ءساۋىر ايىنىڭ 24 كۇنى «قازاقستاندىق ەتنوديزاينەرلەر وداعى» قوعامدىق بىرلەستىگىنىڭ اتىنان قازاقستان رەسپۋبليكاسى ادىلەت ءمينيسترى ەسقاراەۆ ازامات نەسىپبايۇلى مىرزانىڭ اتىنا مىناداي اقپاراتتىق حات جولدانعان بولاتىن:

اقپاراتتىق حات

قۇرمەتتى ازامات نەسىپبايۇلى!

قازاقستان ادىلەت  مينيسترلىگى 2024 جىلى «قازاقستاندىق بابالار اماناتى ەتنوگرافيالىق ديزاين وداعى» اتتى قوعامدىق ۇيىمدى تىركەۋگە الىپتى. الايدا وسىعان دەيىن قر ادىلەت مينيسترلىگىندە «ەۋرازيالىق ەتنوديزاينەرلەر وداعى» جانە «قازاقستاندىق ەتنوديزاينەرلەر وداعى» قوعامدىق بىرلەستىگى» اتتى قوعامدى ۇيىمدار تىركەلگەن بولاتىن. ال، قازىر وسىنداي تاعى ءبىر ۇيىم ‑ «قازاقستاندىق بابالار اماناتى ەتنوگرافيالىق ديزاين وداعى» تىركەلگەن. ول ۇيىم ءوزىنىڭ اتالۋى بويىنشا 2023 جىلى تىركەۋدەن وتكەن ءبىزدىڭ «قازاقستاندىق ەتنوديزاينەرلەر وداعى» اتىن جاناما تۇردە قايتالاپ وتىر.

بۇل «قازاقستاندىق ەتنوديزاينەرلەر وداعى» قوعامدىق بىرلەستىگىنىڭ جۇمىسىنا كەدەرگىلەر كەلتىرۋدە. ويتكەنى، جاڭا تىركەلگەن «قازاقستاندىق بابالار اماناتى ەتنوگرافيالىق ديزاين وداعى» قوعامنىڭ اتاۋىن ءبىزدىڭ «قازاقستاندىق ەتنوديزاينەرلەر وداعى» قوعامدىق بىرلەستىگىنىڭ مۇشەلەرى «اتاۋى وزگەرتىلگەن ءبىزدىڭ قوعام» دەپ قابىلداپ، ول ءبىزدىڭ ىرعاقتى جۇمىسىمىزعا ەلەۋلى نۇسقان كەلتىرۋدە. ءبىز مۇشەلەرىمىزگە جانە ونەرسۇيەر قاۋىمعا «ونىڭ باسقا قوعام ەكەنىن» تۇسىندىرۋمەن ۋاقىت وتكىزۋدەمىز. ال، قازىرگى كەزدە، جاڭا اشىلعان «بىزبەن اتتاس قوعام» ءبىزدىڭ وتكەن جىلدارى اتقارعان جانە بيىلعى جىلدىق جوسپارىمىزدا كورسەتىلگەن ءىس‑شارالارىمىزدى قايتالاۋ ارقىلى ونەر ادامدارىن ءبىرشاما شاتاستىرۋدا.

ارينە، ءبىز ەلىمىزدە ونەردى دامىتۋدى ماقسات ەتكەن قوعامدىق ۇيىمداردىڭ بولۋىنا قارسى ەمەسپىز. الايدا ولاردى ينكۋباتور بالاپاندارىنداي ءبىر عانا اتاۋمەن، اتىنا ازداعان وزگەرىس ەنگىزۋ ارقىلى تىركەي بەرۋدى قولدامايمىز. سەبەبى، ونداي جاعدايدا، ەگەر قايسىبىر قوعام ونەرگە نۇسقان كەلەتىندەي، نە بولماسا، قر زاڭدارىنا قايشى ارەكەتكە باراتىنداي ارەكەتكە بارسا، وندا ونىڭ تەرىس ىقپالى وسى اتاۋداعى باسقا قوعامنىڭ دا بەدەلىنە زيانىن تيگىزەدى دەپ سانايمىز. بۇل مورالدىك تۇرعىدا زاڭعا ساي كەلمەيدى.

سوندىقتان، وسىنى ەسكەرە وتىرىپ، سىزدەن «قازاقستاندىق بابالار اماناتى ەتنوگرافيالىق ديزاين وداعى» قوعامدىق ۇيىمىنىڭ اتاۋىن قايتا قاراپ، ول ۇيىمدى باسقا اتىمەن قايتا تىركەۋدى وتىنەمىز.

قۇرمەتپەن: «قازاقستاندىق ەتنوديزاينەرلەر وداعى» قوعامدىق بىرلەستىگىنىڭ پرەزيدەنتى س.ا. جاپاروۆا. 

اقپاراتتىق حاتتىڭ سكرينى

***

مىنە، اراعا تارتىپتە بەلگىلەنگەن ۋاقىتتى اراعا سالىپ، 13.05.2024 كۇنى مينيسترلىكتەن جاۋاپ حات تا كەلدى. حاتتى ۇلكەن ۇمىتپەن وقي باستادىم. سەبەبى، حات العان كەزدە مينيسترلىكتەن ارنايى تەلەفون شالىپ، ونداعى مامان «مۇنداي اتاۋمەن تىركەلگەن ۇيىم ءبىزدىڭ تىزىمدە جوق» دەپ ايتقان ەدى. سودان، «ءبىزدىڭ جۇمىستى قايتالاپ، جوسپارىمىزدىڭ «ءوڭىن اينالدىرىپ» جاتقان بىزبەن اتتاس ۇيىمنىڭ «باسقىنشىلىق» ارەكەتىنە توقتاۋ بولاتىن بولدى‑اۋ» دەگەن ءۇمىت قۇشاعىندا ءجۇرىپ جاتتىق. بۇگىن ول ءۇمىتتى ادىلەت مينيسترلىگىنىڭ رەسمي تۇردە جىبەرگەن جاۋابى جوققا شىعاردى...

"قازاقستان رەسپۋبليكاسىنىڭ ادىلەت مينيسترلىگى" مەملەكەتتىك مەكەمەسى

قازاقستان رەسپۋبليكاسى 010000, ەسىل اۋدانى، ماڭگىلىك ەل داڭعىلى 8

10.05.2024 №زت-2024-03808681

«قازاقستاندىق ەتنوديزاينەرلەر وداعى» قوعامدىق بىرلەستىگىنە

 №زت-2024-03808681

«قازاقستاندىق ەتنوديزاينەرلەر وداعى» قوعامدىق بىرلەستىگى ادىلەت مينيسترلىگىنىڭ تىركەۋ قىزمەتى جانە زاڭ قىزمەتىن ۇيىمداستىرۋ دەپارتامەنتى ءسىزدىڭ 2024 جىلعى 22 ساۋىردەگى ارىزىڭىزدى قاراپ، كەلەسىنى حابارلايدى. «ادىلەت ورگاندارى تۋرالى» زاڭىنا سايكەس، ادىلەت ورگاندارىنىڭ مىندەتتەرىنىڭ ءبىرى زاڭدى تۇلعالاردى جانە فيليالدار مەن وكىلدىكتەردى ەسەپتىك تىركەۋ سالاسىندا مەملەكەتتىك ساياساتتى جۇزەگە اسىرۋ بولىپ تابىلادى. بيزنەس-سايكەستەندىرۋ نومىرلەرىنىڭ ۇلتتىق ءتىزىلىمىنىڭ مالىمەتتەرى بويىنشا «قازاقستاندىق ەتنوديزاينەرلەر وداعى» قوعامدىق بىرلەستىگى 18.08.2023 جىلى، «قازاقستاندىق بابالار اماناتى ەتنوگرافيالىق ديزاين وداعى» قوعامدىق بىرلەستىگى 20.03.2024 جىلى قازاقستان رەسپۋبليكاسىنىڭ قوعامدىق بىرلەستىق رەتىندە تىركەلدى. ازاماتتىق كودەكستىڭ (بۇدان ءارى - كودەكس) 38-بابىنا سايكەس زاڭدى تۇلعانىڭ ونى باسقا زاڭدى تۇلعالاردان اجىراتۋعا مۇمكىندىك بەرەتىن ءوز اتاۋى بولادى. زاڭدى تۇلعانىڭ اتاۋى ونىڭ اتاۋىن جانە ۇيىمدىق-قۇقىقتىق نىسانىن كورسەتۋدى قامتيدى. ول زاڭنامادا كوزدەلگەن قوسىمشا اقپاراتتى قامتۋى مۇمكىن. زاڭدى تۇلعا بەلگىلى ءبىر اتاۋمەن بيزنەس-سايكەستەندىرۋ نومىرلەرىنىڭ ۇلتتىق تىزىلىمىنە ەنگىزىلەدى. زاڭدى تۇلعانىڭ اتاۋى قازاقستان رەسپۋبليكاسىندا تىركەلگەن زاڭدى تۇلعالاردىڭ اتاۋىن تولىق نەمەسە ەلەۋلى بولىگىندە قايتالاماۋعا ءتيىس.

قولدانىستاعى زاڭنامانىڭ نورمالارىنا سايكەس زاڭدى تۇلعانى قۇرۋ تۋرالى شەشىمدى، ونىڭ اتاۋىن بەكىتۋدى قۇرىلتايشىلار قابىلدايدى. جوعارىداعىنىڭ نەگىزىندە، «قازاقستاندىق بابالار اماناتى ەتنوگرافيالىق ديزاين وداعى» قوعامدىق بىرلەستىگىن تىركەۋ كەزىندە، بۇدان بۇرىن تىركەلگەن «قازاقستاندىق بابالار اماناتى ەتنوگرافيالىق ديزاين وداعى» قوعامدىق بىرلەستىگىن زاڭدى تۇلعالاردىڭ اتاۋىن تولىق نەمەسە ونىڭ ەلەۋلى بولىگىندە قايتالاۋ تابىلعان جوق.

قۇقىقتار بۇزىلعان جاعدايدا ءسىز ازاماتتىق ءىس جۇرگىزۋ كودەكسىنىڭ 8-بابىنا سايكەس قورعاۋعا سوتقا جۇگىنۋگە قۇقىلىسىز. وسى جاۋاپپەن كەلىسپەگەن جاعدايدا، ءسىز وعان اكىمشىلىك راسىمدىك-پروتسەستىك كودەكستىڭ 91-بابىنا سايكەس سوتقا شاعىمدانۋعا قۇقىلىسىز.

ادىلەت مينيسترلىگىنىڭ تىركەۋ قىزمەتى جانە زاڭ قىزمەتىن ۇيىمداستىرۋ دەپارتامەنتىنىڭ ديرەكتورىنىڭ م.ا. ر.دوسانوۆا ب.اگيلمانوۆا 558833

قۇزىرلى مينيسترلىكتىڭ جاۋاپ حاتىنىڭ سكرينى

***

قازاق «قىزىقتىڭ كوكەسىن تۇيە سويعاندا كورەسىڭ» دەپ بەكەر ايتپاسا كەرەك... مۇندا دا سولاي بولىپ شىقتى. ياعني، شاعىمدانىپ وتىعان مەكەمە ‑ «قازاقستاندىق ەتنوديزاينەرلەر وداعى» قوعامدىق بىرلەستىگى. ول ءوز اتاۋىنىڭ قايتالانۋىنا نارازى.

ال، ادىلەت مينيسترلىگى «قازاقستاندىق بابالار اماناتى ەتنوگرافيالىق ديزاين وداعى» قوعامدىق بىرلەستىگىن تىركەۋ كەزىندە، بۇدان بۇرىن تىركەلگەن «قازاقستاندىق بابالار اماناتى ەتنوگرافيالىق ديزاين وداعى» قوعامدىق بىرلەستىگىن زاڭدى تۇلعالاردىڭ اتاۋىن تولىق نەمەسە ونىڭ ەلەۋلى بولىگىندە قايتالاۋ تابىلعان جوق» دەپ، اسپانعا ايدى شىعارىپتى. ءسويتىپ، «اسپاندا بۇرىننان تۇرعان «ەسكى اي» مەن ءبىز تىركەگەن «جاڭا اي» اراسىندا ەلەۋلى ايىرماشىلىق جوق» دەپ ۇكىم جاساپتى.

ارينە، قازاق «ەسكى اي ەسىركە، جاڭا اي جارىلقا» دەگەندە ايدى «ەسكى» جانە «جاڭا» دەپ بولەدى. بىراق، ول «ايلار» ءبىر عانا اي ەكەنىن تاعى بىلەدى... سەبەبى، اي بەتىندەگى سۋرەت بەدەرى وزگەرمەگەن قالپى...

ەندى، وسىنى «بىلمەي» وتىرعان ادىلەت مينيسترلىگىنە نە ايتۋعا بولادى؟

بۇرىنعى «ادىلەت» پەن جاڭا «ادىلەتتىڭ» اتىندا ەسكىنى قايتالاۋ جوق پا ەكەن دەيمىز بە، وندا؟

دۇرىس، بۇرىن «ادىلەت» ءسوز جۇزىندە بولدى... ەندى حالىق «ادىلەت» ءىس جۇزىندە بولادى دەپ قۋانىپ جاتىر...

ال، «ءىس جۇزىندەگى» بۇگىنگى «ادىلەت» بۇرىنعى «ادىلەتتەن» «ەلەۋلى ايىرماشىلىعىمىز جوق» دەپ «ءوز شىندىعىن» ايتىپ جاتىر دەيمىز بە؟..

بۇعان سەنەمىز بە، الدە، سوتقا بەرەمىز بە؟

ونى مينيسترلىكتەگى مامانداردىڭ وزدەرى دە ەسكەرتىپتى عوي: «سوتقا شاعىمدانۋىڭىزعا بولادى» دەپ...

قۇرمەتپەن: «قازاقستاندىق ەتنوديزاينەرلەر وداعى» قوعامدىق بىرلەستىگى پرەزيدەنتى سالتانات امينقىزى جاپاروۆا

Abai.kz