باق قىزمەتكەرلەرىن ماراپاتتاۋ راسىمىندە مەملەكەت باسشىسى قاسىم-جومارت توقاەۆ ەل ىشىندەگى جانە شەتەلدەگى ۆانداليزم دەرەكتەرى تۋرالى ايتتى.

مەملەكەت باسشىسى ەلىمىزدى تۇبەگەيلى جاڭعىرتۋ ءۇشىن زاڭنامالىق وزگەرىستەرمەن، كادرلىق شەشىمدەرمەن، ساياسي جانە ەكونوميكالىق رەفورمالارمەن عانا شەكتەلۋ ازدىق ەتەتىنىن ۇدايى ايتىپ جۇرگەنىن جەتكىزدى.

ونىڭ ايتۋىنشا، ءبىز پروگرەسسيۆتى ۇلت رەتىندە قوعامدىق جانە جەكە قۇندىلىقتار جۇيەسىن جاڭارتۋ ءۇشىن كوپ تەر توگۋىمىز كەرەك.

"بۇگىندە وتاندىق جۋرناليستيكا مىقتى قوعامدىق ينستيتۋتقا، ناعىز ءتورتىنشى بيلىككە اينالدى. بۇل سالانىڭ وسىناۋ ماڭىزدى ىسكە قوسار ۇلەسى زور. جۋرناليستەردىڭ الدىندا تۇرعان مىندەتتەردىڭ اۋقىمى – وتە كەڭ. ەلىمىزدە "تازا قازاقستان" اكتسياسىن قولداعان شىن مانىندەگى حالىقتىق قوزعالىس ءورىس الدى. بۇل كەزدەيسوق ەمەس. وكىنىشكە قاراي، تابيعات اياسىنداعى دەمالىس ورىندارىندا جانە ەلدى مەكەندەردىڭ اينالاسىندا ءۇيىلىپ جاتقان قوقىستى كۇن سايىن كورەمىز. بۇل – جاۋاپسىز ادامداردىڭ ءىسى. قوعامدىق ورىنداردا قاراپايىم تازالىق ەرەجەلەرى ساقتالمايدى. بۇدان ادامنىڭ تاربيەسىزدىگى عانا كورىنبەيدى، سونىمەن قاتار ول بۇكىل ەلىمىزدىڭ دامۋىن تەجەيدى. سوندىقتان دا مەن ءاردايىم وسى ماسەلەگە نازار اۋدارامىن", – دەدى پرەزيدەنت.

سۋرەت: aqorda.kz

Abai.kz