"قازاقمىس" كومپانياسى 26 جەلتوقساندا ۇلىتاۋ وبلىسىنداعى "جىلاندى" كەنىشىندە ءبىر جۇمىسشىنىڭ قازا بولعانىن حابارلادى.

"شىعىس سارى-وبا" كەنىشى ۋچاسكەلەرىنىڭ بىرىندە جۇرگىزۋشى جەراستىندا وزدىگىنەن جۇرەتىن ماشينانى جۇمىس ورنىنا الىپ بارا جاتىپ، 1992 جىلى تۋعان جۇرگىزۋشىنى ابايسىزدا قاعىپ كەتكەن. جۇمىسشى العان جاراقاتتان قايتىس بولدى" دەپ جازىلعان كومپانيا حابارلاماسىندا.

اقپاراتقا قاراعاندا، "ارنايى كوميسسيا وقيعانىڭ جاي-جاپسارى مەن سەبەپتەرىن انىقتاپ جاتىر".

"قازاقمىس" كەنىشتەرىندە جۇمىسشىلاردىڭ قازا بولعانى جايلى ءجيى اقپارات شىعادى. قاراشا ايىندا "قازاقمىس" كومپانياسى جامبىل وبلىسىنداعى "جايسان" كەنىشىندە تاۋ-كەن جۇمىستارىن اتقارۋ كەزىندە بولعان "جازاتايىم وقيعادان" ەكى جۇمىسشى قازا بولعانىن حابارلاعان.

"قازاقمىس" كومپانياسى تابيعي رەسۋرستارىن قازۋ جانە قايتا وندىرۋمەن اينالىسادى. كومپانيا قۇرامىندا گەولوگيالىق-بارلاۋ كەشەنى، 13 كەن، ءتورت كەن بايىتۋ فابريكاسى، ەكى مىس بالقىتۋ زاۋىتى، ەكى كومىر كەنى جانە ءبىر وتىن-ەنەرگەتيكا كەشەنى كىرەدى. كومپانيانىڭ نەگىزگى ءوندىرىسى ۇلىتاۋ جانە قاراعاندى وبلىستارىندا ورنالاسقان. "قازاقمىس" كورپوراتسياسىندا جالپى 38 مىڭنان استام ادام جۇمىس ىستەيدى.

بىلتىر تامىزدا وندىرىستە جاراقات العان جانە كاسىبي دەرتكە شالدىققان "قازاقمىس" كورپوراتسياسىنىڭ 200-گە جۋىق جۇمىسشىسى پرەزيدەنتكە ۇندەۋ جولداپ، تاۋ-كەن مەتاللۋرگيا كومپانياسىن مەملەكەت مەنشىگىنە قايتارۋدى سۇراعان. ولار 1990-جىلدارى ەلدە ستراتەگيالىق نىسانداردى جەكەشەلەندىرۋ پروتسەسى "زاڭسىز" جۇرگەنىن ايتىپ، ال بۇرىن ەل ەكونوميكاسىنا قىزمەت ەتكەن مىس الىبى قازىر "ساناۋلى ادامداردى عانا بايىتىپ وتىر" دەپ مالىمدەگەن.

فوتو: اشىق دەرەككوزدەن

Abai.kz