يرانداعى 84 ادام قايتىس بولعان جارىلىستى «يسلام مەملەكەتى» تەرروريستىك ۇيىمى موينىنا الدى. وتكەن ءتۇنى اتالعان ۇيىم الەۋمەتتىك جەلىدەگى پاراقشاسىندا: «سارسەنبى كۇنى ەكى جيھادشى باۋىرىمىز يراننىڭ كەرمان قالاسىنداعى قاسىم سۇلەيمانيدىڭ مازارىنا بارىپ، جينالعان جۇرتتىڭ اراسىندا جارىلعىش زاتتى ىسكە قوستى», - دەپ جازدى.

سۇننيتەر اعىمىن ۇستاناتىن ولار قاندى ارەكەتتەرىن «بۇل اللانىڭ قالاۋى» دەپ، وزدەرىمەن بولەك باعىتتاعىلاردى، ونىڭ ىشىندە شيتتەر اعىمىن ۇستاناتىن يران مۇسىلماندارىن دا ايامايتىنىن ايتقان. سيريادان ىعىسقان تەرروريستىك ۇيىمنىڭ يراندا جارىلىس ۇيىمداستىرۋى ءبىر بۇل ەمەس. 2022 جىلى قازاندا مەشىتكە جينالعان جۇرتقا وق جاۋدىرىپ 15 ادام قازا تاپقان ەدى.

«يسلام مەملەكەتى» ۇيىمىنىڭ يرانعا جيھاد جاريالاۋى ءدىني باعىتتىڭ ۇقساماۋىنان بولەك، يراننىڭ ۇلتتىق باتىرىنا اينالعان، بۇدان ءتورت جىل بۇرىن اقش بيلىگى باعدات ماڭىندا درونمەن اتىپ ولتىرگەن قاسىم سۇلەيماني گەنارالعا دەگەن وشپەندىلىكتەن تۋىنداعان.

2011 جىلى سيرياداعى ساياسي ەرەۋىلدەر ىشكى سوعىسقا اينالعاندا سۇلەيماني باشار اسادقا اسكەري كومەك بەرىپ، بيلىگىن ساقتاپ قالۋعا كومەكتەسكەن. يراق پەن سيريا جەرىندەگى «يسلام مەملەكەتى» تەرروريستىك ۇيىمىنىڭ مۇشەلەرىنىڭ كوزىن جويۋدا دا ايرىقشا ەڭبەك كورسەتكەن. اق ءۇي سۇلايمانيدى يراننىڭ ورتا شىعىستاعى اسكەري ستراتەگياسىن ۇيىمداستىرۋشى ءارى جۇزەگە اسىرۋشى دەپ سانايدى.

2003 جىلى اقش اسكەرى يراققا باسىپ كىرگەندە سۇلەيماني يراق جيھاتشىلارىنا جەتەكشىلىك ەتىپ، شارلاۋعا شىققان امەريكا اسكەرلەرىنە كوپ ادام شىعىنىن كەلتىرگەن. سول كەزدە-اق اق ءۇي ونى ولتىرۋگە بۇيرىق شىعارعان.

ايماقتاعى قارۋلى قاقتىعىستاردا ەرەكشە اسكەري قابىلەتىمەن كوزگە تۇسكەن سۇلەيمانيدى پارسى جۇرتى ۇلتتىق باتىر رەتىندە ءپىر تۇتادى. 2020 جىلى ونىڭ جانازاسىنا ون مىڭداعان ادام جينالىپ، 56 ادام تاپتالىپ ءولىپ، 200 ادام جارالانعان ەدى.

Abai.kz