شەرزود كۋدراتحۋجاەۆ – وزبەكستانداعى تانىمال ادامداردىڭ ءبىرى. ول ‑ جۋرناليستيكا جانە بۇقارالىق كوممۋنيكاتسيالار ۋنيۆەرسيتەتىنىڭ رەكتورى، وزبەكستاننىڭ بۇقارالىق ەلەكتروندى جانە كوممۋنيكاتسيالارى ۇلتتىق قاۋىمداستىعىنىڭ باسقارما توراعاسى.

سول شەرزود اكا كەشەلى-بەرى ك.ماركس ايتتى دەگەن: «ءوزى تۇرىپ جاتقان ەلدىڭ ءتىلىن ەكى ادام بىلمەيدى: ءبىرى – وككۋپانت، ەكىنشىسى – اقىماق»، - دەگەن ءسوزدى ايتامىن دەپ باسى داۋعا قالىپ وتىر.

ونىڭ وسى ءسوزىن رەسەي ۇكىمەتى وتە اۋىر قابىلدادى. رەسەي سىرتقى ىستەر مينيسترلىگى شۇعىل تۇردە: «ش.كۋدراتحودجاەۆ  وتە جاعىمسىز سوزدەرىمەن ەكى حالىقتىڭ اراسىنا وت جاعۋعا ۇمتىلدى»، - دەپ مالىمدەمە جاسادى.

ودان ءارى رف ءسىم بىلاي دەپ مالىمدەدى:

«كسرو قۇرامىندا بولعان وزبەكستان ءوندىرىسى مەن اۋىل شارۋاشىلىعىن، عىلىمى مەن مادەنيەتىن قارقىندى دامىتا الدى. بۇگىن دە وزبەكستان تاۋەلسىز مەملەكەت رەتىندە رەسەيمەن ءوزارا تەڭ دارەجەدە، ءوزارا قۇرمەتكە نەگىزدەلگەن قاتىناس ورناتتى. سوندىقتان، ءبىز ش.كۋدراتحودجاەۆتىڭ ءسوزىن وزبەكستان حالقى قولدامايدى جانە ول ءسوز وزبەكستاندىقتاردىڭ جالپى كوڭىل كۇيىن بىلدىرمەيدى دەپ سەنەمىز»، - دەپ، 14 اقپاندا وزبەكستاننىڭ رەسەيدەگى ەلشىسى بوتيرجان اسادوۆتى سىم‑گە شاقىرىپ الىپ، قولىنا ارنايى نوتا تاپسىردى.

ودان ءارى رەسەي ءسىم مينيسترلىگى: «ەگەر ول جەرگە «وكۋپانتتار» بارعان بولسا، وزبەكستان مۇنداي جەتىستىكتەرگە جەتە الماس ەدى»، - دەپ نىعىزداپ قويدى.

وعان ش.كۋدراتكوجاەۆ بىلاي دەپ جاۋاپ بەردى:

«ءيا، 1966 ج. جەر سىلكىنىسىندە تاشكەنت قاتتى قيرادى. وعان «كومەككە» رەسسەيدەن، بەلورۋسسيادان، ۋكراينادان وتە كوپ سوتتالعاندار كەلدى. ولاردىڭ باسىم بولىگى سو كۇيى وزبەكستاندا قالىپ قويدى. مىسالى، سو كەزدە تاشكەنت قالاسىندا تۇرعىن سانى جەر سىلكىنگەنگە دەيىن 300−400 مىڭ ادام شاماسىندا ەدى. سودان كەيىن ونىڭ سانى كۇرت ءوسىپ، ميلليون ادامعا جەتتى. سودان بەرى 60 جىلداي ۋاقىت ءوتتى. ال سول كەزدەرى كەلگەندەر ءالى دە وزبەك ءتىلىن ۇيرەنە المادى»، ‑ دەدى.

وعان روسسوترۋدنيچەستۆو توراعاسى ەۆگەني پريماكوۆ بىلاي دەپ جاۋاپ قاتتى:

«ش.كۋدراتحودجاەۆ «ول رۋسوفوب، اتا‑انادان دۇرىس تاربيە الماعان ءجاي ءبىر سوزقۋار». ول بىزدەن باس ءيىپ كەشىرىم سۇرامايىنشا، ءبىز ونىمەن جانە ول باسقاراتىن ورتالىقتارمەن بىرگە جۇمىس اتقارۋدان باس تارتامىز»، - دەدى...

الايدا، وتكەندە عانا، 2023 ج. قاراشا ايىندا وزبەكستان سىم‑گى رەسەيدىڭ وزبەكستانداعى ەلشىسى ولەگ مالگينوۆتى وزىنە شاقىرىپ الىپ، ەسكەرتۋ جاساعان بولاتىن. وندا «سپراۆەدليۆايا روسسيا» پارتياسىنىڭ وكىلى، جازۋشى زاحار پريلەپين «رەسەيگە جاڭا تەرريتوريالاردى قوسىپ الۋ كەرەك. سونىڭ ىشىندە، اسىرەسە، بىزگە وبىرەك كەلىپ جاتقان گاستاربايتەرلەر ەلىنىڭ جەرىن» دەگەن ءسوزى داۋدىڭ باسى بولعان بولاتىن.

ول كەزدە رەسەي سىم‑گى: «وي، سول دا ءسوز بە ەكەن، پريلەپيننىڭ ايتقانى ونىڭ «جەكە پىكىرى، مەملەكەتتىڭ ەمەس»، - دەپ سىرعىتا سالعان ەدى.

ەندى، مىنە،رەسەيلىكتەرگە «شەرزودتىڭ ءسوزى سوز‑اق ەكەن» دەگەندەي بولىپ قاپتى...

Abai.kz