2025 جىلى قىزىلوردا قالاسىندا جاڭا جىلۋ ەلەكتر ورتالىعى قولدانىسقا بەرىلەدى. بۇل تۋرالى ءوڭىر اكىمى نۇرلىبەك نالىباەۆ مالىمدەدى.

«مەملەكەت باسشىسىنىڭ ەلىمىزدەگى جىلۋ-ەلەكتر ورتالىقتارىنىڭ جۇمىسىن جانداندىرۋ تاپسىرماسىنا سايكەس ايماقتا ءىرى جوبا جۇزەگە اسۋدا. ەگەمەندىك جىلدارىنداعى ينۆەستورلاردىڭ قارجىسىنا سالىناتىن ەڭ اۋقىمدى، تەڭدەسسىز جوبا – جىلۋ ەلەكتر ستانتسياسىنىڭ قۇرىلىسى ءبىزدىڭ ايماقتا بوي كوتەرۋدە. قۇنى 215 ملرد تەڭگە بولاتىن جوبا 2025 جىلى ىسكە قوسىلادى»، - دەدى نۇرلىبەك نالىباەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

وبلىس باسشىسىنىڭ ايتۋىنشا، بۇل ەلەكتر ەنەرگياسىن سىرتتان ساتىپ الۋدان ارىلىپ، وندىرىلگەن ەلەكتر ەنەرگياسىنىڭ ءبىر بولىگىن ايماقتان تىس جەرلەرگە ساتۋعا مۇمكىندىك بەرەدى.

جالپى وبلىستا جىلۋ بەرۋ ماۋسىمى تۇراقتى وتۋدە. وبلىستاعى 1067 الەۋمەتتىك نىسان مەن 855 كوپقاباتتى تۇرعىن ءۇي تولىقتاي جىلۋ جۇيەسىنە قوسىلعان.

بۇعان دەيىن نۇرلىبەك نالىباەۆ قىزىلوردا وبلىسىنىڭ بارلىق قالالارى مەن اۋدان ورتالىقتارى گازبەن قامتىلعانىن ايتقان ەدى.

فوتو: اشىق دەرەككوزدەن

Abai.kz