ەلىمىزدە انا مەن بالا ەرەكشە قورعاۋعا الىنعان. انا مەن بالانىڭ قۇقىعىن قورعاۋ، الەۋمەتتىك جانە دەنساۋلىق جاعدايىن جاساۋ تۋرالى ءتۇرلى قورلار، كەڭەستەر مەن قوزعالىستار، قوعامدىق ۇيىمدار جۇمىس ىستەيدى.

بۇگىندە انا مەن بالانى قورعاۋدا «انالار ءۇيى» قوعامدىق قورى دا ءوز ۇلەسىن قوسىپ كەلەدى، دەپ حابارلايدى Abai.kz.

رەسپۋبليكا بويىنشا 19 قالادا 25 «انا ءۇيى» بار ەكەن. ولاردىڭ 4 الماتى قالاسىندا، قالعاندارى ەلىمىزدىڭ ءىرى قالالارىندا ورنالاسقان. العاشقى ءۇي استانا قالاسىندا پيلوتتىق رەجىمدە اشىلىپ، كەيىننەن تيىمدىلىگى ارتىپ ەلىمىزدىڭ بارلىق قالالارىندا ىسكە قوسىلىپتى.

الماتى قالاسىنداعى «انالار ءۇيىنىڭ» ۇيلەستىرۋشىسى امينات دجاپپۋەۆانىڭ ايتۋىنشا، قور ءبىر جىلدا 216 قىز-كەلىنشەككە كومەك كورسەتكەن.

- ارينە «انالار ءۇيى» تاعدىردىڭ تالكەگىنە ۇشىراعان انالارعا كومەك قولىن سوزۋ ءۇشىن اشىلعان. انالار دەپ نەگە ايتىپ وتىرمىن، ءبىز ەڭ الدىمەن بالاسى بار انالارعا كومەك ۇسىنامىز. ولاردىڭ جاس ەرەكشەلىگىنە قارامايمىز.

بۇگىندە الماتى قالاسىنداعى «انالار ۇيىندە» 10 انا مەن 7 بالا ورنالاسقان. قازىر ولارعا مەديتسينالىق، پسيحولوگيالىق، الەۋمەتتىك ءارى قۇقىقتىق كومەك كورسەتىلۋدە. ال ورتالىقتا تۇرۋ مەرزىمى — 6 اي. وسى ارالىقتا ءبىز بولاشاق انالاردى قوعامدىق ورتاعا بەيىمدەيمىز. ءبىز ەڭ ءبىرىنشى قىز-كەلىنشەكتەردىڭ تۋىستارىمەن سويلەسەمىز. ولاردىڭ قولداۋ كورسەتۋىن سۇرايمىز.

ءارى قاراي بىزدەگى ءاربىر انانىڭ اياعىنا تۇرىپ، ءوز ەركىمەن ومىرگە بەيىمدەلىپ كەتۋىنە سەپتىگىمىزدى تيگىزەمىز. اياعى اۋىر بولىپ قالعانىن جاقىندارىنان جاسىرىپ، پانا تاپپاي جۇرگەن جاس قىزدار دا بولادى. كەيبىرى ءتىپتى بالاسىنان باس تارتىپ جاتادى. ءبىزدىڭ مىندەتىمىز انا مەن بالانى ءبىر-بىرىنەن اجىراتپاۋ. سول ءۇشىن جاس اناعا بارىنشا بارلىق جاعىنان كومەك ۇسىنىلادى. كەيبىر انالار قىسقا مەرزىمدى كاسىپتىك كۋرستاردان وتەدى. تىگىنشى، شاشتاراز، مانيكيۋر ماستەرى سىندى كاسىپتى ۇيرەنەدى.

بىزدەگى انالار جاتىن ورىنمەن، ۋاقىتىلى تاماقپەن، كيىم-كەشەكپەن قامتاماسىز ەتىلەدى. سونىمەن قاتار قۇجات راسىمدەۋ جاعىنان تولىق كەڭەس الىپ، بالالارىن بالاباقشا كەزەگىنە قويۋ، اتاۋلى الەۋمەتتىك كومەككە تاپسىراتىن قۇجاتتاردى رەتتەۋ سىندى جۇمىستارمەن دە تولىق قامتىلادى، - دەدى.

«انالار ءۇيى» قورىنىڭ قۇرىلعانىنا بىلتىر 10 جىل تولىپتى. بۇگىنگە دەيىن الماتى قالاسىنداعى «انالار ءۇيى» 600 دەن استام انا مەن 500-دەن استام بالاعا كومەك قولىن سوزىپتى. قورعا كەلگەن جاس انالار، قىز-كەلىنشەكتەر قور كورسەتكەن كومەكتى الىپ، قوعامدىق ورتاعا بەيىمدەلدى. ەڭ باستىسى انامەن بالا بىرگە. كوپشىلىك «انالار ءۇيى» ناقتى كومەك كورسەتەتىنىن ءبىلدى.

«انالار ءۇيى» ۇيلەستىرۋشىسىنىڭ ايتۋىنشا، كاسىبىن اشىپ، ومىرگە بەيىمدەلگەن قىز-كەلىنشەكتەر دە قورعا راحمەتىن ايتىپ تۇرادى.

«ءبىزدىڭ كومەگىمىزبەن ءوز كاسىبىن اشقان قىزدار بار. بىراق ءبىز ناقتى سانىن جۇرگىزبەپپىز. ينتەرنەت ماگازين، اتەلە اشىپ كاسىپكەر بولىپ كەتكەندەر ءالى دە حابارلاسىپ تۇرادى. كەيبىرى تۇراقتى جۇمىس تاۋىپ، ءوز ماماندىعى بويىنشا جۇمىس ىستەپ جاتىر. بىزگە كەلەتىن قىزداردىڭ كوپشىلىگى وتباسىلىق زورلىق-زومبىلىققا ۇشىراعاندار. ودان بولەك جىگىتىنە الدانىپ قالعاندار. ءتىپتى ءوزىنىڭ جاقىن تۋىسىنان ءزابىر كورەتىندەر دە بار. بيىلدان باستاپ قاتاڭ زاڭ كۇشىنە ەندى. قۇقىق قورعاۋ ورگاندارى ەندى زورلىق كورسەتكەندەردى ايامايدى. سوندىقتان ەلىمىزدە انا مەن بالانى قورعاۋعا بارىنشا باسىمدىق بەرۋدە»، - دەدى امينات دجاپپۋەۆا.

قوردىڭ ماقساتى دا انا مەن بالانى جان-جاقتى قولداۋ ءارى قورعاۋ.

Abai.kz