كەلەسى جىلى 7 اقپاندا ازەربايجان رەسپۋبليكاسىندا كەزەكتەن تىس پرەزيدەنت سايلاۋى وتەدى. وعان ەلدىڭ قازىرگى پرەزيدەنتى يلحام اليەۆ تە قاتىساتىنىن ايتتى. ول پرەزيدەنتتىككە ۇمىتكەر رەتىندە بيلىكتەگى Yeni Azərbaycan («جاڭا ازەربايجان») پارتياسىنان ۇسىنىلدى. 

بۇل سايلاۋ 2025 جىلى ءساۋىر ايىندا بولۋعا ءتيىس ەدى. الايدا ورتالىق سايلاۋ كوميسسياسى سايلاۋدى مەرزىمىنەن بۇرىن وتكىزۋ تۋرالى شەشىم قابىلدادى. ازەربايجاننىڭ كونستيتۋتسياسىندا پرەزيدەنت بولىپ سايلانۋعا شەكتەۋ جوق. ياعني، مەملەكەت باسشىسى ءومىرىنىڭ سوڭىنا دەيىن پرەزيدەنت سايلاۋىنا تۇسە بەرەدى.

يلحام اليەۆ سوڭعى رەت پرەزيدەنت بولىپ 2018 جىلى ءتورتىنشى رەت سايلانعان. ال جالپى ول ازەربايجاندى 2003 جىلدان بەرى ەلدىڭ بۇرىنعى پرەزيدەنتى گەيدار اليەۆ قايتىس بولعاننان كەيىن باسقارىپ كەلەدى. يلحام اليەۆ – گەيدار اليەۆتىڭ ەكى بالاسىنىڭ ۇلكەنى، جالعىز ۇلى. گەيدار اليرزا وعلىنىڭ ءوزى ەلدى 10 جىل باسقارعان.

اپا اگەنتتىگىنىڭ حابارلاۋىنشا، پارتيالاستارىمەن كەزدەسۋدىڭ بىرىندە Yeni Azərbaycan پارتياسى توراعاسىنىڭ ورىنباسارى تاير بۋداگوۆ «قاراباقتى كىم ازات ەتسە، سول ءبىزدىڭ ماڭگى پرەزيدەنتىمىز بولادى» دەدى.

يلحام اليەۆ ازەربايجاننىڭ ارمەنيا باسىپ العان جەرلەرىن قايتارىپ العانى ءۇشىن عانا ماڭگى پرەزيدەنت بولۋعا ابدەن لايىق. ازەربايجاننىڭ ءار پاتريوتى وسىنداي كوزقاراس ۇستانادى، – دەدى ول.

بۇل پىكىرگە اليەۆتىڭ ءوزى ءالى ەشتەڭە دەگەن جوق. حالىق تا ۇندەمەي وتىر. اليەۆ كەلەسى جىلى پرەزيدەنت سايلاۋىنا مىندەتتى تۇردە قايتا تۇسەتىنىن عانا ايتتى.

يلحام اليەۆ بيلىكتى اكەسى گەيدار اليەۆتەن مۇراعا العان. ايەلى مەحريبان اليەۆانى ازەربايجاننىڭ ۆيتسە-پرەزيدەنتى ەتىپ تاعايىنداعان.

Abai.kz