عىلىم، ءبىلىم، مادەنيەت، اقپاراتتىڭ كوپ شوعىرلانعان ورتالىعى الماتىعا مادەنيەت جانە اقپارات ءمينيسترى ايدا بالاەۆا مەن وقۋ-اعارتۋ ءمينسترى عاني بەيبەمباەۆ ارنايى كەلىپ، «قازاقستان بالالارى- شىعارماشىل ينتەلليگەنتسيا» وكىلدەرىمەن كەزدەستى.

ەكى ءمينستردىڭ جاڭاشىل، جاناشىر جوبا-جوسپارلارىمەن تانىستىق. كەرى بايلانىس ارقىلى كوكەيدەگى كوپ سۇراقتى ورتاعا سالدىق. «كەلىسىپ پىشكەن تون كەلتە بولمايتىنىنا» توقتادىق. «ءبىر جاعادان - باس، ءبىر جەڭنەن قول شىعارۋعا» دايىن ەكەنىمىزدى ايتتىق. سالالىق مينيسترلەرىمىزبەن وسىنداي وي ورتاقتاستىرىپ، ەل مۇددەسى ءۇشىن «قول ۇستاسىپ» جۇمىس جاسايتىن كۇن تۋعانىنا قۋاندىق.

ماعان ءسوز بەرىلدى. سوندا ايتقان ۇسىنىس-تىلەگىمنىڭ ءبىر پاراسى وسى بولدى...

سوناۋ 80-جىلداردىڭ باسىنان جانىمىز ۇندەسكەن، رۋحاني اپا-دوسىما اينالعان فاريزا وڭعارسىنوۆانىڭ «اق جەلكەندەگى» رەداكتورلىعىنا ابدەن قىزىعۋشى ەدىم. رەداكتسيا ورنى تەگىن، ۇجىم ۇلكەن، ءار كابينەتتە ءار ءبولىمنىڭ «ساربازدارى» ءوز جۇمىسىن دوڭگەلەتە بەرەتىن. كەيدە ءبىز ىزدەپ بارىپ، كۇنى بويى كۇتىپ وتىراتىنبىز. كولىگىنەن ءتۇسىپ، 10-15 مينۋتقا عانا كىرىپ شىعاتىن. رەكداكتوردىڭ جولساپارلارىن، ەمدەلۋىن، دەمالىسىن ۇكىمەت كوتەرەتىن. سوندا دا اپام قىزمەتىنە كوڭىلى تولماي «قازاقستان ايەلدەرى» جۋرنالىن بەرمەدى دەپ وكپەلەيتىن. ول نەنى بىلدىرەدى؟ ارينە، باس رەداكتورلىق - مانساپ بولعانىن...

ال قازىر ءبارى كەرىسىنشە. وقىماي-اق باي بولعانداردان باسقا قۇندىلىقتار قۇلدىراۋعا ۇشىرادى. سوندىقتان مەن سياقتى باس رەداكتورلاردىڭ قۇنى دا كوك تيىن. جان اياماي «ەل بالاسى – ءوز بالام» ۇرانىممەن نە ىستەسەم دە، ەسىل ەڭبەگىم قالىڭ قازاققا جەتپەيدى. قىرىق ءتورت جىلعى سانالى عۇمىرىم بالا جۇرەگىنە كىلت تاۋىپ; ءتىلىن، ويىن بايىتۋعا ارنالدى. «قازاق راديوسىنداعى» بالالارعا ارنالعان 4 ءتۇرلى باعدارلاما دايىنداعان 20 جىلدا – بالاعا نە كەرەكتىگىنە، قالاي ءتىل تابىسىپ سويلەتۋگە بولاتىندىعىنا ابدەن كوزىم جەتتى. 2000 جىلى ءوز كونتسەپتسياممەن جارىققا شىققان «ايگولەك» جۋرنالى سونىڭ جەمىسى.

ەندەشە 43 جىلدا ەكى-اق جەردە بالانىڭ رۋحاني تاربيەشىسى بولىپ، تاباندى «قۇلعا» اينالعان مەندەي تاجىريبەلى مامان سالالىق قوس مينيسترمەن باس قوسقاندا، وزدەرى ەلەپ، ەسكەرىپ، ءسوز بەرگەندە، ساۋساقپەن ساناعانداي ەتىپ، ۇسىنىس-پىكىر ايتپاعاندا قايتەدى؟!

«ءبارىمىزدىڭ يلەگەنىمىز - ءبىر تەرىنىڭ پۇشپاعى» بولعاندىقتان، جاس ۇرپاققا «جاڭا قازاقستان» ساناسىن قالىپتاستىرۋ ارقايسىسىمىزدىڭ ازاماتتىق پارىزىمىز. ءبىلىمدى ۇرپاق – مەملەكەتتىڭ تىرەگى. ولارعا نەگىزگى جانە پاتريوتتىق تاربيەنى وتباسىنان باستاپ قالىپتاستىرۋعا دا ءبىز ۇيتقى بولۋعا تۋرا كەلىپ تۇر. قالاي؟ رەسپۋبليكالىق تەلەارنالاردان «اتا-انالار ساعاتىن» ۇيىمداستىرساق. وقۋ-اعارتۋ مينيسترلىگىمەن بىرلەسە وتىرىپ، ەلدى ارالاپ، جاس ۇرپاق تاربيەسىنىڭ وزەكتىلىگىن تۇسىندىرسەك. «بۇگىنگى بالا - ەرتەڭگى دانا» بولۋى ءۇشىن وقىتا تاربيەلەۋدىڭ ءمانى زور ەكەنىنە كوز جەتكىزىپ، گازەت-جۋرنالدارعا جازىلۋ، كىتاپ ساتىپ الىپ وقىتۋ، بالاعا ماڭگىلىك ازىق، ادامشىلىق اسىل قازىنا بولاتىنىن ۇقتىرساق.

ءبىلىم جانە مەكتەپ باسشىلارى ءبىزدىڭ جۇمىسىمىزدىڭ وزدەرىنە پايدالىلىعىنا زور ماڭىز بەرسە. ويتكەنى ءبىز، گازەت-جۋرنال رەداكتورلارى، ناعىز ۇستازعا قولعانات ارىپتەسپىز. ءبىزدىڭ اپتا، اي سايىن شىعاراتىن قولىنا ۇستاتقان مەرزىمدى باسىلىمدارىمىز ساباققا كومەكشى قۇرال ەمەس پە؟! تالابىمەن تانىلىپ، «ايگولەكتە» توپ جارعان بالالار مەكتەبىنىڭ اتىن شىعارىپ، ۇستازىنا بەدەل اپەرەتىنىن تاجىريبەدەن كورىپ وتىرمىز. ال سول قاتارعا پەداگوگيكالىق ۇجىمدار، مەكتەپتەر مەن بالاباقشالاردىڭ مۇعالىمدەرى مەن تاربيەشىلەرى نەگە قوسىلمايدى؟

مۇعالىم كىتاپ وقىماي – وقۋشى كىتاپ وقىمايدى. بۇل مەنىڭ قاناتتى سوزگە اينالعان جان ايقايىم. بۇگىندە رەسپۋبليكاداعى جوو-دا 21 جۋرناليستيكا فاكۋلتەتى بار. سولاردىڭ بىرەۋىندە بالالار باسىلىمدارىنا مامان دايارلانبايدى. ونىڭ زاردابىن بۇگىن-اق كورىپ وتىرمىز.بالالار باسىلىمىندا جۇمىستى ءبىلىپ، قىزىعىپ ىستەيتىن جاس مامان جوق. جۇمىس ىزدەپ كەلگەندەرگە بالانى قايتسەم وقىتۋعا «توقتاتامىن» دەپ، اي سايىنعى 36 بەتتى قايتا-قايتا شۇقىلاپ، ينەمەن قۇدىق قازعانداي بەينەتپەن ىستەيتىن ءبىزدىڭ قىزمەت ۇنامايدى.

ابىرويىمىزدى سىيلاعانىمەن، تۇرمىسىمىزعا، تابىسىمىزعا قىزىقتىرا المايمىز. «بارلىق قاتەنى دە ءوزىڭىز تۇزەيسىز بە؟» دەپ كوزى باقىرايىپ، قاشىپ كەتكەندەر دە كەزدەسكەن.

ءسوز سوڭىندا ەكى بىردەي ءمينيسترىمىزدىڭ بالالار شىعارماشىل ينتەلليگەنتسياسىمەن كەزدەسۋى، جاڭاشىل، جاناشىر كوزقاراستارى، تىلەك-ۇسىنىستارىمىزدى تىڭداۋى – بىزگە مول رۋحاني شابىت بەردى. ءسوزىمىز جاقسى، ەندى ءىسىمىز دە جاقسى بولسا ەكەندەگەن ۇمىتتەمىز.

قىمبات ابىلداقىزى،

«ايگولەك» جۋرنالىنىڭ اۆتور- رەداكتورى،تۇركى الەمى اقپارات سالاسىنىڭ ۇزدىىگى، مەملەكەتتىك ەرەن ەڭبەگى ءۇشىن مەدالىنىڭ يەگەرى

Abai.kz