نۇرالى ءالىپ دەگەن فۋتبولشى بار. قازاقستاندىق فۋتبولشى. قازىر رەسەيدەگى «زەنيت» كلۋبىندا وينايدى.

سول ءالىپ الىپپەسىنەن جاڭىلىپ، قازاقستاندا قازاقشا سۇراق قويىپ، قازاقشا جاۋاپ تالاپ ەتكەن ءجۋرناليستى «حايپ جاسادى» دەپ ايىپتادى.

الگىندە فۋتبولدان قازاقستان ۇلتتىق قۇراماسىنا اتتاي قالاپ، رەسەيدەن باپكەر الدىرعانبىز. ستانيسلاۆ چەرچەسوۆ دەگەن مۇرتتى اعاي كەلىپ، «كەرەمەتتى كورسەتەمىن» دەپ ۋادە بەرگەن. باق وكىلدەرىمەن العاشقى جۇزدەسۋىندە سول ستانيسلاۆ چەرچەسوۆ قازاقستاننىڭ مەملەكەتتىك ءتىلىن مەنسىنبەي: «سۇراعىڭدى ورىسشا قوي، مەن قازاقشا بىلمەيمىن. مەن وسەتينمىن، ساعان وسەتينشە جاۋاپ بەرسەم، قالاي؟»، - دەپ اكىرەڭدەي سويلەگەن.

وسىلان سوڭ، قازاق قوعامى چەرچەسوۆتىڭ ەلدەن كەتۋىن اشىق تالاپ قىلىپ، قازاقتىڭ ميلليوندارىن قيماعان چەرچەسوۆ اقىرى تاۋبەسىنە كەلگەن. ارادا كوپ وتپەي: «قازاقشا ۇيرەنىپ جاتىرمىن»، - دەپ الەۋمەتتىك جەلىلەرگە سۋرەتىن جاريالاپ، جارناماسىن جاساعان. بۇل تۋرالى Abai.kz پورتالىندا ەگجەي-تەگجەيلى جازدىق تا، مىنە: «چەرچەسوۆ كەشىرىم سۇراسىن!».

سۋرەت Abai.kz سكرينى

سول چەرچەسوۆتى ارادا اجەپتاۋىر ۋاقىت وتكەندە جوعارىداعى ءالىپ دەگەن ايدىك بالا قورعاپ سويلەپ، قازاق قوعامىنىڭ اشۋىن تاعى تۋعىزىپ وتىر.

«چەرچەسوۆ ول جەردە وسەتين تىلىندە دە جاۋاپ بەرە الام دەگەن. مەن ونى ءتۇسىندىم. ويتكەنى قازاقستانداعى جۋرناليستەردىڭ ءبارى ورىس ءتىلىن بىلەدى. ال ول (جۋرناليست) قازاق تىلىندە سۇراق قويادى. ول حايپ ۇستاعىسى كەلدى»، – دەيدى نۇرالى ءالىپ.

ءالىپتىڭ مۇنىسىنا قاراپ: «ەر تۋعان جەرىنە، يت تويعان جەرىنە»، - دەگەن ءسوز ەرىكسىز ەسكە تۇسەدى.

سۋرەت اسلان قاجەنوۆتىڭ الەۋمەتتىك جەلىدەگى پاراقشاسىنان الىندى

قازاقشا سۇراق قويۋ حايپ پا؟!

بەلگىلى سپورت ءجۋرناليسى اسلان قاجەنوۆ بۇل تۋرالى بۇيدەيدى:

– قازاقستاندىق فۋتبولشى نۇرالى ءالىپتىڭ مالىمدەمەسى قازىر الەۋمەتتىك جەلىدە قىزۋ تالقىلانىپ، كوپشىلىكتىڭ اشۋىن تۋعىزدى. ول ۇلتتىق قۇرامانىڭ باس باپكەرى ستانيسلاۆ چەرچەسوۆقا قازاقشا سۇراق قويعان ءجۋرناليستى «حايپ جاساعىسى كەلدى» - دەيدى. بۇعان قوسا، «قازاقستانداعى تىلشىلەردىڭ ءبارى ورىسشا بىلەدى» - دەپ، تاعى قويىپ قالدى. بۇنىڭ بارلىعىن رەسەيدەگى پودكاست الاڭدا ايتىپ وتىر.

نۇرەكە، سىزگە نە بولدى؟ باسىڭىزعا قاتتى دوپ تيگەن بە؟ قازاقستانداعى ءباسپاسوز ءماسليحاتىندا قازاق تىلىندە سۇراق قويۋ راسىمەن حايپ پا؟ ەندى نە ىستەيمىز؟ ءوزىڭ دە «زەنيتكە» اۋىسقان العاشقى كۇندەرى ورىسشا سۇراققا قازاقشا عانا جاۋاپ بەرىپ ەدىڭ عوي. سول كەزدە ساعان «حايپ جاسادى» دەمەدىك. كەرىسىنشە، مەملەكەتتىك ءتىلدىڭ مارتەبەسىن ارتتىردى دەپ قۋاندىق. ال، ەندى ءوز ەلىمىزدە ءوز تىلىمىزدە سۇراق قويعانىمىزدى تومەن كورىپ وتىرسىڭ.

بۇنى قالاي تۇسىنسەك بولادى؟ الدە، تەك قاسىڭداعى انا ەكەۋىنە جاعۋ ءۇشىن سولاي سويلەدىڭ بە؟ «ءوز ۇلىڭدى بوتەن ۇيدەن تويدىرما» - دەيتىن ناقىل ءسوز بار ەدى. تويىنعانىڭ با؟ قازىر جەپ وتىرعان نانىڭدى، قازىرگى تاۋىپ وتىرعان تابىسىڭدى مەملەكەتتىك تىلدەن، ونىڭ ارعى جاعىندا، ۇلت مۇددەسىنەن جوعارى قويعانىڭ با؟ ەلدىڭ الدىندا جاۋابىڭدى كەڭىرەك ءتۇسىندىرۋىڭدى تالاپ ەتەمىن...

Abai.kz