بۇگىن – ۇلتتىق باسىلىم كۇنى. 1913 جىلدىڭ 2 اقپانىندا ورىنبور قالاسىنان «قازاق» گازەتىنىڭ العاشقى سانى جارىق كورىپ، وقۋشى قاۋىمعا جول تارتتى. «قازاق» گازەتىنىڭ تۇڭعىش سانى جارىق كورگەن كۇن 2023 جىلى «ۇلتتىق باسىلىم كۇنى» بولىپ بەلگىلەندى.

سۋرەت: اقوردانىڭ ءباسپاسوز قىزمەتىنان الىندى

قۇرمەتتى ءباسپاسوز قىزمەتكەرلەرى!

بارشاڭىزدى ۇلتتىق باسىلىم كۇنىمەن شىن جۇرەكتەن قۇتتىقتايمىن!

سوناۋ 1913 جىلى، ءدال وسى كۇنى ەلىمىزدىڭ ءباسپاسوز سالاسىنىڭ باستاۋىندا تۇرعان «قازاق» گازەتىنىڭ العاشقى سانى جارىق كوردى. حالقىمىزدىڭ ءبىرتۋار پەرزەنتتەرى – الاش ارىستارى شىعارعان بۇل باسىلىم سىندارلى ساتتەردە ۇلتتى ۇيىستىرۋعا ايرىقشا ىقپال ەتتى.

ءسوز بوستاندىعىنا ادالدىعىنان اينىماعان باسىلىمدار ءاردايىم شىنايى اقپاراتتىڭ جانە ساپالى ساراپتامانىڭ قاينار كوزى بولىپ قالا بەرەدى. گازەت-جۋرنالدار زامانا تىنىسىن ءدوپ باسىپ، مەملەكەت پەن قوعامداعى قوردالانعان ماسەلەلەردى كوتەرەدى، ءتۇرلى كوزقاراستاعى وي-پىكىرلەردى جارىققا شىعارادى.

سونداي-اق جالپى ادامزاتقا ورتاق ىزگى قۇندىلىقتاردى دارىپتەيدى. ءباسپاسوز قىزمەتكەرلەرى كاسىبي بىلىكتىلىكتىڭ، وتانشىلدىق پەن جاۋاپكەرشىلىكتىڭ وزىق ۇلگىسىن كورسەتىپ كەلەدى. ءبىزدىڭ باسىلىمدارىمىز حالىقتىڭ بىرلىگىن نىعايتۋعا اتسالىسىپ، ادىلەتتى قازاقستاندى قۇرۋ ىسىنە ەلەۋلى ۇلەس قوسا بەرەدى دەپ سەنەمىن. سىزدەرگە زور دەنساۋلىق، باق-بەرەكە جانە شىعارماشىلىق شابىت تىلەيمىن!

قاسىم-جومارت توقاەۆ، قر پرەزيدەنتى

سۋرەت: jjtv.kz

قازاق ءباسپاسوزىنىڭ تاعىلىمعا تولى تاريحىندا بۇل كۇننىڭ ماڭىزى بولەك. سەبەبى ءدال وسى كۇنى ءاليحان بوكەيحانۇلى، احمەت بايتۇرسىنۇلى، مىرجاقىپ دۋلاتۇلى سەكىلدى ۇلت زيالىلارىنىڭ ەسىمىمەن ۇشتاسىپ جاتقان «قازاق» گازەتىنىڭ العاشقى سانى جارىق كوردى. سوندىقتان، وتكەن جىلى ۇكىمەت قاۋلىسىمەن 2 اقپان – ۇلتتىق باسىلىم كۇنى بولىپ بەكىتىلۋىنىڭ وزىندىك سيمۆولدىق ءمانى بار دەپ بىلەمىز.

ۇلت مۇددەسىن قورعاۋدا ۇلتتىق-ساياسي مىنبەرگە اينالعان «قازاق» گازەتى بولاشاققا دەگەن ۇلى مۇرات جولىندا بارشا حالىقتىڭ باسىن بىرىكتىردى. ۇلتتىق بىرلىك پەن ىنتىماقتىڭ ەرەن ۇلگىسىن كورسەتىپ، قازاق قوعامىننىڭ رۋحاني كەمەلدەنۋىنە ايرىقشا ىقپال ەتتى.

مەملەكەت باسشىسى «وتاندىق ءباسپاسوز ەلىمىزدىڭ تۇتاستىعى مەن تاتۋلىعىن نىعايتۋ جولىندا ەلەۋلى ءرول اتقارادى» دەپ اتاپ وتكەنىندەي، ءباسپاسوز قاشان دا ۇلتتىڭ ءۇنى، مەملەكەتتىگىمىزدىڭ تۇعىرى ىسپەتتى.

مادەنيەت جانە اقپارات مينيسترلىگى مەرزىمدى باسىلىمدارعا ۇدايى قولداۋ كورسەتىپ كەلەدى.

1991 جىلى ەلىمىزدە تەك 10 رەسپۋبليكالىق گازەت پەن جۋرنال جارىق كورىپ، 21 تەلە جانە راديوارنا ەفيرگە شىقسا، 2024 جىلعى قاڭتارداعى ەسەپ بويىنشا قازاقستاندا 5 804 باق تىركەلگەن، ونىڭ 3 985 – ءى مەرزىمدى ءباسپاسوز باسىلىمى، 212-ءى تەلەارنا، 90-ى راديو، 1 222-ءى اقپاراتتىق اگەنتتىكتەر جانە جەلىلىك باسىلىمدار.

گازەت-جۋرنالدارعا جازىلۋ ءىسى دە وڭتايلاندىرىلىپ، "قازپوشتا" جانە Kaspi Bank قوسىمشالارى ارقىلى ونلاين-جازىلۋ جۇمىستارى جۇيەلەندى.

وتكەن جىلى ايماقتارداعى مەرزىمدى باسىلىمدارىنىڭ جۇمىس دەڭگەيىن ارتتىرۋ ماقساتىندا ۇيىمداستىرىلعان وڭىرلىك باق فورۋمى بيىل دا جالعاسىن تابادى.

الەمدە بولىپ جاتقان جاڭا ترەندتەرگە قاراماستان، مەرزىمدى باسىلىمداردىڭ ءجونى بولەك، ماڭىزى ەرەكشە. سول سەبەپتى، ۇلتتىق مەديانى دامىتۋ، باسەكەگە قابىلەتتى بۇقارالىق اقپارات قۇرالدارىن قالىپتاستىرۋ، جۋرناليستەردىڭ مارتەبەسىن ارتتىرۋ – نەگىزگى ماقساتتارىمىزدىڭ ءبىرى. الداعى ۋاقىتتا وسى باعىتتا ءبارىمىز بىرلەسە جۇمىس ىستەي بەرەمىز دەپ ويلايمىن.

سوندىقتان وسى سالاعا قاتىسى بار بارشا قىزمەتكەرلەردى ۇلتتىق ءباسپاسوز كۇنىمەن تاعى دا قۇتتىقتايمىن! سىزدەرگە شىعارماشىلىق تابىس پەن سارقىلماس شابىت تىلەيمىن!

ايدا بالاەۆا، قر مادەنيەت جانە اقپارات ءمينيسترى

سۋرەت: aikyn.kz

بۇدان 111 جىل بۇرىن - 1913 جىلى 2 اقپاندا «قازاق» گازەتىنىڭ العاشقى سانى جارىق كورگەنى بەلگىلى. ونىڭ باستاۋىندا احمەت بايتۇرسىنۇلى، ءاليحان بوكەيحانۇلى، مىرجاقىپ دۋلاتۇلى سەكىلدى ۇلت زيالىلارى تۇردى.

قازاق زيالىلارى قۇرعان گازەت ۇلتتىق جاڭعىرۋدىڭ قاينار كوزى بولدى. سول سەبەپتى بىلتىر وسى داتا قر ۇكىمەتىنىڭ قاۋلىسىمەن ۇلتتىق باسىلىم كۇنى بولىپ بەكىتىلدى.

وي سالعان، قولداعان بارشا ازاماتتارعا مىڭ العىس. ۇلت ءسوزىن سويلەيتىن باسىلىمدارىمىز جاساي بەرسىن!

دارحان قىدىرالى، قر سەناتىنىڭ دەپۋتاتى

Abai.kz