عىلىم جانە جوعارى ءبىلىم مينيسترلىگى مەن وكسفورد ۋنيۆەرسيتەتى اراسىندا ءوزارا ىنتىماقتاستىق كەلىسىمگە قول قويىلدى. كەلىسىم بويىنشا اتالعان وقۋ ورنىندا قازاق ءتىلىن وقىتۋ جوسپارلانىپ وتىر, دەپ حابارلايدى Ulysmedia.kz.

مينيستر ساياسات نۇربەك پەن ەلىمىزدىڭ جەتەكشى جوعارى وقۋ ورىندارىنىڭ باسشىلارىنان قۇرالعان دەلەگاتسيا ۇلىبريتانياعا بارىپ، وكسفورد بودليان كىتاپحاناسىنىڭ قازاقستانعا قاتىستى ەكسكليۋزيۆتى كونە قولجازبالارىمەن تانىستى.

ءىس-ساپار بارىسىندا ساياسات نۇربەك بريتاندىقتارعا مەملەكەت باسشىسى قاسىم-جومارت توقاەۆتىڭ تاپسىرماسىمەن دايىندالعان Oxford Qazaq سوزدىگىنىڭ العاشقى باسىلىمىن تانىستىردى.

«بودليان كىتاپحاناسىندا قازاقستانعا قاتىستى كونە قولجازبالار تانىستىرىلدى. ول كىتاپحانا – وتە ءىرى، رۋحاني وردالاردىڭ بىرەگەيى. بۇل رۋحانيات ورداسىندا تۇركى فيلوسوفى شەيح احمەد تارازيدىڭ «كەمەلدىك عىلىمى» قولجازباسىنىڭ جالعىز داناسى ساقتالعان. ال پرەزيدەنت قاسىم-جومارت توقاەۆتىڭ تاپسىرماسىمەن دايارلانعان Oxford Qazaq سوزدىگىنىڭ العاشقى باسىلىمىندا 60 مىڭنان استام ءسوز بار. ەڭبەكتىڭ ءوزى 1 300 بەتتەن تۇرادى،» – دەدى ساياسات نۇربەك.

داريعا ەرجانقىزى

Abai.kz