تولاسسىز جاۋىننىڭ سالدارىنان وڭتۇستىكتى سۋ باسىپ جاتىر. جامبىل وبلىسى اكىمدىگىنىڭ ءباسپاسوز قىزمەتىنىڭ حابارلاۋىنشا جاڭاتاس قالاسىندا سۋ استىندا قالعان ۇيلەر سانى 47-گە جەتتى، تاعى 1 الەۋمەتتىك نىسان جانە 400 اۋلا اۋماعىن سۋ العان.

توتەنشە جاعدايلار دەپارتامەنتى اۋداندىق ماڭىزى بار جاناتاس-ساۋداكەنت اۆتوجولدى سۋ الۋىنا وراي جول جابىلعان.

“سۋ ايداۋ جانە جول توسەمىنىڭ توپىراعىن ارنايى تەحنيكامەن كوتەرۋ جۇمىسى جۇرگىزىلىپ جاتىر. سونداي-اق حالىققا كومەك كورسەتۋ بويىنشا جۇمىس ىستەلىپ جاتىر. ول ءۇشىن جەرگىلىكتى اتقارۋشى ورگاندار مەن توتەنشە جاعدايلار جانە پوليتسيا دەپارتامەنتتەردەن 231 ادام، 53 بىرلىك تەحنيكا، 24 موتوپومپا مەن درون جۇمىلدىرىلدى”، – دەلىنگەن حابارلامادا.

ابىروي بولعاندا زارداپ شەككەندەر جوق.

“زارداپ شەككەن حالىقتى قابىلداۋ ءۇشىن م.اۋەزوۆ مەكتەبىندە 45 ورىن جانە ورتالىق اۋرۋحانادا 60 ورىن دايىندالدى”، – دەپ قوستى تجد وكىلدەرى.

قازىرگى تاڭدا شىعىندى زەردەلەۋ بويىنشا جۇمىس توبى قۇرىلعان. بارلىعى 18 600 م3 سۋ سورىلىپ، جالپى 128 اۋلا مەن 47 ءۇيدىڭ ءىشى سۋدان تازارتىلدى. 

“جاڭاتاس قالاسىنداعى ەكى ەلدى مەكەن (مالوەتاجكا، دەگەرەس) جارىققا قوسىلدى. تەك د.قوناەۆ ورتا مەكتەبىندە سۋدان تازارتۋ جۇمىستارىنىڭ جۇرگىزىلۋىنە بايلانىستى جارىق ءالى بەرىلمەدى. 8 شىلدە، تاڭەرتەڭ ۇشقىزسىز ۇشۋ اپپاراتىنىڭ كومەگىمەن سۋ دەڭگەيىنىڭ ەداۋىر تومەندەگەنى انىقتالدى. ادام، مال شىعىنى جوق. زارداپ شەككەن تۇرعىندار ءۇشىن 105 ورىندىق ەكى قابىلداۋ پۋنكتى دايىندالىپ، وعان 12 ادام ورنالىستىرىلدى. قازىر ولار ءوز ەرىكتەرىمەن ۇيلەرىنە قايتارىلدى”، – دەلىنگەن حابارلامادا.

"جاڭاتاس–ساۋداكەنت" تاسجولى اشىق. توتەنشە جاعدايدىڭ سالدارىن جويۋعا ازاماتتىق قورعاۋ قىزمەتتەرىنەن 282 ادام، 64 تەحنيكا، 35 موتوپومپا جانە 1 ۇشقىزسىز ۇشۋ اپپاراتى جۇمىلدىرىلعان.

سۋرەت: جامبىل وبلىسى اكىمدىگىنىڭ ءباسپاسوز قىزمەتى

Abai.kz