رەسەي پرەزيدەنتى ۆلاديمير پۋتين قازاقستان، بەلارۋس پەن مولدوۆا ازاماتتارىنا رەسەي ازاماتتىعىن بەرۋدى جەڭىلدەتەتىن بۇيرىققا قول قويدى.

ەندىگى جەردە اتالعان ءۇش مەملەكەتتىڭ جۇرتى ەگەر «رەسەي پاسپورتىن الامىن دەسە»، رەسەي اۋماعىندا تۇرعىلىقتى تۇرىپ جاتقانىن دالەلدەمەيدى. رەسەي تاريحى مەن مەملەكەتتىك نەگىزدەرىنەن ەمتيحان تاپسىرمايدى. بەلارۋستەر ورىس تىلىنەن ەمتيحان تاپسىرمايدى. ال قازاقستان مەن مولدوۆا ازاماتتارى ورىس تىلىنەن سىناق تاپسىرۋى مىندەت.

«رف پرەزيدەنتى ۆلاديمير پۋتين قازاقستان، بەلارۋس پەن مولداۆا ازاماتتارى ءۇشىن رەسەي ازاماتتىعىن جەڭىل تۇردە الۋعا مۇمكىندىك بەرەتىن جارلىققا قول قويدى»، - دەلىنگەن دۇيسەنبىدەگى حابارلامادا.

قۇجات 18 جەلتوقساننان باستاپ كۇشىنە ەندى.

ايتا كەتەيىك، قازاقستان زاڭناماسى بويىنشا قوس ازاماتتىققا تىيىم سالىنادى، ال قر ازاماتى باسقا ەلدىڭ ازاماتتىعىن العان سوڭ، قازاقستان ازاماتتىعىنان اۆتوماتتى تۇردە ايىرىلادى.

بەيبىت جاتقان ۋكرايناعا سوعىس اشىپ، قالالارىندا قانقاساپ جاساپ جاتقان رەسەي مەن ونىڭ ساياسي ءھام اسكەري ەليتاسى 2024 جىلدىڭ ناۋرىزىندا قاتارىنان ءۇش كۇندى ارناپ، پرەزيدششەنتتىك سايلاۋ وتكىزۋدى جوسپارلاپ وتىرعانى بەلگىلى.

رەسەي پرەزيدەنتىنىڭ بۇل جارلىعىن ەكى سيپاتتا باعالاۋعا بولار. اۋەلى، ۋكراينا مايدانىندا ايتارلىقتاي جەتىستىك كورسەتە الماعان رەسەيدىڭ سايلاۋ الدىندا ىشكى اۋديتورياسىنىڭ كوڭىلىن اۋلاۋ ءۇشىن جاسالعان قادام بولسا، ەكىنشىسى الىستى كوزدەۋى. كەز كەلگەن سوعىس ەرتە مە، كەش پە، اياقتالادى.

ال كرەملدىڭ قازىرگى رەجيمىنىڭ ءتۇپ ماقساتى كەلمەسكە كەتكەن كسرو-نى قايتا ءتىرىلتۋ ەكەنى بۇل كۇندە امبەگە ايان بولعان. ونى رەسەي پرەزيدەنتى ءپۋتيننىڭ ءوزى باستاپ، سالا-قۇلاش ءتىلدى ساياساتشىلارى قوستاپ، اشىقتان-اشىق ايتىپ تا ءجۇر.

وسى ەسەپپەن، ءپۋتيننىڭ «ازاماتتىق بەرۋدى جەڭىلدەتۋ» دەگەن اڭگىمەسىنە الاڭداۋعا نەگىز بار. سەبەبى، ءبىزدىڭ سولتۇستىك قازاقستان جاقتاردا قازىرگى كۇننىڭ وزىندە قوس ازاماتتىعى بار ادامدار تۋرالى اقپاراتتار شىعىپ جاتىر. ەكى ەلدىڭ زەينەتاقىسىن الىپ وتىرعان ادامدار دا بار. سوندىقتان، قازاقستاننىڭ سىرتقى ىستەر مينيسترلىگى رەسەيدىڭ قازاقستانداعى ەلشىسىن شاقىرىپ، نارازىلىق نوتاسىن تاپسىرۋ كەرەك. مۇنىڭ ارتىندا ۇلكەن قاۋىپ بار.

Abai.kz