كوكجيدە – ەلىمىزدىڭ باتىس وبلىستارىن تولىق قامتاماسىز ەتە الاتىن جەراستى سۋ قورى. ۇكىمەت قاۋلىسىمەن 2008 جىلى مەملەكەتتىك تابيعي-قورىقتىق قوردىڭ تىزىمىنە دە ەنگەن. دەگەنمەن قازىردىڭ وزىندە تۇشى سۋ بەلدەۋىنىڭ ماڭايىندا 5 مۇناي كومپانياسى جۇمىس ىستەۋدە. ەكولوگيا مينيسترلىگىنىڭ سوزىنشە بۇل 2032 جىلعا دەيىن جالعاسادى.

الداعى 8 جىلدا تۇشى سۋ الابىنان نە قالادى؟ سول مۇناي كومپانيالارىنا شەكتەۋ قويۋعا نە كەدەرگى؟ كوكجيدە ەلىمىزدىڭ باتىس ايماعىنداعى اۋىز سۋ ماسەلەسىن شەشە الا ما؟ وسى جايلى پارلامەنت ءماجىلىسىنىڭ دەپۋتاتى اسقار سادىقوۆ «قازاق ءۇنى» پودكاستىندا بەرگەن سۇحباتىندا ايتتى:

كوكجيدەدەگى سۋ قورى اتىراۋ، اقتوبە، ماڭعىستاۋ وبلىستارىن الداعى 50 جىل اۋىز سۋمەن قامتۋعا جەتەدى. بۇگىندە مۇناي كومپانيالارىنىڭ 800-گە جۋىق ۇڭعىماسى بۇرعىلاۋ جۇمىستارىن جۇرگىزۋدە. تەك مۇناي ەمەس، حيميالىق زياندى قۇرامداعى مۇناي قالدىقتارى تۇششى سۋدى لاستاپ جاتىر.

پارلامەنت وتىرىسىندا وسى كومپانيالارعا قاتىستى قانداي ناقتى شەشىمدەر قابىلدانعانى جونىندە دەپۋتات ەكولوگيا مينيسترىنەن تىكەلەي سۇراعىن قويعان بولاتىن. ەرلان نىسانباەۆتىڭ سوزىنشە، ۇڭعىمالاردى الۋ شارالارى 2024-2032 جىلدار ارالىعىندا جۇرەدى. ال بۇل ۋاقىت اراسىندا سۋ الابى ىشۋگە جارامسىز بولىپ قالۋى ابدەن مۇمكىن.

ايتا كەتەتىنى، قر يندۋستريا جانە ينفراقۇرىلىمدىق دامۋ مينيسترلىگىنىڭ حابارلاۋىنشا، ماڭعىستاۋ وبلىسىندا اۋىز سۋ ماسەلەسى اسا وزەكتى. ايماقتا تۇششى سۋ كوزدەرىنىڭ جەتىسپەۋشىلىگىنە بايلانىستى حالىققا سۋ جازدا كەستە بويىنشا بەرىلەدى.

Abai.kz