مەرزىمى وتكەن كرەديتتەرى بار ازاماتتارعا جاڭا نەسيە بەرىلمەيدى
پارلامەنت دەپۋتاتتارى نەسيە بەرۋدەگى تاۋەكەلدەردى ازايتۋ جانە قارىز الۋشىلاردىڭ قۇقىعىن قورعاۋ ماسەلەلەرىن رەتتەيتىن زاڭ جوباسىن ازىرلەدى.
ءماجىلىستىڭ قاراۋىنا «كەيبىر زاڭنامالىق اكتىلەرگە كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر ەنگىزۋ تۋرالى» زاڭ جوباسى ءتۇستى.
دەپۋتات، قارجى جانە بيۋدجەت كوميتەتىنىڭ حاتشىسى تاتيانا ساۆەلەۆانىڭ ايتۋىنشا، زاڭ جوباسى پارلامەنت دەپۋتاتتارىنىڭ باستاماسىمەن ازىرلەنگەن.
زاڭ جوباسىندا مىناداي نورمالار كوزدەلگەن:
- مەرزىمى وتكەن كرەديتتەرى بار ازاماتتارعا جاڭا تۇتىنۋشىلىق نەسيە بەرۋگە تىيىم سالۋ;
- 90 كۇننەن كەشىكتىرىلگەن بارلىق كرەديت بويىنشا سىياقى ەسەپتەۋگە تىيىم سالۋ;
- بانكتەر مەن ميكروقارجى ۇيىمدارىنىڭ ازاماتتاردىڭ كرەديتتەرىن كوللەكتورلىق اگەنتتىكتەرگە ساتۋىن شەكتەۋ;
- كوللەكتورلىق اگەنتتىكتەردىڭ ساتىپ الىنعان بەرەشەكتى رەتتەۋدى جۇرگىزۋ مىندەتىن ەنگىزۋ;
- تۇتىنۋشىلىق بانك قارىزىنىڭ مەرزىمى، سوماسى جانە وزگە دە شارتتارى بويىنشا شەكتەۋلەر بەلگىلەۋ;
- كامەلەتكە تولماعان بالالارى بار وتباسىلاردى جىلۋ بەرۋ ماۋسىمىندا جالعىز باسپاناسىنان شىعارۋعا تىيىم سالۋ;
- ءوندىرىپ الۋ ناتيجەسىندە بانكتىڭ مەنشىگىنە وتكەن تۇرعىن ءۇيدى بۇرىنعى يەسىنە (قارىز الۋشىعا) جالعا بەرۋگە مۇمكىندىك بەرۋ;
- تولەم تالابىن قويعان كەزدە بانك شوتىندا كەمىندە 2 كۇنكورىس مينيمۋمى مولشەرىندە اقشا قالدىرۋ;
- كرەديت الۋدان ەرىكتى تۇردە باس تارتقان ازاماتتاردىڭ كرەديتتەرى بويىنشا بورىشىن ەسەپتەن شىعارۋ;
- اسكەري بورىشىن وتكەرۋ كەزەڭىندە ساربازدار ءۇشىن كرەديتتەردى سىياقىسىز كەيىنىرەك تولەۋ مىندەتىن ەنگىزۋ.
بۇدان باسقا، زاڭ جوباسىندا قىلمىستىق كودەكس پەن اكىمشىلىك قۇقىقبۇزۋشىلىق تۋرالى كودەكسكە «جەكە دەرەكتەردى ساتقانى، ابونەنتتىڭ ءنومىرىن اۋىستىرعانى جانە ابونەنتتىك ءنومىردى باسقا تۇلعالارعا زاڭسىز بەرگەنى ءۇشىن قىلمىستىق جانە اكىمشىلىك جاۋاپكەرشىلىكتى ەنگىزۋ» تۋرالى نورمالار قاراستىرىلعان.
ساۆەلەۆا وسى زاڭ جوباسى بويىنشا ۇكىمەت بيىل 12 قاراشادا قورىتىندى بەرگەنىن اتاپ ءوتتى. ۇكىمەت دەپۋتاتتاردىڭ ءبىراز باستاماسىن قولداعان، بىراق كەيبىر نورمالار جۇمىس بارىسىندا ءالى دە پىسىقتالىپ، تالقىلانباق.
ءماجىلىستىڭ قارجى جانە بيۋدجەت كوميتەتى زاڭ جوباسى بويىنشا قورىتىندى ازىرلەيدى.
فوتو:اشىق دەرەككوزدەن
Abai.kz
