بۇگىن «Egemen Qazaqstan» گازەتىندە ديحان قامزابەكۇلى مەملەكەت باسشىسىنان: «ءبىز وزىق ويلى ۇلت رەتىندە تەك قانا العا قاراۋىمىز كەرەك» دەگەن تاقىرىپتا سۇحبات الدى. وسى سۇحباتىندا قاسىم-جومارت توقاەۆ وتكەن 2023 جىلعا باعا بەرىپ، 2024 جىلعا قاتىستى ءوز ويىن ورتاعا سالادى. سۇحباتتا نە ايتىلىپ، نە قويعاندىعى جونىنەن وقىرماندارىمىزدى قۇلاعدار ەتكەندى ءجون كوردىك.

وتكەن جىلعا قاتىستى:

«2023 جىل ەلىمىز ءۇشىن ماڭىزدى وقيعالارعا تولى جىل بولدى. ءبىز نەگىزگى ساياسي رەفورمالاردى اياقتاپ قالدىق. كونستيتۋتسيالىق سوت جۇمىسىن باستادى...

ءبىز ءادىل جانە باسەكەلى ەكونوميكا جۇيەسىن قۇرۋعا كىرىستىك. ەكونوميكانى ءارتاراپتاندىرۋ جانە مونوپوليادان ارىلتۋ، ينفراقۇرىلىمدى جاڭعىرتۋ، بيزنەستى قولداۋ، ينۆەستيتسيا تارتۋ جۇمىستارىمەن مىقتاپ اينالىستىق.

وسى جۇمىستىڭ ءبارى 2024 جىلى دا جالعاسادى. ءبىز تياناقتى جانە جوسپارلى ارەكەت جاسايمىز، ماقساتقا جەتۋ ءۇشىن ۇزدىكسىز العا ۇمتىلامىز. بۇل – ايرىقشا ماڭىزدى جىل بولماق. ويتكەنى وسى كەزەڭ ەلىمىزدىڭ الداعى بەس جىلداعى دامۋىنا نەگىز بولادى»، - دەدى.

مەملەكەت باسشىسى ءوزىنىڭ 2024 جىلدان نە كۇتەتىنىن جانە ەلىمىزدىڭ الدىندا قانداي مىندەتتەر تۇرعاندىعىن اتاپ ءوتتى.

«مەن وتكەن قىركۇيەكتەگى جولداۋىمدا جاڭا ەكونوميكالىق ۇلگىگە كوشەتىنىمىزدى ايتتىم، 2029 جىلعا قاراي جالپى ىشكى ءونىمدى قازىرگىدەن ەكى ەسەگە ارتتىرۋ ماسەلەسىن باستى ستراتەگيالىق ماقسات رەتىندە بەلگىلەدىم. كوپ ۇزاماي ۇكىمەتتىڭ كەڭەيتىلگەن وتىرىسى وتەدى. وندا ەلىمىزدىڭ بىلتىرعى الەۋمەتتىك-ەكونوميكالىق دامۋ قورىتىندىسى شىعارىلىپ، الداعى جۇمىستىڭ امال-تاسىلدەرى ايقىندالادى.

ۇلتتىق قۇرىلتايدىڭ وتىرىستارى يدەولوگيا سالاسىنداعى ماسەلەلەردى، ۇلتتىڭ جاڭا ساپاسىن قالىپتاستىرۋ ءىسىن، قوعامنىڭ قۇندىلىقتار جۇيەسىن جاڭعىرتۋ جايىن تالقىلايتىن ءتيىمدى پىكىرتالاس ورنىنا اينالدى. بۇعان دەيىن جازدىگۇنى شاقىرىلىپ كەلە جاتقان قۇرىلتايدىڭ وتىرىسىن بيىل ءسال ەرتەرەك، كوكتەمدە وتكىزەتىن شىعارمىز.

وسىلايشا، بيىل ەكونوميكالىق، قوعامدىق-ساياسي جانە گۋمانيتارلىق سالالاردا اتقارىلاتىن جۇمىستىڭ نەگىزگى باعىت-باعدارى ءبىرىنشى توقساندا-اق ايقىندالادى», - دەدى.

پرەزيدەنت قاسىم-جومارت توقاەۆ 2023 جىلى نە ىستەلىنىپ، نە قويعاندىعى جايىندا قىسقاشا ايتا كەلە، 2024 اتقارىلۋى ءتيىس جۇمىستار جايىندا شاعىن شولۋ جاسادى.

ودان ارى قازاق قوعامىندا ورىن العان ماڭىزدى ساياسي-الەۋمەتتىك وقيعالارعا بايلانىستى ءوز پايىمداۋىن جاسادى. ناقتىلاپ ايتار بولساق: «قاسىرەتتى قاڭتار وقيعاسىنا»، «قوسارلانعان بيلىك» جۇيەسىنە»، «قاڭتار وقيعاسىنان» كەيىنگى مەملەكەت باسشىسى قولعا العان تۇبەگەيلى ساياسي رەفورمالارعا»، «قازاقستانداعى ساياسي تۇتقىندارعا»، «2026 جىلعى سايلاۋعا» قاتىستى قويىلعان ساۋالدارعا ناقتى جاۋاپ بەرىلدى. ەندى وسىلاردى قىسقاشا جىپكە تىزە كەتەيىك.

سۋرەت: الەۋمەتتىك جەلىدەن الىندى

قاسىرەتتى «قاڭتار وقيعاسى» تۋرالى:

«اشىعىن ايتسام، وسى جاڭا باعدارىمىز كەيبىر ىقپالدى ادامدارعا مۇلدە ۇناعان جوق. ولار بۇل وزگەرىستى ەلىمىزدە ابدەن تامىر جايعان جۇيەگە جانە بيلىك قۇرىلىمىنداعى وزدەرىنىڭ «ەرەكشە مارتەبەسىنە» تونگەن قاتەر دەپ قابىلدادى. مۇنداي ادامدار ەلدەگى وزگەرىسكە استىرتىن، كەيدە ءتىپتى اشىق قارسىلىق بىلدىرە باستادى. اقىر سوڭىندا رەفورمانىڭ بەتىن قايتارىپ، وزدەرىنە ىڭعايلى بۇرىنعى قالىپقا ورالۋ ءۇشىن ءبارىن تاس-تالقان ەتۋگە شەشىم قابىلدادى.

جوعارى لاۋازىمدى تۇلعالاردان تۇراتىن بۇل توپتىڭ كۇشتىك قۇرىلىمدارعا دا، قىلمىس الەمىنە دە وراسان زور ىقپالى بولدى. سوندىقتان بيلىكتى كۇشپەن باسىپ الۋعا بەل بۋدى»، - دەپ ءوز باعالاۋىن جاسادى.

سۋرەت: الەۋمەتتىك جەلىدەن الىندى

«قوسارلانعان بيلىك» جۇيەسى تۋرالى:

«بازبىرەۋلەر قوسارلانعان بيلىك جۇيەسىن ورناتۋعا تالپىنعانى، ءتىپتى، مۇنداي ارەكەتتەردى ادەيى ءارى مۇقيات ۇيىمداستىرعانى راس. «بيلىك ءترانزيتى» كەزىندەگى احۋالدى ساياساتتاعى ايلاكەرلەر ءوز مۇددەسىنە پايدالانىپ، قوسامجارلانعان بيلىك ورتالىعىن قۇرۋعا تىرىستى. ەلىمىزدە پرەزيدەنت ءارى جوعارعى باس قولباسشى لاۋازىمى ءبىر بولەك، بۇرىنعى پرەزيدەنت يەلەنگەن قاۋىپسىزدىك كەڭەسىنىڭ توراعاسى لاۋازىمى ءبىر بولەك بولدى. وسى ەكى لاۋازىمنىڭ يەلەرى ءبىر مەزەتتە قاتار قىزمەت اتقاردى. ءتۇپتىڭ تۇبىندە بۇل جاعدايدىڭ بيلىكتە قاتاڭ تەكەتىرەس تۋعىزباي قويماسى انىق ەدى»، - دەپ جاۋاپ بەردى.

سۋرەت: الەۋمەتتىك جەلىدەن الىندى

ۇقشۇ بىتىمگەرلىك كۇشتەرىن شاقىرۋ تۋرالى:

«ۇقشۇ بىتىمگەرلىك كۇشتەرى لاڭكەستىككە قارسى وپەراتسيالارعا قاتىسقان جوق، بىردە-ءبىر وق اتقان جوق. ارمەنيا جاساعى «اقساي» نان زاۋىتىن جانە «الماتى سۋ» مەكەمەسىن، بەلارۋس جاساعى جەتىگەندەگى اەرودرومدى، تاجىكستان مەن قىرعىز رەسپۋبليكاسىنىڭ اسكەري قىزمەتشىلەرى الماتى قالاسىنىڭ ءبىرىنشى جانە ەكىنشى جىلۋ ەلەكتر ورتالىقتارىن، رەسەي جاساعى ءۇشىنشى جىلۋ ەلەكتر ورتالىعى مەن تەلەكوممۋنيكاتسيا نىساندارىن كۇزەتتى. وسى ماڭىزدى نىساندارعا لاڭكەستىك شابۋىلدار جاسالۋى مۇمكىن دەگەن قاۋىپ بولدى. سوندىقتان بىتىمگەرلىك كۇشتەر سولاردى كۇزەتۋگە جىبەرىلدى. ەڭ باستىسى، سول ارقىلى ءوز كۇشتەرىمىزدى لاڭكەستىككە قارسى وپەراتسياعا جۇمىلدىرۋعا مۇمكىندىك تۋدى»، - دەپ جاۋاپ بەردى.

«قاڭتار وقيعاسىنان» كەيىنگى ساياسي رەفورمالار تۋراسىندا:

«مەن ساياسي رەفورمالاردىڭ 2019 جىلى باستالعانىن ايتىپ ءوتتىم. سول كەزدە ۇلتتىق قوعامدىق سەنىم كەڭەسى قۇرىلدى. كەڭەستە ماڭىزدى زاڭنامالىق باستامالار ازىرلەنىپ، جۇزەگە اسىرىلدى. سايلاۋ، ساياسي پارتيالار، پارلامەنت تۋرالى زاڭدارعا ەلەۋلى وزگەرىستەر ەنگىزىلدى. ەلىمىزدە وليگوپوليانىڭ ديكتاتۋراسى تۋرالى العاش رەت اشىق ايتىلا باستادى.

بۇل وزگەرىستەر ساياسي جانە ەكونوميكالىق مونوپوليا ۇستەمدىك قۇرىپ تۇرعان كەزدە جالعاندى جالپاعىنان باسىپ جۇرگەندەرگە قاۋىپ ءتوندىردى. سوندىقتان ولار ۋاقىت تەگەرشىگىن كەرى اينالدىرىپ، بۇرىنعى كۇنىنە ورالۋ ءۇشىن جانتالاسىپ باقتى. بۇدان ەش ناتيجە شىققان جوق»، - دەپ كوپ نارسەنىڭ باسىن اشا ءسوز ەتتى.

قازاقستانداعى ساياسي تۇتقىندار ماسەلەسىنە بايلانىستى:

«مەملەكەتتىڭ باستى مىندەتىنىڭ ءبىرى – زاڭنىڭ مۇلتىكسىز ورىندالۋىن، ءتارتىپتىڭ قاتاڭ ساقتالۋىن تولىق قامتاماسىز ەتۋ. سوندىقتان زاڭ بۇزعان كەز كەلگەن ادام جاۋاپقا تارتىلادى. ال زاڭ مەن ءتارتىپتى ساقتاۋ ماسەلەسىنە ازاماتتاردىڭ يدەولوگيالىق ۇستانىمى مەن ساياسي كوزقاراسىنىڭ ەش قاتىسى جوق. زاڭ بارىنە ورتاق.

كەيبىرەۋلەر پروكۋراتۋرا ورگاندارىنىڭ ەسكەرتۋىنە قاراماستان، ادام ءتۇسىنىپ بولمايتىن كەسىرلىك كورسەتىپ، زاڭ بۇزادى. ونداي ادامدار ءوزىن زاڭنان جوعارى قويىپ، «اتىڭ شىقپاسا، جەر ورتە» دەگەن ۇستانىممەن ەلگە تانىمال بولعىسى كەلەتىن سياقتى.

كوپتەگەن تاۋەلسىز بۇقارالىق اقپارات قۇرالى جۇمىس ىستەپ تۇرعان، ساياسي تسەنزۋرا اتىمەن جوق ەلدە ساياسي قۋدالاۋ بار دەۋ قانشالىقتى ورىندى؟»، - دەپ ءوز ءۋاجىن ءبىلدىردى.

2026 جىلعى سايلاۋ تۋرالى:

«الەۋمەتتىك جەلىدە پرەزيدەنت كونستيتۋتسياعا قاتىستى رەفەرەندۋم وتكىزىپ، 2026 جىلى تاعى دا سايلاۋعا ءتۇسۋدى جوسپارلاپ وتىر دەگەن قاۋەسەت تاراپ جاتىر. بۇل راس پا؟» دەگەن ساۋالىنا:

«بۇل – جالعان اقپارات. بۇدان بىلاي اركىم ويىنا كەلگەنىن ىستەپ، اتا زاڭعا وڭدى-سولدى وزگەرىس ەنگىزە المايدى. ال وسىنداي ماڭىزدى ماسەلەگە كەلگەندە، ءتىپتى مۇمكىن ەمەس. مەن بۇعان نىق سەنىمدىمىن. كونستيتۋتسيالىق رەفورما اتا زاڭعا قالاي بولسا سولاي وزگەرىس ەنگىزە بەرۋ ءۇشىن جاسالعان جوق.

پرەزيدەنت لاۋازىمىنا ءبىر-اق رەت سايلانۋ تۋرالى ەرەجە ەندى ەشقاشان وزگەرمەيدى. بۇل تالاپ مەملەكەتىمىزدىڭ تاۋەلسىزدىگى، بىرتۇتاستىعى، اۋماقتىق تۇتاستىعى جانە باسقارۋ نىسانى تۋرالى نورمالار سياقتى مىزعىماستاي ەتىپ بەكىتىلگەن», - دەدى پرەزيدەنت.

مەملەكەت باسشىسى قىركۇيەكتەگى جولداۋىندا ۇكىمەتكە ەكونوميكالىق جوبالاردى انىقتاۋ جانە ينفراقۇرىلىمدى دامىتۋ جوسپارىن ازىرلەۋ تۋرالى تاپسىرما بەرگەن بولاتىن.

سول مىندەتتىڭ ءبىرى – اۋقىمدى ونەركاسىپ جوبالارىن جۇزەگە اسىرۋ بولسا، ەكىنشى ءبىر ماڭىزدى مىندەت – ينۆەستيتسيا تارتۋ ەدى. وسىلاردىڭ جۇزەگە قالاي اسىرىلاتىنىن ءسوز ەتە كەلگەن پرەزيدەنتىمىز ارى قاراي:

«ءسىزدىڭ سۇراعىڭىزعا جاۋاپ بەرە وتىرىپ، مىنا ماسەلەگە نازار اۋدارعىم كەلەدى. الەمدەگى ەكونوميكالىق احۋال ءبىزدىڭ ەلگە دە سالقىنىن تيگىزەتىنى ءسوزسىز. الايدا كەز كەلگەن قيىندىق جاڭا مۇمكىندىككە جول اشادى. ۇكىمەتتىڭ جەل قايدان سوقسا دا جەلكەندى وزىنە وڭتايلى بۇرا الاتىنداي، جان-جاقتى ويلاستىرعان جوسپارى بولۋعا ءتيىس. ەكونوميكانىڭ ءوسىمىن ىنتالاندىرۋ شارالارى مەن قۇرىلىمدىق رەفورمالار قاتار ءجۇرۋى كەرەك. ناقتىراق ايتساق، كاسىپكەرلىك پەن باسەكەنى دامىتۋ، جەكەمەنشىكتى قورعاۋ، ءادىل سوت تورەلىگى بولۋى وتە ماڭىزدى. سوندا عانا كوزدەگەن ماقساتتارىمىزدىڭ بارىنە قول جەتكىزىپ، بەلگىلەنگەن مەرزىمدە ۇلتتىق ەكونوميكا كولەمىن ەكى ەسە ۇلعايتا الامىز»، - دەپ تۇيىندەدى.

حالىقتىڭ قارىزدانۋى تۋرالى:

وسى سۇحباتتا «حالىقتىڭ قارىزعا باتۋى كۇردەلى ماسەلەسى» نازاردان تىس قالمادى. وسىعان قاتىستى مەملەكەت باسشىسى: «سول ءۇشىن ناقتى شارالار قولعا الىنىپ جاتىر. مىسالى، سوڭعى جىلدارى بانكتەر مەن ميكروكرەديت ۇيىمدارىنا قويىلاتىن تۇتىنۋ نەسيەسى كاپيتالىنىڭ كولەمىنە قاتىستى تالاپتار بەس ەسە كۇشەيتىلدى. تولەۋ مەرزىمى ءوتىپ كەتكەن بەرەشەگى بار ادامدارعا نەسيە بەرۋگە تىيىم سالىندى. سونداي-اق قارىزىن ۋاقتىلى وتەي الماعان بورىشكەرگە 90 كۇننەن ءارى ايىپپۇل سالۋعا بولمايدى. كوللەكتور اگەنتتىكتەرىنە تۇراقتى تەكسەرۋ جۇرگىزىلەدى. 

بورىشكەرلەر قۇقىعىن قورعاۋ ءۇشىن نەسيە بەرۋ تۋرالى زاڭناماعا ەنگىزىلەتىن تۇزەتۋلەر ازىرلەندى. بۇل وزگەرىستەر بانكتەرگە، ميكروكرەديت ۇيىمدارىنا جانە كوللەكتور اگەنتتىكتەرىنە تالاپتى ودان دا كۇشەيتە تۇسەدى. نەسيەلەردى كوللەكتور كومپانيالارىنا ساتۋدى شەكتەۋ ۇسىنىلادى. كوللەكتور كومپانيالارى قارىزدى وزىنە العان سوڭ ماسەلەنى رەتتەپ كورۋگە مىندەتتى بولادى. بانك ومبۋدسمەنىنىڭ وكىلەتتىگى دە كەڭەيتىلەدى. قازىر بۇل قۇجاتتى ءماجىلىس دەپۋتاتتارى قاراپ جاتىر. مەن بۇل باستامانى قولداۋعا دايىنمىن», - دەدى.

قىمباتشىلىق بەلەڭ الىپ، جۇمىسسىزدىق، وتىن-ەنەرگەتيكا كەشەنى ماسەلەسى وزەكتى بولا ءتۇستى وسى پروبلەمالار توڭىرەگىندە پرەزيدەنت:

«كەز كەلگەن ەلدىڭ ۇكىمەتى ستراتەگيالىق مىندەتتەرى مەن كۇندەلىكتى جۇمىسىن قوسا اتقارادى. بىزدە دە سولاي. ەڭ باستىسى، ءتيىمدى جوسپارلاۋ جانە رەسۋرستاردى ورىندى پايدالانۋ كەرەك», - دەدى.

«بۇكىل قازاقستانداعى ينجەنەرلىك ينفراقۇرىلىمدى تولىق جاڭعىرتۋ – وتە اۋقىمدى ءارى كۇردەلى مىندەت. بۇل ماسەلە بىرتىندەپ شەشىلىپ جاتىر. كوكتەم-جاز ايلارىندا ۇكىمەت پەن اكىمدىكتەر جىلۋ ماۋسىمىنا دايىن بولۋ ءۇشىن ءبىراز جۇمىس جاسادى. جاعدايى سىن كوتەرمەيتىن بىرقاتار نىساندى جوندەدى», - دەدى.

سۋرەت: الەۋمەتتىك جەلىدەن الىندى

اەس قۇرىلىسىنا قاتىستى:

«ەل ىشىندە اەس قۇرىلىسىنا ءۇزىلدى-كەسىلدى قارسىلىق ءبىلدىرىپ جاتقاندار دا بار. بۇل – تۇسىنىكتى جايت. كوپشىلىك سەمەي يادرولىق پوليگونىنىڭ قاسىرەتىن ۇمىتا قويعان جوق. مۇقيات نازار اۋدارۋدى قاجەت ەتەتىن باسقا دا كۇردەلى جايتتار بار. مىسالى، جوبانىڭ قۇنى مەن ەكولوگياعا اسەرىن قاپەردەن شىعارۋعا بولمايدى»، - دەپ ءوز پىكىرىن ءبىلدىردى.

وسى سۇحباتتا ەلدى الاڭداتقان باتىس پەن قىتاي جانە رەسەي تەكەتىرەسى دە نازاردان تىس قالعان جوق.

باتىس, قىتاي جانە رەسەي تەكەتىرەسى:

باتىس تۋراسىندا، قىتاي جايىندا ءھام رەسەي توڭىرەگىندە ءوز ويىن جيناقتاعان مەملەكەت باسشىسى:

«قازاقستان ءتيىمدى ءارى ساليقالى سىرتقى ساياسات جۇرگىزۋ ارقىلى ءوزىنىڭ ۇلتتىق مۇددەسىن قورعاپ، ستراتەگيالىق مىندەتتەرىن ورىنداپ كەلەدى. ءبىزدىڭ وزگەرمەيتىن ماقسات-مۇراتىمىز بار. بۇل – ەلىمىزدىڭ ەگەمەندىگى مەن اۋماقتىق تۇتاستىعىن ساقتاۋ، قازاقستان ازاماتتارىنىڭ قۇقىقتارى مەن مۇددەلەرىن قورعاۋ، ەكونوميكامىزدىڭ ورنىقتى دامۋىنا بارىنشا قولايلى جاعداي جاساۋ. مەن ون جىل سىرتقى ىستەر ءمينيسترى بولعاندا وسى باسىمدىقتاردى ايقىنداۋعا تىكەلەي اتسالىستىم. قازىرگىدەي اۋمالى-توكپەلى گەوساياسي جاعدايدا بىزگە شەتەلدىك سەرىكتەستەرىمىزدىڭ بارىمەن، اسىرەسە، كورشىلەرىمىزبەن ءوزارا ءتيىمدى ىنتىماقتاستىقتى دامىتۋ ماڭىزدى»، - دەپ ءوز تۇيىندەۋىن جاسادى.

سۋرەت: الەۋمەتتىك جەلىدەن الىندى

باتىس تۋراسىندا:

«تۇراقتى ءارى ءوزارا سەنىمگە نەگىزدەلگەن جوعارى دەڭگەيدەگى ديالوگتەر بولماسا، ايماقتاعى مەملەكەتتەردىڭ باسقا دا ىقپالدى ەلدەرمەن قارىم-قاتىناسىن قارقىندى دامىتۋى نەعايبىل ەدى. سوڭعى جىلدارى بۇل باعىتتا ءبىرشاما ىلگەرىلەۋ بار. اسىرەسە، ورتالىق ازيا مەملەكەتتەرى باسشىلارىنىڭ جىل سايىنعى كونسۋلتاتيۆتىك كەزدەسۋلەرى ناتيجەلى ءوتىپ كەلەدى», - دەدى.

سۋرەت: الەۋمەتتىك جەلىدەن الىندى

قىتاي جايىندا:

«ەلىمىزدە قىتايعا قاتىستى باياعى قاساڭ تۇسىنىكتەرگە نەگىزدەلگەن نەمەسە بىزگە سىرتتان تاڭىلعان ءجونسىز ۇرەي بولماۋعا ءتيىس. قازىرگى قىتاي – وتە جوعارى دامىعان، سونىڭ ىشىندە وزىق تەحنولوگيا سالاسىندا زور تابىسقا جەتكەن مەملەكەت. مۇنى بۇكىل الەم مويىنداپ وتىر. سوندىقتان شىعىستاعى كورشىمىزبەن ىنتىماقتا بولۋ، دوستىق قارىم-قاتىناس پەن ءوزارا سەنىمنىڭ ارتىقشىلىقتارىن ءتيىمدى پايدالانۋ قازاقستان ءۇشىن اسا ماڭىزدى»، - دەپ جۇرتتى اقىلعا شاقىرا ءسوز قوزعادى.

سۋرەت: الەۋمەتتىك جەلىدەن الىندى

رەسەي توڭىرەگىندە:

«رەسەي فەدەراتسياسىنىڭ الەمدىك ساياساتتا اسا ماڭىزدى ءرول اتقاراتىنىن جانە بۇۇ قاۋىپسىزدىك كەڭەسىنىڭ تۇراقتى مۇشەسى ەكەنىن ۇمىتپاعان ءجون. رەسەي پرەزيدەنتى ۆلاديمير پۋتين – سوزىمەن دە، ىسىمەن دە جاھاندىق احۋالعا ىقپال ەتەتىن تۇلعا. رەسەيدىڭ ۇستانىمىمەن بۇكىل الەم ساناساتىنى جاسىرىن ەمەس. بۇل مەملەكەتتىڭ قاتىسۋىنسىز دۇنيە جۇزىندە بىردە-ءبىر پروبلەما شەشىلمەيدى. ول ايدان انىق», - دەدى.

سۋرەت: الەۋمەتتىك جەلىدەن الىندى

نازارباەۆ تۋرالى:

وسى سۇحباتتا مەملەكەت باسشىسى نازارباەۆ داۋىرىنە ءوز پايىمداۋىن جاسادى:

«نۇرسۇلتان نازارباەۆ – بىرنەشە داۋىرگە كۋا بولعان تاريحي تۇلعا. ول ءوز مانسابىن كومسومول بەلسەندىسى رەتىندە حرۋششەۆ زامانىندا باستاپ، ارادا الپىس جىلدان استام ۋاقىت وتكەننەن كەيىن قىزمەتتەن كەتتى. قازاقستاننىڭ تاۋەلسىز مەملەكەت بولىپ قالىپتاسۋىنا قوسقان ۇلەسىن ءبارى بىلەدى. ول – ءادىل تاريحي باعاسىن الۋعا لايىق ادام», - دەدى.

ۇلتىمىز ءوسىپ-وركەندەسىن دەسەك، ءبىز جاقسىدان ۇيرەنىپ، جاماننان جيرەنە ءبىلۋىمىز كەرەك. قوعامدا ەڭبەكقورلىق پەن جاسامپازدىق جوعارى باعالانۋعا، بىلىمپازدىق پەن جاڭاشىلدىق سالتانات قۇرۋعا ءتيىس دەگەن ۇلاعاتقا تولى وسى جولعى سۇحباتتىڭ ءسوز ۇعار جانعا بەرەرى كوپ.

Abai.kz