3 جەلتوقساندا سەربيانىڭ بەلگراد قالاسىندا «اعايىندى كاريچ قورى» سىيلىعىن تابىستاۋ ءراسىمى ءوتتى.

1979 جىلى ەلدىڭ عىلىمي-تەحنولوگيالىق جانە شىعارماشىلىق الەۋەتىن قولداۋ جانە ىلگەرىلەتۋ، جۇرتشىلىقتى الەمدىك مادەنيەتتىڭ جەتىستىكتەرىمەن تانىستىرۋ ينستيتۋتى رەتىندە قۇرىلعان قور 26-شى رەت كورنەكتى شەتەلدىك تۇلعالارعا سىيلىق تابىس ەتتى.

«اعايىندى كاريچ قورى» سىيلىعىنا بۇرىن الەمگە ايگىلى عىلىم، جۋرناليستيكا، ەكونوميكا، مادەنيەت جانە ونەر قايراتكەرلەرى يە بولعان. ءار جىلدارى فيزيكا بويىنشا نوبەل سىيلىعىنىڭ لاۋرەاتى ج. الفەروۆ، ادەبيەت بويىنشا نوبەل سىيلىعىنىڭ لاۋرەاتى پ. حاندكە، قازاقستاننىڭ تۇڭعىش پرەزيدەنتى ن. نازارباەۆ، كينورەجيسسەر ە. كۋستۋريتسا، تەننيسشى ن. دجوكوۆيچ، اكتەر س. سيگال، تۇركسويدىڭ بۇرىنعى باس حاتشىسى د. قاسەيىنوۆ وسى ماراپاتتى العان.

بيىل سىيلىققا ۇسىنىلعان ەرەكشە تۇلعالار اراسىندا قازاقستاننىڭ دارىندى ءارتىسى ديماش قۇدايبەرگەن دە ماراپاتقا يە بولدى.

قور ديرەكتورلار كەڭەسىنىڭ پىكىرىنشە، ديماشتىڭ ايرىقشا ۆوكالدىق ونەرى، ونىڭ كلاسسيكالىق جانە زاماناۋي ستيلدە ورىنداۋ قابىلەتى، كەز كەلگەن نوتانى ورىنداۋ مۇمكىندىكتەرى ءارتىستى قازاقستان مادەنيەتىنىڭ جارقىن وكىلى، ءوز ءىسىنىڭ تابىستى مامانى رەتىندە اتاپ وتۋگە مۇمكىندىك بەرەدى.

«ءبىزدىڭ ديرەكتورلار كەڭەسى وسىنداي ماڭىزدى ءارتىس وسى جولداعى تالانتتاردىڭ التىن سەرياسىنىڭ جالعاسى بولۋعا لايىق ەكەندىگىمەن ءبىراۋىزدان كەلىسەدى، بۇل ءبىزدىڭ ەلدەرىمىز اراسىنداعى قارىم-قاتىناستى نىعايتادى»، – دەپ اتاپ ءوتتى سەربياداعى قازاقستان رەسپۋبليكاسىنىڭ قۇرمەتتى كونسۋلى، اعايىندى كاريچ قورىنىڭ نەگىزىن قالاۋشى ميلانكا كاريچ.

ماراپاتتاۋ ءراسىمى سەرب مادەنيەتى مەن ءداستۇرىن ايقىندايتىن مادەني مۇرا – بەلگرادتاعى ۇلتتىق تەاتردا ءوتتى.

ۇلتتىق تەاتر ساحناسىندا ديماش قازاقتىڭ حالىق ءانى «سامالتاۋ» جانە يگور كرۋتويدىڭ «Mademoiselle Hyde» اندەرىن شىرقاعان.

ديماش اعايىندى كاريچ قورىنىڭ قۇرىلتايشىلارى مەن ديرەكتورلار كەڭەسىنە ماراپاتقا لايىق دەپ تانىعانى ءۇشىن العىسىن ءبىلدىردى، ونەر سالاسىنداعى حالىقارالىق جوبالاردىڭ ەلدەر اراسىنداعى دوستىق پەن ءوزارا دامۋدى قولداۋ مۇمكىندىكتەرى رەتىندەگى ماڭىزدى ءرولىن اتاپ ءوتتى.

Abai.kz