رەسەيلىك جۋرناليست تينا كاندەلاكي: «قازاقستاندا ورىس ءتىلى شەتتەتىپ جاتىر»، - دەپ جەرالەمگە جار سالدى.

«قازاقستان مەملەكەتتىك دەڭگەيدە ورىس ءتىلىن قىسىمعا الۋىن اقىرىنداپ جالعاستىرىپ كەلەدى. رەسپۋبليكانىڭ كولىك مينيسترلىگى بىرنەشە تەمىرجول ستانتسيالارىنىڭ اتاۋىن وزگەرتپەك. ورىسشا اتاۋلاردى قازاقشاعا اۋىستىرۋدى قولعا الماق. مىسالى، "ۋرالسك" ستانتسياسىن "ورالعا", "ۋزەن" ستانتسياسىن "جاڭاوزەنگە" جانە تاعى باسقالارىن وزگەرتۋدى ۇسىندى»،- دەپ جازدى كاندەلاكي.

ول قازاقستاننىڭ تاۋەلسىز مەملەكەت ەكەنىن جانە ءوز جەرىندەگى وبەكتىلەردىڭ اتىن ءوز تىلىندە ايتىپ، جازۋ ءۇشىن رەسەيدەن رۇحسات سۇرامايتىنىن ۇمىتىپ كەتكەن سىڭايلى. كاندەلاكي مۇنى قاۋىپتى ءۇردىس دەپ اتاپتى.

«بالتىق جاعالاۋى تاجىريبەسى كورسەتكەندەي، بۇل وتە قاۋىپتى ءۇردىس. ول جاقتا دا ءبارى ۇساق-تۇيەكتەن باستالىپ، ارتى ناعىز قاۋىپتى جاعدايعا جەتتى. ورىس مەكتەپتەرىن جاپتى، كەڭەس ەسكەرتكىشتەرىن الىپ تاستادى، ورىس تىلىنە تىيىم سالدى، اقىرىندا زەينەتكەرلەردى ايازعا قۋىپ شىقتى. مۇنداي كۇماندى شەشىمدەردى العا تارتۋ ءۇشىن تاريحتىڭ ارتىنا تىعىلۋ اسىرەسە ىڭعايلى»، – دەيدى تينا كاندەلاكي.

ەسكە سالساق، بۇعان دەيىن دە تالاي ورىس مەدياسىنىڭ وكىلدەرى، ساياساتكەرلەرى قازاقستاننىڭ تاۋەلسىزدىگىنە كۇمان تۋدىراتىن پىكىرلەر ايتىپ ءجۇر. اسىرەسە وسڭعى بەس جىلدا بۇل تەندەنتسيا كۇش الدى. ەندى مىنە، تينا كاندەلاكي دە قازاقستانعا ءتىل تيگىزىپ قالۋدى ءجون ساناپتى.

مۇنداي ەل ىشىنە ىرىتكى سالاتىن، سوعىس شاقىراتىن پىكىرلەرگە قارسى قر سىرتقى ىستەر مينيسترلىگى ءبىر اۋىز جاۋاپ قاتۋى كەرەك!

Abai.kz