پۋتين 29-اقپاندا فەدەرالدى كەڭەسكە جولداۋ ارناپ، الداعى جىلدارى ىسكە اسىراتىن جوبالار مەن باعدارلامالارىن تانىستىردى، دەپ جازادى Mezgil.kz پورتالى.

ناۋرىزداعى سايلاۋدان كەيىن رەسەي باسشىسى اتالمىش باعدارلامالاردى ىسكە اسىرا باستاماق. Reuters باسىلىمى پۋتين ۋادە ەتكەن باعدارلامالارعا قانشا قاراجات كەتەتىنىن ەسەپتەپ شىقتى.

29-اقپانداعى جولداۋىندا پۋتين كەدەيلىكتى ازايتاتىنىن، حالىقتىڭ ءومىر ءسۇرۋ جاسىن ۇلعايتۋ باعدارلامالارىن ىسكە اسىراتىنىن، الەۋمەتتىك جاعدايدى جاقسارتاتىنىن ايتتى. ول وتباسى قۇندىلىقتارىنا، دەموگرافياعا قاتىستى جوبالار ۇسىندى. ەكونوميكانى ءارتاراپتاندىرۋ جايلى ءسوز قوزعاپ، شيكىزاتقا بايلانباعان ەكونوميكا قالىپتاستىرۋ بويىنشا ۇسىنىسىن كەلتىردى.

Astra Asset Management كومپانياسىنىڭ ينۆەستيتسيا بويىنشا ديرەكتورى  دميتري پولەۆويدىڭ ويىنشا بۇل باستامالاردى ىسكە اسىرۋ ءۇشىن بيۋدجەتتەن جىل سايىن 2 ترلن رۋبل قارجى ءبولىنۋى قاجەت. ال روسبانك ساراپشىلارى 6 جىلعا كەمى 15 ترلن رۋبل قاجەت دەگەن بولجامىن ايتۋدا.

ءپۋتيننىڭ باعدارلامالارىنىڭ ىشىندەگى ەڭ كوپ قارجىنى قاجەت ەتەتىنى ينفراقۇرىلىمدى جاقسارتۋعا قاتىستى ۇسىنىسى، ونىڭ قۇنى كەمى 4,5 ترلن رۋبل بولماق.

وتباسىلىق يپوتەكانى ۇزارتۋ ۇسىنىسىن ىسكە اسىرۋعا 1,5 ترلن رۋبل قاراجات كەتەدى. اتالمىش باعدارلاما ارقىلى رەسەي بيلىگى بالا تۋ كورسەتكىشىن ارتتىرۋدى ويلاستىرۋدا. ءپۋتيننىڭ اۋرۋحانالار سالۋ جانە ولاردى جابدىقتاۋ تۋرالى ۋادەسىن ىسكە اسىرۋعا 1 تريلليون رۋبل قاراجات قاجەت. ال مەكتەپتەر مەن بالاباقشالاردى مودەرنيزاتسيالاۋ جوباسى 400 ميلليارد ءرۋبلدى قۇرايدى. ساياباقتار مەن قوعامدىق ورىندارعا 360 ميلليارد، اۋەجايلارعا 250 ميلليارد، قوعامدىق كولىكتى جاڭارتۋعا 150 ميلليارد رۋبل ينۆەستيتسيا سالۋعا تۋرا كەلەدى.

ءپۋتيننىڭ ايتۋىنشا، مەملەكەت ەكونوميكانىڭ نەگىزگى سالالارىندا «تسيفرلىق پلاتفورمالاردى» قۇرۋعا 700 ميلليارد رۋبل جۇمسايدى. سونىمەن بىرگە 300 ميلليارد رۋبل hi-tech جوبالاردى دامىتۋ قورىنا قۇيىلادى، ال 116 ميللياردتى سپۋتنيكتەر مەن ينتەرنەت جەلىلەرىن جاقسارتۋعا سالماق. ايماقتاردىڭ قارىزىن كەشىرۋگە قوسىمشا 200 ملرد رۋبل كەتەدى.

2018 جىلى پۋتين سايلاۋعا تۇسكەن ساتتە 28 رلن رۋبل بولاتىن باعدارلامالار جايلى ايتقان بولاتىن. اتالمىش جوبالاردى ىسكە اسىرۋ ءۇشىن رەسەي بيلىگى ءتىپتى ققس-نى 18%-دان 20%-عا كوتەرگەن ەدى. الايدا ول جوبالاردىڭ باسىم كوپشىلىگى ىسكە اسپادى. ساراپشىلار ءپۋتيننىڭ فەدەرالدى كەڭەسكە ۇسىنعان جولداۋى 2018 جىلى ىسكە اسپاعان باستامالارى ەكەنىن اڭعارۋ قيىن ەمەس دەيدى. ءپۋتيننىڭ بۇل جولعى باعدارلامالارى 2018 جىلعى باعدارلامالارىنان الدەقايدا از قاراجاتتى قاجەت ەتەدى.

Abai.kz