قازاقستاندا ءتورت ءجۇز مىڭداي ازامات ازارت ويىندارىنىڭ سوڭىندا ءجۇر. ونىڭ جارتىسىنا جۋىعى جاستار. ءسۋيتسيدتىڭ 20 پايىزى قۇمار ويىنىنا، اجىراسۋلاردىڭ 40 پايىزى لۋدومانياعا بايلانىستى بولىپ جاتىر. ويىنقۇمارلىق جاس تاڭداپ جاتقان جوق.

پرەزيدەنت قاسىم-جومارت توقاەۆ:

- وسكەلەڭ ۇرپاقتىڭ دەنساۋلىعىنا الەۋمەتتىك كەسەلدەر زالالىن تيگىزەدى. شىلىم شەگۋگە، ىشىمدىككە جانە ەسىرتكىگە تاۋەلدى بولۋ كەڭىنەن تارالعان جاعىمسىز ادەتتەر. بۇعان قوسا، سوڭعى كەزدە جاستار اراسىندا لۋدومانيا، ياعني قۇمار ويىندارعا تاۋەلدىلىك بەلەڭ الۋدا. بۇل كەسەلدەن قۇمارپازداردىڭ وزدەرى عانا ەمەس، ولاردىڭ وتباسى، تۋىستارى مەن جاقىندارى زارداپ شەگەدى. جاسوپىرىمدەرىمىز زاماناۋي تەحنولوگيالاردىڭ ىقپالىمەن قۇمار ويىندارىنا وڭاي شىرمالاتىن بولدى. مەملەكەت بۇعان شەكتەۋ قويۋ ءۇشىن بىرقاتار ماڭىزدى شارا قابىلدادى. بىراق، بۇل شارالار ارينە، جەتكىلىكسىز. جاس ۇرپاقتى قۇمار ويىننىڭ زياندى ىقپالىنان جان-جاقتى قورعاۋىمىز كەرەك. ماسەلەنى شەشۋ ءۇشىن جاڭا تاسىلدەردى قولدانۋ قاجەت، - دەگەن ەدى.

بۇگىن پرەزيدەنت «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيا قىزمەتى، دەنساۋلىق ساقتاۋ، مەملەكەتتىك ەڭبەك ينسپەكتسياسى، مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.

زاڭ ارقىلى حالىقتىڭ ويىنعا تاۋەلدىلىگىن تومەندەتۋگە باعىتتالعان شەكتەۋشى جانە ىنتالاندىرۋشى نورمالار ەنگىزىلەدى. اتاپ ايتقاندا، قۇمار ويىندارعا/باس تىگۋگە قاتىسۋىنا تىيىم سالىناتىن ادامدار ساناتىنىڭ ءتىزىمى كەڭەيتىلدى. ەندى ولاردىڭ قاتارىنا بورىشكەرلەردىڭ بىرىڭعاي تىزىلىمىندە تۇرعان تۇلعالار (اتقارۋشىلىق ءىس جۇرگىزۋ بويىنشا بورىشكەرلەر تۋرالى مالىمەتتەردى قامتيتىن ەلەكتروندىق دەرەكتەر بانكى) قوسىلدى.

سونىمەن قاتار سىبايلاس جەمقورلىققا قارسى شەكتەۋ ەنگىزۋ ارقىلى جاۋاپتى مەملەكەتتىك لاۋازىمدى اتقاراتىن، مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادامداردىڭ، ولارعا تەڭەستىرىلگەن ادامداردىڭ قۇمار ويىندارعا/باس تىگۋگە قاتىسۋىنا شەكتەۋ قويىلادى.

بۇدان بىلاي مەملەكەتتىك قىزمەتشىلەر، اسكەري قىزمەتشىلەر، ارنايى جانە قۇقىق قورعاۋ ورگاندارىنىڭ قىزمەتكەرلەرى، بيۋدجەتتىك ۇيىمداردىڭ باسشىلارى قۇمار ويىندارعا/باس تىگۋگە قاتىسا المايدى. بۇل شەكتەۋدى ساقتاماعانى ءۇشىن ولاردى جۇمىستان شىعارۋ شاراسى قاراستىرىلعان. ويىن بيزنەسىن ۇيىمداستىرۋشىلاردىڭ قىزمەتىن رەتتەۋ تەتىكتەرى كۇشەيتىلدى. تۋريزم جانە سپورت مينيسترلىگى ويىن مەكەمەسىنىڭ، بۋكمەكەرلىك كەڭسەنىڭ، توتاليزاتوردىڭ، ستاۆكالاردى قابىلداۋ جانە قۇمار ءويىنداردىڭ/باس تىگۋدىڭ بىرىڭعاي ەرەجەلەرىن بەكىتەدى.

بۋكمەكەرلىك كەڭسەلەر مەن توتاليزاتورلاردىڭ جارنامالارىنا شەكتەۋ قويىلدى. اتاپ ايتقاندا، بۋكمەكەرلىك كەڭسەلەر مەن توتاليزاتورلاردى سىرتقى (كورنەكى) جارناماسىنا، سونداي-اق ولاردىڭ قىزمەتىن كولىك قۇرالدارىندا، بۇقارالىق اقپارات قۇرالدارىندا، كينو -, ۆيدەو-جانە انىقتامالىق قىزمەت كورسەتۋ ورىندارىندا جارنامالاۋعا تىيىم سالىنادى.

تەك بۋكمەكەرلىك كەڭسە نەمەسە توتاليزاتور ورنالاسقان جەردەگى سىرتقى جارناماعا; سپورت عيماراتتارىنىڭ ىشىندە جانە سپورتشىلاردىڭ كيىمىندە; سپورتتىق تاقىرىپقا ماماندانعان جانە رەسمي تىركەلگەن باق-تا، سونداي-اق وتاندىق تەلەارنالار حالىقارالىق سپورتتىق جارىستاردى تىكەلەي ترانسلياتسيا جاساعان كەزدە جارنامالاۋعا رۇقسات ەتىلەدى.

سونىمەن قاتار لوتەرەيا قىزمەتىن رەتتەۋ تەتىكتەرى جاڭارتىلدى. ناقتىراق ايتقاندا، تۇرعىن ۇيلەردە، جاتاقحانالاردا، عيبادات ۇيلەرىندە، مادەنيەت ۇيىمدارىنىڭ عيماراتتارى مەن قۇرىلىستارىندا، الەۋمەتتىك وبەكتىلەردە ء(بىلىم بەرۋ، دەنساۋلىق ساقتاۋ), سونداي-اق ولاردان ءجۇز مەتر قاشىقتىقتاعى راديۋستا لوتەرەيا بيلەتتەرىن تاراتۋعا جانە لوتەرەيا تەرمينالدارىن ورناتۋعا تىيىم سالىنادى. وسكەلەڭ ۇرپاقتىڭ دەنساۋلىعىن ەنەرگەتيكالىق سۋسىنداردىڭ زياندى سالدارىنان قورعاۋ ءۇشىن مۇنداي سۋسىنداردى 21 جاسقا دەيىنگى ادامدارعا ساتۋعا تىيىم سالىنادى.

قايرات بالابيەۆ

Abai.kz