كۇنى كەشە عانا قر سپورت جانە تۋرزيم مينيسترلىگى كۇللى جۇرتتان ءسۇيىنشى سۇراپ، قازاقستان پاريج وليمپياداسىنىڭ تاعى ءبىر ليتسەنزياسىن جەڭىپ العانىن حابارلاعان.

«قازاقستان پاريج وليمپياداسىندا تەننيستەن تاعى ءبىر ليتسەنزيا الدى. ارالاس جۇپتىق سىندا ەلەنا رىباكينا مەن الەكساندر بۋبليك ونەر كورسەتەدى. وليمپيادانىڭ ءبىرىنشى اينالىمىندا ولار امەريكالىق كوكو گاۋفف جانە تەيلور فريتسپەن كەزدەسەدى. بارلىعى ميكستە مەدال ءۇشىن 16 جۇپ تالاسادى. ال جارىس 29 شىلدەدە باستالادى. قازىر قازاقستاننىڭ تەننيستەن 6 ليتسەنزياسى بار. جەكەلەي سىندا ەلەنا رىباكينا، يۋليا پۋتينتسەۆا، الەكساندر بۋبليك جانە الەكساندر شەۆچەنكو ەل نامىسىن قورعايدى. جۇپتىق سىندا الەكساندر بۋبليك پەن الەكساندر نەدوۆەسوۆ، رىباكينا مەن بۋبليك. قازاقستان قۇراماسىندا سپورتتىڭ 25 تۇرىنەن بارلىعى 93 ليتسەنزيا (80 سپورتشى) بولدى»، - دەپ جازعان ەدى.

ۇلكەن تەننيستەن الەمدىك رەيتينتىڭ الدىنعى قاتارىندا كورىنىپ جۇرگەن رىباكينادان قازاقستان حالقى التىن، التىن بولماسا دا، جۇلدە كۇتتى. بىراق، كوپ ماقتاعان رىباكينا جەمە-جەمگە كەلگەندە پاريج وليمپياداسىنا قاتىسۋدان باس تارتتى.

اۋەلى حالىقارالىق تەننيس فەدەراتسياسى (ITF) ءبىر حابارلاپ، ەلەنا رىباكينانىڭ پاريج وليمپياداسىنا قاتىسپايتىنىن ايتتى.

ونان سوڭ قازاقستان تەننيس فەدەراتسياسى مالىمدەمە جاساپ، بۇل اقپاراتتى راستادى.

«ەلەنا رىباكينا قازىر «برونحيتپەن» سىرقاتتانىپ ءجۇر. دارىگەرلەر وعان جارىسقا قاتىسپاق تۇگىلى، ۇشاقپەن ۇشۋعا تىيىم سالدى. رىباكينا ويىندارعا قىزۋ دايىندالىپ، وليمپيادادا جاقسى ناتيجە كورسەتۋدى ويلاعان. دەنساۋلىعىنا بايلانىستى بۇل مۇمكىن بولماي تۇر»، - دەدى فەدەراتسيا.

رىباكينا نە دەيدى؟

بۇلاردىڭ ءىزىن الا رىباكينانىڭ ءوزى دە ءسوز ارنادى. رىباكينانىڭ ءسوزىن قازاقستان تەننيس فەدەراتسياسى جاريالادى. «قىمباتتى قازاقستاندىقتار! پاريج وليمپياداسىنا قاتىسا المايتىنىمدى وكىنىشپەن حابارلايمىن. ۋيمبلدون تۋرنيرىنەن كەيىن ءجىتى برونحيتپەن اۋىردىم. جاتتىعۋعا ورالۋعا ارەكەتتەنسەم دە، مەنىڭ اعزام تولىقتاي قالپىنا كەلگەن جوق. دارىگەرلەر كورتقا شىعۋىما قاتاڭ تىيىم سالدى.  پاريج وليمپياداسىندا ءبىزدىڭ قۇراما ءۇشىن ونەر كورسەتىپ، ەل ءۇمىتىن اقتاي المايتىنىم وتە وكىنىشتى.  

توكيودا مەدالعا قول سوزىم جەردە بولدىم. پاريجدە قازاقستان ءۇشىن التىن الۋعا مۇقيات دايىندالدىم. وكىنىشكە قاراي، اۋرۋ بۇل جوسپاردىڭ ورىندالۋىنا مۇمكىندىك بەرمەدى.  بارلىق قازاقستاندىق سپورتشىلارعا پاريجدە ساتتىلىك پەن تابىس تىلەيمىن. مەن ءبىزدىڭ بارلىق اتلەتتەرىمىزگە جانكۇيەر بولامىن، ولاردىڭ وليمپيادادا ەل نامىسىن ابىرويمەن قورعايتىنىنا سەنەمىن. العا، قازاقستان!»، - دەپ سويلەدى رىباكينا.

اياعىندا قر سپورت جانە تۋريزم مينيسترلىگى قورىتىندى مالىمدەمە جاساپ: «تەننيستەن قازاقستان ايەلدەر قۇراماسىنىڭ كوشباسشىسى ەلەنا رىباكينا XXXIII جازعى وليمپياداعا دەنساۋلىعىنىڭ ناشارلاۋىنا بايلانىستى قاتىسا المايدى. ونىڭ ۋيمبلدون تۋرنيرىنەن كەيىن تىنىس الۋ جولدارى قابىنىپ، ءىسىنىپ، اۋىرعان. سوعان قاراماستان ەلەنا دايىندالىپ، وليمپيا ويىندارىندا جوعارى ناتيجە كورسەتكىسى كەلدى. الايدا دارىگەرلەر وعان كورتقا شىعۋعا، ۇشۋعا تىيىم سالعان. قر تۋريزم جانە سپورت مينيسترلىگى سپورتشىنىڭ تەزىرەك ساۋىعىپ كەتۋىنە تىلەكتەستىك بىلدىرەدى. ءبىز ونىڭ الداعى جارىستارعا بۇدان مىقتى بولىپ ورالۋىن تىلەيمىز»، - دەپ جازدى.

دەسە دە، قازاقستان جۇرتى، وليمپيادادان جۇلدە كۇتكەن قاازاقستاندىق جانكۇيەرلەر تەننيسشى ەلەنا رىباكينانىڭ وليمپيادادان باس تارتقانىن سىناپ جاتىر. وعان سەبەپ تە جوق ەمەس، پاريج وليمپياداسىنا ءبىر اپتا قالعاندا تەننيسشى تۇركيانىڭ بودرۋم قالاسىندا دەمالىپ جۇرگەن فوتوسىن جاريالاعان ەدى.

رىباكينانىڭ باعىن جاققان - قازاق اقشاسى!

نۇرگەلدى ابدىعانيۇلى، جۋرناليست:

- سپورتتىڭ قىر-سىرىن بىلگەن مامان بولماساق تا، قازاقستاننىڭ كوك پاسپورتى ءناسىلى دە، نيەتى دە بولەك كەلىمسەكتەرگە وڭدى-سولدى شاشىلا بەرمەۋى كەرەك دەپ ايتتىق، سان رەت.

شەتەلدەن كەلگەن سپورتشىلاردىڭ كوزدەگەنى كوك پاسپورت ەمەس، كوك پاشكى اقشا. قازاقتىڭ اقشاسى.

مينيسترلىك ءبىر، فەدەراتسيا ەكى، رىباكينانىڭ ءوزى ءۇش شىعىپ، ءۇش قايتارا اقتالسا دا، جەكە ءوز باسىم ەلەنانىڭ ۋاجىنە دىم سەنبەدىم! ول قازاقتى، قازاقستاندى «قاداپ» كەتتى دەپ ەسەپتەيمىن!

رىباكينا رەسەيدە جۇرگەندە نەگىزگىلەردىڭ ساپىنان بولمادى. راس، جاقسى جاتتىقتى، جاقسى ناتيجە كورسەتتى. بىراق، ول باستى نازارعا شىعا المادى. ونى رەسەي كەرەك ەتكەن جوق. كوپتىڭ ىشىندە ءجۇردى. ونى رىباكينانىڭ اكەسى دە سان رەت اشىنىپ ايتقان. رىباكينانىڭ باعىن جاققان وتەمۇراتوۆتىڭ اقشاسى، انىعى قازاق اقشاسى! قازاقستاننىڭ كوك پاسپورتى. بىراق، جەمە-جەمگە كەلگەندە، رىباكينا كوك پاسپورتتىڭ نامىسىن قورعاۋدان باس تارتتى. «كەلىمسەكتە جىگەر جوق!» دەگەن وسى مىنە! كەلىمسەككە ءبارىبىر...

رىباكينانىڭ مالىمدەمەسى بۇل شۋدى باسۋعا كومەكتەسپەيدى!

رۋسلان مەدەلبەك، سپورت ءجۋرناليسى:

- رىباكينا پاريج وليمپياداسىنا قاتىسۋدان باس تارتتى. بۇگىن (كەشە-رەد.) پاريج ۋاقىتىمەن 16:00-دە العاشقى جاتتىعۋىن وتكىزۋى كەرەك ەدى. شىقپادى. جەرەبە دە وزگەردى. جانكۇيەرلەر شۋلاپ، سىن كوبەيگەن تۇستا قازاقستان تەننيس فەدەراتسياسى: «رىباكينا برونحيتپەن اۋىرىپ قالدى، جارىسقا قاتىسۋ بىلاي تۇرسىن ۇشۋىنا بولمايدى»، - دەدى. ارتىنشا رىباكينانىڭ جازباشا مالىمدەمەسى شىعىپ، كەشىرىم سۇراپتى. «ۋيمبلدوننان سوڭ اۋىرىپ قالدىم»، - دەيدى.

بۇل مالىمدەمەنىڭ ءبارى بۇل شۋدى باسۋعا كومەكتەسپەيدى. سەبەبى سپورتشى ءبىر اپتا بۇرىن بودرۋمدا دەمالىپ جۇرگەن فوتو/ۆيدەولارىن جاريالاعان. اۋىرىپ جاتسا، جەرەبە تارتىلىپ قويعان سوڭ نە ءۇشىن وليمپيادادان باس تارتتى؟ جاۋاپ جوق...

فەدەراتسيا، كوميتەت قايدا قاراعان؟ نامىس قايدا؟

اسەل ابىلبەك، جۋرناليست:

- رىباكينا قازاق ەلىنە، جانكۇيەرلەرىنە بەيجاي قارادى. دەنساۋلىعى بۇگىن ەمەس، باياعىدان سىر بەرگەن بولسا بىردەن ايتۋى كەرەك ەدى. نەگە 1 كۇن قالعاندا مۇنداي مالىمدەمە جاسايدى؟ بۇعان دەيىن فەدەراتسيا، كوميتەت قايدا قاراعان؟ نامىس قايدا؟

جانكۇيەرلەردىڭ ءۇمىتىن اقتامادى. وكىنىشتى! «وزىڭدىكىن وزەككە تەپسەڭ دە كەتپەيدى» دەيتىن ەدى. وزىمىزدىكى بولماعان سوڭ وسى.

ەلەنا لاقتىرىپ كەتتى...

انىق كوكەنايۇلى، سپورت ءجۋرناليسى:

- ءيا، ەلەنا رىباكينا پاريج وليمپياداسىنا قاتىسپايدى. قىسقاسى، سىن ساعاتتا لاقتىرا سالدى. ءوزىم سولاي قابىلدادىم. توكيو وليمپياداسىندا ويىننان باس تارتتى. ەشكىم ەشتەڭە دەمەدى. قىتايدا وتكەن ازيا ويىندارىنا قاتىسپاي، سول ەلدە ءوتىپ جاتقان تۋرنيرگە قاتىستى. ەل نامىسى سىنالىپ جاتقان ساتتە قاتىسپادىڭ دەپ ەشكىم ءۇن قاتپادى. پاريجدەن ءۇمىت كۇتىپ جۇرسەك، قاتىسپايدى دەپتى. بىردەڭە دەيتىن بىرەۋ تابىلا ما ەندى؟

رىباكينا - «جالدامالى جەندەت». ول ءوز پايداسمى ءۇشىن عانا ءجۇر!

سامات نۇرتازا، ءماجىلىس دەپۋتاتى:

- «باتىل جۇرەك» دەگەن فيلم ەستەرىڭىزدە مە؟ مەلل گيبسون وينايتىن. سوندا شوتلاندىقتاردىڭ جاعىندا ەرىكتى تۇردە سوعىسۋعا باراتىن «يرلاندىق» دەگەن ءبىر پەرسوناج بار.  سوندا انگليانىڭ «ۇزىنسيراق» كورولى جالداپ العان جالدامالى ۋەلس جەندەتتەرىمەن شوتلاندىقتار مايداندا جولىعاتىن ەپيزود بار. سول جەردە «يرلاندىقتى» كورگەن ۋەلس جەندەتتەرى شوتلاندىقتارمەن سوعىسۋدىڭ ورنىنا قۇشاقتاسا كەتەدى.

مىنە، رىباكينانى سول جالدامالى جەندەتكە تەڭەۋگە بولادى. ونىڭ ءرولى – سوعىساتىن (وينايتىن) جالدامالى جەندەت سەكىلدى. ول وزىنە ءتيىمدى ساتكە دەيىن ويناپ بەرەدى. وليمپيادا رىباكينا ءۇشىن ءتيىمدى ەمەس. ويتكەنى ول ءوزىن رەسەيلىك سەزىنەدى. سانكتسيالىق شەكتەۋلەر كەزىندە وزگە ەلدىڭ تۋىنىڭ استىندا ۋاقىتشا جۇرگەن رەسەي ازاماتشاسى. وعان قازاقستان تۋى بوتەن. وعان بولا رىباكينانى كىنالاۋدىڭ دا كەرەگى جوق. بۇل جەلدامالى جەندەتتىڭ لوگيكاسىنا ساي دۇنيە. اقشا ءۇشىن كۇرەسۋگە (ويناۋعا) بولادى. ال وزگە ەلدىڭ قورجىنىنا مەدال اكەلۋ – جالدامالى جەندەت ءۇشىن مۇمكىن ەمەس نارسە. بۇل ءبىزدىڭ سپورت سالاسىنداعى شەنەۋنىكتەر ءۇشىن جاقسى ساباق بولادى دەپ ۇمىتتەنەمىن!

Abai.kz