"تولىعىمەن شاعىن اۋدانداردا، قالالاردا جىلۋمەن قامتاماسىز ەتەتىن قازاندىقتا ءىرى اپاتتار بولمايدى دەپ سەندىرە الامىن. بۇل ماسەلە ءبىزدىڭ باقىلاۋدا. جىلۋلىقتىڭ ءبارى قىس مەزگىلىنە دايىندىققا ساي قالىپتى جۇمىس ىستەپ جاتىر", - دەدى سكليار 12 جەلتوقساندا بريفينگتە.

ونىڭ سوزىنشە، اپاتتار نەمەسە تەحنولوگيالىق قاتەلىكتەر جەلىلەردە بولۋى مۇمكىن، سەبەبى "بۇل پروبلەمالار ونداعان جىلدار بويى جينالىپ كەلگەن".

"ول پروبلەمالاردى 1-2 جىلدا شەشۋ مۇمكىن ەمەس. بيۋدجەت، تاريف مۇمكىندىكتەرى شەكتەلگەن. بىراق كوممۋنالدىق قىزمەتتەر مەملەكەتتىك ورگانداردىڭ قولداۋىمەن ونداي اپاتتاردىڭ بەلگىلەنگەن مەرزىمدە جويۋعا مۇمكىندىك بەرەدى", - دەدى سكليار.

سۋىق تۇسكەننەن كەيىن قازاقستاننىڭ كەمىندە جەتى ايماعىندا جىلۋ ەلەكتر ورتالىقتارىندا (جەو) اپاتتار بولىپ، مىڭداعان ادام جىلۋسىز قالدى. اتىراۋدا ءبىر تاۋلىكتەن بەرى سۋ بەرىلمەدى. ەلدىڭ ەنەرگەتيكا مينيسترلىگى ەكىباستۇز، اقتاۋ، كوكشەتاۋ جانە تەمىرتاۋ قالالارىنىڭ جىلۋ بەرۋ جۇيەلەرىندە پروبلەمالار بار ەكەنىن راستاپ، ماسەلەنى شەشۋ جۇمىستارى ءجۇرىپ جاتقانىن ءبىلدىردى. جەرگىلىكتى تۇرعىندار جىلۋ بەرىلمەۋ، ۇيلەرى مۇزداپ جاتقانىن ايتادى.

بىلتىر قاراشادا ەكىباستۇز قالاسىندا جىلۋ ەلەكتر ستانتسياسىندا اپات بولىپ، جۇزدەگەن ءۇي مەن الەۋمەتتىك نىساندار ايازدى كۇندەرى جىلۋسىز قالعان.

بۇل وقيعادان كەيىن جىلۋ جەلىلەرىنىڭ ەسكىرگەنى ايتىلىپ، ينفراقۇرىلىمدى مودەرنيزاتسيالاۋ ءۇشىن تاريفتەردى كوتەرۋ كەرەك ەكەنىن بىلدىرگەن. بيىل جىلۋ نىساندارىن جوندەر ءۇشىن بيۋدجەتتەن 37 ميلليارد تەڭگەدەن استام قارجى بولىنگەن.

Abai.kz