مينيستر بالاەۆا: لاۋازىمىنا، تانىمالدىلىعىنا زاڭ بارىنە ورتاق!
![](https://abai.kz/content/uploads/2024/07/64f2d1e1b97c4913357918.png)
اقپارات جانە قوعامدىق دامۋ ءمينيسترى ايدا بالاەۆا سوڭعى ەلدەگى بولىپ جاتقان جاعدايعا بايلانىستى ءوزىنىڭ فەيسبۋك پاراقشاسىنا ۇندەۋ جاريالادى. جازباسىندا مينيستر زاڭنىڭ بارلىق ادامعا ورتاق ەكەنىن ەسكەرتكەن. بۇل تۋرالى Abai.kz حابارلايدى.
"قۇرمەتتى دوستار! قوعامدى قارىشتاپ وسىرەتىن دە، تۇقىرتىپ وشىرەتىن دە - مادەنيەت. مادەنيەت تەك ونەر مەن ءبىلىم، وزات تالعام پەن تازالىك ەمەس. بۇل، ەڭ الدىمەن، ادامنىڭ ىشكى رۋحانياتى، حالىقتىڭ وركەنيەتتىك بولمىسى. ەندەشە، سول مادەنيەتتىڭ تۋىن كوتەرىپ، ونەردىڭ تاسىن ورگە دومالاتىپ جۇرگەن ءاربىر مايتالمان - ەلگە ۇلگى، قوعامعا باعدار بولۋى شارت.
وكىنىشكە وراي، سوڭعى كەزدە مادەنيەت سالاسىنداعى بەلگىلى ازاماتتارعا قاتىستى جاعىمسىز وقيعالار، كەيدە ءتىپتى زاڭسىز ارەكەتتەر جيىلەپ كەتتى. ارينە، جەكە-دارا ادام رەتىندە، قاراپايىم ازامات رەتىندە كىمگە بولسا دا پەندەشىلىك ءتان قاسيەت. ادام بولعان سوڭ قاتەلەسۋىڭ مۇمكىن، بىراق ونىڭ ارتى زاڭدى اتتاۋعا بارماۋى ءتيىس. ءوزىن ناعىز “مادەنيەت قايراتكەرىمىن” دەيتىن جان ءۇشىن تانىمالدىق زاڭسىزدىققا جول بەرەتىن قۇدىرەت ەمەس. ولار قاشاندا ۇلت مادەنيەتى دامۋىنىڭ قوزعاۋشى كۇشى سانالادى. سوندىقتان ولاردىڭ كوپكە ىقپالى تەك ونەگە، ناسيحات، جاقسىلىققا ارقاۋ بولۋى ءتيىس. مادەنيەت قايراتكەرلەرى زاڭ مەن ۇرپاق الدىنداعى وسىناۋ ۇلكەن جاۋاپكەرشىلىگىن ءتۇسىنۋى كەرەك. بۇل مەملەكەت باسشىسىنىڭ بارشا قازاقستاندىقتاردان تالاپ ەتىپ وتىرعان بىرەگەي ۇندەۋى. لاۋازىمىنا، تانىمالدىلىعىنا، قوعامداعى ورنىنا قاراماستان، زاڭ بارىنە ورتاق.
ال مەملەكەت وسى قاعيدانىڭ مۇلتىكسىز ورىندالۋىن قامتاماسىز ەتەتىن بولادى.
ءسوز جوق، ۇلى ابايدان بەرى كەلە جاتقان قوعامداعى ناداندىقپەن كۇرەستىڭ الدىڭعى شەبىندە مادەنيەت مايتالماندارى ءجۇرۋى ءتيىس. وسى ورايدا مەن بارشامىزدى وسىنى ۇمىتپاۋعا شاقىرامىن!
ءبىز قۇقىقتىق ءتارتىپ پەن ءوزارا قۇرمەتكە نەگىزدەلگەن ءارى مادەني قۇندىلىقتارىمىزدى قاستەر تۇتاتىن قوعامدى بىرگە قۇرا الامىز. جانە بۇل ءبىزدىڭ بولاشاعىمىزدىڭ بەرىك نەگىزى بولا الادى دەپ سەنەمىن", - دەپ جازىلعان جازبادا.
Abai.kz