«قازعارىش» اگەنتتىگىنىڭ ءباسپاسوز قىزمەتى اتالعان اگەنتتىك توراعاسى تالعات مۇساباەۆتىڭ قىتايدا بولعان رەسمي ساپارىندا، قىتاي ۇلتتىق عارىش اكىمشىلىگىنىڭ باسشىسى مي سينجۋيمەن كەزدەسۋى بارىسىندا قازاق عارىشكەرلەرىنىڭ 2014 جىلى قىتايدان ۇشىرىلاتىندىعى تۋرالى ارنايى كەلىسىلگەندىگىن حابارلاعان. 

«قازعارىش» اگەنتتىگىنىڭ ءباسپاسوز قىزمەتى اتالعان اگەنتتىك توراعاسى تالعات مۇساباەۆتىڭ قىتايدا بولعان رەسمي ساپارىندا، قىتاي ۇلتتىق عارىش اكىمشىلىگىنىڭ باسشىسى مي سينجۋيمەن كەزدەسۋى بارىسىندا قازاق عارىشكەرلەرىنىڭ 2014 جىلى قىتايدان ۇشىرىلاتىندىعى تۋرالى ارنايى كەلىسىلگەندىگىن حابارلاعان. 

قازاقستان «بايقوڭىر» عارىش ايلاعىمەن بۇكىل الەمگە تانىمال. تاۋەلسىزدىكتىڭ العاشقى جىلدارىندا توقتار اۋباكىروۆ پەن تالعات مۇساباەۆ عارىشتى باعىندىرىپ ۇلگەرگەن ەدى. ودان كەيىنگى 20 جىلدا تاعى دا ەكى عارىشكەر «بايقوڭىر» عارىش ايلاعىنان ۇشىرىلاتىن بولىپ، 9 جىل بويى دايىندالعان. 2000 جىلى قازاقستان مەن رەسەي پرەزيدەنتتەرى نۇرسۇلتان نازارباەۆ پەن ۆلاديمير پۋتين اراسىندا قازاقستان عارىشكەرلەرىن دايىنداۋ تۋرالى كەلىسىمگە قول قويدى. وسى كەلىسىم اياسىندا تاڭداۋ مۇحتار ايماحانوۆ پەن ايدىن ايىمبەتوۆكە تۇسكەن بولاتىن. بىرنەشە جىل «جۇلدىزدى قالاشىقتا» دايىندالعاننان كەيىن قازاقستاننىڭ ءۇشىنشى عارىشكەرى رەتىندە ايدىن ايىمبەتوۆتىڭ اتى اتالىپ، 2009 جىلى قىركۇيەكتىڭ 30-ىندا رەسەيلىك ەكيپاجبەن بىرگە ۇشىرىلۋى ءتيىس ەدى. عارىشكەرلەردى دايىنداۋعا قازاقستان قازىناسىنان 16 ميلليون تەڭگە جۇمسالدى. ال ەكيپاجدىڭ ۇشۋىنا 900 ميلليون رۋبل، قازاقستان تاراپىنان 26 ميلليون دوللار تولەنۋى قاجەت-تۇعىن. بۇل كەلىسىم نەگىزىندە حالىقارالىق عارىش ستانتسياسىنا وسى 17 مەملەكەتتىڭ ازاماتتارى عانا قول جەتكىزە الادى دەلىنگەن. ال قازاقستان بۇل تىزىمدە جوق. 2011 جىلى قاڭتاردىڭ 11-ىندە سول كەزدەگى قازاقستان پرەمەر-ءمينيسترى كارىم ءماسىموۆ ۇلتتىق عارىش اگەنتتىگىنىڭ كوللەگيا جينالىسىندا قازاقستان مەن رەسەي پرەزيدەنتتەرى اراسىندا قازاقستاندىق عارىشكەرلەردى حعس-ىنىڭ (حالىقارالىق عارىش ستانتسياسى) عارىشقا ۇشۋ باعدارلامالارىنا ەنگىزۋ جايىندا اۋىزشا كەلىسىمنىڭ بولعانىن جەتكىزگەن. الايدا «قازعارىش» اگەنتتىگى توراعاسىنىڭ ورىنباسارى مەيىربەك مولدابەكوۆ قازاقستان عارىشكەرلەرىنىڭ 2013 جىلدان بۇرىن عارىشقا سامعاۋى مۇمكىن ەمەس ەكەندىگىن ايتقان بولاتىن. 2011 جىلى بولاشاق عارىشكەرلەردىڭ ءبىرى مۇحتار ايماحانوۆ عارىشتى باعىندىرۋ ماقساتىندا قازاق ازاماتتىعىن رەسەي ازاماتتىعىنا الماستىراتىندىعى جايىندا مالىمدەمە جاساعان. ودان دا تۇك شىققان جوق. بۇدان كەيىن ونىڭ تاعدىرى قالاي بولعانى جا-يىندا اقپارات مۇلدەم جوعالدى. ءبىر سوزبەن ايتساق، مۇحتار ايماحانوۆ حابارسىز كەتتى. ەڭ باستىسى، ونىڭ ءالى كۇنگە دەيىن عارىشقا ۇشپاعاندىعى ايقىن. رەسەي بۇل ماسەلەنى كوپكە سوزدى. تالاي سىلتاۋ ايتىلدى. ءاسىلى ءوزىن الەمدەگى ەڭ باستى عارىشتىق دەرجاۆا سانايتىن رەسەي تاكاپپارلىق، وكتەمدىك تانىتىپ، قازاقتاردىڭ ءسوزىن قۇلاعىنا ءبىرجولا ىلمەۋگە كوشتى. ەكى ەل پرەزيدەنتتەرىنىڭ ۋاعدالاستىقتارى دا ادىرا قالدى. 

ءسويتىپ، قازاقستاننىڭ ءوز ۇلان­دارىن عارىشقا ۇشىرۋ جايلى ءۇمىتى وشە باستاعان ەدى. قىتاي ۇلت­تىق عارىش اكىمشىلىگىنىڭ باسشىسى مي سينجۋي «قازعارىش» باسشىسىنىڭ قازاق عارىشكەرىن قىتايلىق ەكيپاج قۇرامىندا ۇشىرۋ جايلى ۇسىنىسىن قۋانا قۇپتاعان. باسپاسوزدەگى مالىمەتتەرگە سۇيەنسەك، قازاق عارىشكەرلەرى 2014 جىلدىڭ ءساۋىر، مامىر ايلارىندا ۇشىرىلۋى ابدەن مۇمكىن. الايدا بۇنىڭ مەملەكەتتىك قازىناعا قانشا سالماق سالاتىنى ازىرگە بەيمالىم. بۇل كەلىسسوزدەردىڭ باسى عانا دەلىنگەن تاراتىلعان مالىمدەمەدە. دەگەنمەن ەكى ەل باسشىلارىنىڭ الداعى رەسمي كەزدەسۋىندە قانشا قارجى جۇمسالاتىندىعى تولىق ايقىندالۋى دا مۇمكىن. «قازعارىش» اگەنتتىگىنىڭ قىزمەتكەرلەرى ءۇشىنشى عارىشكەردىڭ اتىن اتاپ تا ۇلگەردى. ول ايدىن ايىمبەتوۆ مىرزا كورىنەدى. تاعى ەسكەرتە كەتەتىنى، عارىشقا ۇشۋعا دايىندالعانداردىڭ جاسى بۇگىندە 40-تان اسقان. ياعني ولار جاقىن ارادا ءوز ارماندارىن جۇزەگە اسىرماسا، بۇدان كەيىن كەش بولىپ كەتۋى دە مۇمكىن. ايدىن ايىمبەتوۆ 2012 جىلدان بەرى «قازاقستان رەسپۋبليكاسىنىڭ عارىشكەرى» اتاعىنا يە. 

"تۇركىستان" گازەتى