قازاقستان ۇلتتىق ەكونوميكا مينيسترلىگى رەسەي ارمياسىنا قاجەتتى تاۋارلاردى تاسىمالدايدى دەگەن «Elem Group» كومپانياسىنا قاتىستى مالىمدەمە جاسادى.

«7 جەلتوقساندا «Elem Group» جشس اقش ساۋدا مينيسترلىگى ونەركاسىپ جانە قاۋىپسىزدىك بيۋروسىنىڭ (entity list) تىزىمىنە ەنگىزىلدى. ايتا كەتۋ كەرەك، 2023 جىلدىڭ مامىر ايىنان باستاپ «Elem group» جشس سىرتقى ساۋدا قىزمەتىن جۇرگىزبەيدى. بۇدان بىلاي اقش جەتكىزۋشىلەرى وسى تىزىمگە ەنگەن كومپانيالارعا امەريكالىق تاۋارلاردى ارنايى ليتسەنزيا الماي جىبەرە المايتىندىعىن بىلدىرەدى»، - دەدى ۇەم.

اقپاراتقا سايكەس، «اقش ساۋدا مينيسترلىگىنىڭ شەكتەۋلەرىنە ۇشىراعان كومپانيالار امەريكالىق كونتراگەنتتەرمەن جۇمىس ىستەۋدى قوسپاعاندا، ءوز قىزمەتىن جالعاستىرا الادى».

«بۇل تىزىمدە گەرمانيا، جاپونيا، بەلگيا، ۇلىبريتانيا جانە باسقا دا دامىعان ەلدەردىڭ كاسىپورىندارى بار. بۇل قايتالاما سانكتسيالار ەمەس، ياعني اقش قارجى مينيسترلىگىنىڭ (SDN list) شەتەلدىك اكتيۆتەردى باقىلاۋ باسقارماسىنىڭ (OFAC) بۇعاتتاۋ تىزىمىنە جاتپايتىنىن ەسكەرۋ ماڭىزدى»، - دەلىنگەن حابارلامادا.

ەستەرىڭىزگە سالا كەتەيىك، 17 جەلتوقساندا قازاقستاندىق «Elem Group» كومپانياسى ۋكرايناداعى رەسەي ارمياسىنا قاجەتتى تاۋارلاردى جەتكىزەدى دەگەن كۇدىككە ىلىنگەن.

فوتو: عالامتوردان

Abai.kz