رەسەي مەن باتىس ەلدەرىنىڭ، ۇجىمدىق باتىستىڭ قاراما-قايشىلىعى الەمنىڭ كوپتەگەن وڭىرلەرىندە جانە ءتۇرلى نىسانداردا ءجۇرىپ جاتىر، - دەپ جازادى Mezgil.kz.

زاكاۆكازە ءداستۇرلى تۇردە رەسەيدىڭ وڭتۇستىك تىرەگى جانە قالقانى بولىپ تابىلادى. قازىر وندا ايماقتان تىس ويىنشىلاردىڭ كومەگىمەن انتي-رەسەيلىك فاكتورلاردىڭ ءوسۋى قايتا كۇش الۋدا.

پرەمەر-مينيستر نيكول پاشينياننىڭ ارمەنيانىڭ ۇقشۇ-عا قاتىسۋىن «توقتاتۋ» تۋرالى رەزونانستى مالىمدەمەسىنە تۇسىنىكتەمە بەرە وتىرىپ، ارمەنيا پارلامەنتىنىڭ سپيكەرى الەن سيمونيان: «ۇقشۇ ءوزىن-ءوزى ءولتىردى جانە قازىر جۇمىس ىستەپ جاتىر دەپ ايتا المايمىز»، - دەپ مالىمدەدى.

«ءيا، ءبىز اۋەلى ۇقشۇ-عا سۇراق قويدىق جانە ول سۇراعىمىز جاۋاپسىز قالدى. ۇقشۇ-نىڭ جاۋاپكەرشىلىك اۋماعى قايدا دەپ سۇرادىق. ۇقشۇ ارمەنيا شەكاراسىن مويىنداي ما دەپ سۇرادىق. ارمەنيا ۇقشۇ-عا قانداي مويىندالعان تەرريتوريامەن قوسىلدى دەپ سۇرادىق. بۇل سۇراقتارعا ازىرگە جاۋاپ المادىق. مەنىڭ جەكە پىكىرىم: ۇقشۇ ءوزىن-ءوزى ولتىرگەن ۇيىم!»، - دەپ كەسىپ ايتتى.

سيمونيان: رەسەي، ەرەۆاننان كەت!

ال پرەمەر-مينيستر پاشينيان ءوزىنىڭ «France 24» اگەنتتىگىنە بەرگەن سۇحباتىندا: «... رەسەي بازاسى ارمەنيادا ۇجىمدىق قاۋىپسىزدىك تۋرالى شارت شەڭبەرىندە ەمەس. بۇل مۇلدە باسقا قۇقىقتىق ولشەم جانە بىزدە بۇل ولشەمگە جۇگىنۋگە نەگىز بولعان جوق»، - دەسە، ارمەنيا پارلامەنتىنىڭ سپيكەرى الەن سيمونيان: «رەسەيلىك شەكاراشىلار ەرەۆان اۋەجايىنان كەتۋى ءتيىس!»، - دەپ شورت كەتتى.

رەسەي فسب شەكاراشىلارى ەرەۆانداعى زۆارتنوتس اۋەجايىندا تۇراقتالعان. ارمەنيا پارلامەنتىنىڭ سپيكەرى سيمونيان رەسەيلىك اسكەريلەردەن ەلدەن كەتۋدى تالاپ ەتتى.

«ەگەر ولار سول جەردەن كەتىپ قالسا، دۇرىس بولار ەدى دەپ ويلايمىن. ولاردىڭ ەلىمىزدىڭ شەكاراسىن قورعايتىنىنا سەنىمىم جوق»، - دەدى ول.

رەسەي ەرەۆاننىڭ بۇل كەزەك-كەزەك مالىمدەمەلەرىن اۋىر قابىلدادى. «باتىس رەسەيدى وڭتۇستىك كاۆكاز ايماعىنان ىعىستىرۋ ساياساتىن جۇرگىزىپ جاتىر»، - دەپ ايىپتاپ، مالىمدەمە جاساعاندار قاتارىندا پاترۋشەۆ، گالۋزين جانە باسقا دا رەسەيلىك رەسمي تۇلعالار بولدى. قىسقا قايىرعاندا، رەسەيدىڭ كاۆكازدان ايىرىلۋ ءداۋىرى باستالدى. بىراق پاترۋشەۆ، گالۋزين جانە باسقا دا رەسەيلىك رەسمي تۇلعالاردىڭ بۇنى تۇسىنگىسى كەلىپ وتىرعان جوق.

Abai.kz