مەملەكەتتىڭ قۋاتتىلىعى، بولاشاعى باسقا دا فاكتورلارمەن قاتار، حالقىنىڭ بىرلىگىمەن، تاتۋلىعىمەن، ءبىر-بىرىنە ريزاشىلىعىمەن انىقتالادى.

وسى ورايدا پايدا بولۋ تاريحىندا انىقتالعانداي، بارلىق ۇلت پەن ۇلىستى ءبىر شاڭىراق استىنا توپتاستىراتىن مەرەكە - «العىس ايتۋ» كۇنى يدەياسىنا تولىق ساي كەلىپ، قازاقستان حالقىنىڭ تاتۋلىعى مەن بىرلىگىن قامتاماسىز ەتۋگە باعاتتالىپ، مەرەكەلەنىپ جۇرمە دەگەن قوعامدى تولعاندىراتىن سۇراققا ءوز ويىمدى بىلدىرگىم كەلەدى. وسى مەرەكەدە قازاقستانداعى وزگە ەتنوس وكىلدەرى قيىن-قىستاۋ كەزەڭدە قۇشاق جايا قارسى العان كەڭپەيىل دە قوناقجاي قازاق حالقىنا العىس ايتىپ ريزاشىلىعىن بىلدىرەدى. بۇل قازاقتار مەيىرىمدى، دارحان حالىق رەتىندە ەلىمىزگە ەرىكسىز قونىس اۋدارعان ءتۇرلى ەتنوستارعا قامقور بولدى دەگەن ويدى قوعامدىق سانادا قالىپتاستىرىپ، قازاق حالقىنىڭ بويىندا ۇلتتىق ماقتانىش سەزىمىن كوتەرىپ، ەلىمىزدىڭ بۇگىنگىسى مەن بولاشاعىنا جاۋاپكەرشىلىك سەزىمىن ارتتىرادى. سونىمەن قاتار ەلىمىزدەگى وزگە ەتنوس وكىلدەرىنىڭدە قازاق حالقىنا مەملەكەت قۇرۋشى ۇلت رەتىندە قۇرمەتى ودان سايىن ارتادى.

مەملەكەتتىك، جەرگىلىكتى دەڭگەيدە رەسمي ورگانداردىڭ ۇيىمداستىرۋىمەن رەپرەسسيا مەن جەر اۋدارۋ جىلدارىندا ءبىزدىڭ حالىق كورسەتكەن مەيرىمدىلىك پەن اق كوڭىلدىككە، قولدا بارمەن ءبولىسۋ مەن كومەككە بۇگىندە ەلىمىزدەگى وزگە ەتنوستار العىس ايتىپ، مەرەكە رەتىندە كەڭىنەن اتالىپ وتۋدە.

بىراق حالىق اراسىندا بۇل مەرەكە مۇلدەم باسقا يدەيامەن، جالپى ادامگەرشىلىك تۇرعىسىندا اتالىپ ءوتىپ جاتىر. وقۋشى ۇستازعا، ءىنى اعاسىنا، بالاسى اناسىنا تۇرعىسىندا جالعاسىپ، العىستار جاۋدىرىلۋدا.

وكىنىشكە وراي رەسمي تۇردە دە العىس ايتۋ كۇنى مەرەكەسىنىڭ باستى يدەياسىنا ساي كەلمەيتىن شارالار اتالىپ وتۋدە. وعان مىسال وسى مەرەكەگە بايلانىستى  توتەنشە جاعدايلار كوميتەتى قىزمەتكەرلەرىنە ارنالعان «باتىرلارعا العىس» اكتسياسى، «التىن جۇرەك» مەموريالىندا باستاۋ العان «دارىگەرلەرگە مىڭ العىس» اكتسياسى سياقتى ەلىمىزدە وتكەن شارالاردى كەلتىرۋگە بولادى.

دەمەك تاريحي اقيقات بوپ سانالاتىن قازاق حالقىنىڭ سول كەزدەگى كەڭپەيىل، قوناقجاي، مەيىرىمدىلىگى جانە قيلى زاماندا تاعدىردىڭ جازۋىمەن ەلگە كەلگەن وزگە ەتنوس وكىلدەرىنىڭ ودان ءارى ءوسىپ وركەندەۋى قوعامدىق-تاريحي  سانادا ءالى تولىق قالىپتاسپاعان. ءبىز، ەلىمىزدە العىس ايتۋ كۇنىن باستى يدەياسىنا ساي مەرەكەلەگەندە عانا قوعامدىق-تاريحي سانا مەملەكەتىمىزدىڭ ساياساتىنا ساي وزگەرىپ، قازاقستان حالقىنىڭ بىرلىگىمەن تاتۋلىعى ودان ءارى نىعايادى.

مارات يسلاموۆ، 

مارات وسپانوۆ اتىنداعى باتىس قازاقستان مەديتسينالىق ۋنيۆەرسيتەتى، قوعامدىق-گۋمانيتارلىق پاندەر كافەدراسىنىڭ اعا وقىتۋشىسى، فيلوسوفيا دوكتورى (PhD) 

Abai.kz