياسىنىڭ جاس ارتىستەرى جالعايدى. كونتسەرت رەجيسسەرى – بالالار بالەت ستۋدياسىنىڭ جەتەكشىسى، قازاقستاننىڭ ەڭبەك سىڭىرگەن قايراتكەرى عاليا بورىباەۆا، تالىمگەر ۇستاز – بوستان قوجابەكوۆ.

Abai.kz