قىرعىز دەپۋتاتى: «پۋتينگە كومەكتەسەيىك»، - دەدى. ءيا، سويدەدى. قىرعىز جوعارعى كەڭەسىنىڭ (پارلامەنت) اقساقال دەپۋتاتى (64-تە) ىسقاق ماساليموۆ بۇگىن سويدەپ سويلەدى.

قىرعىزستان پارلامەنتىندەگى وتىرىستا ارىپتەستەرىن ۋكراينامەن سوعىستا رەسەيدى قولداۋدىڭ ىقتيمال نۇسقالارىن قاراستىرۋعا شاقىردى.

«ەكى جىلدان بەرى ۇرىس ءجۇرىپ جاتىر... بۇرىن بۇل ءبىزدىڭ وداقتاسىمىز – رەسەيدىڭ ىشكى ءىسى ەدى، ءبىز بەيتاراپ پوزيتسيانى ۇستاندىق... بىراق قازىر رەسەي ايماقتارىنا بومبالار ءتۇسىپ جاتىر. وندا ميلليونعا جۋىق وتانداستارىمىز جۇمىس ىستەيدى، سولارعا الاڭدايمىن. سونىمەن قاتار، ءبىز رەسەيدىڭ ۇقشۇ-داعى وداقتاسىمىز. مەنىڭ ويىمشا، ءبىز ماسەلەنى تەرەڭ زەرتتەپ، قالاي قولداۋ كورسەتۋگە بولاتىنىن ويلاۋىمىز كەرەك»، - دەدى الگى جەردە.

بۇل ماساليموۆ بۇنىمەن شەكتەلمەي، رەسەي بانكتەرىمەن ارىپتەستىكتى ۋاقىتشى ءۇزۋ تۋرالى باستاما كوتەرگەن قىرعىز ۇلتتىق بانكىنە شۇيلىگىپتى. «بۇنى رەسەيگە قارسى جاسالعان شارا دەپ قابىلداۋعا بولادى»، - دەيدى دەپۋتات.

«قولداۋ كورسەتۋدىڭ ءارتۇرلى فورمالارى بار. ايتپەسە، بىزدەن سانكتسيالاردى ساقتاۋ تالاپ ەتىلەدى ەكەن. ياعني، ەۋرووداق پەن امەريكا سانكتسيا سالادى، سوسىن ءبىز ونى ورىنداۋعا مىندەتتىمىز. ءبىز بۇل وپەراتسياعا جاۋاپتى ەمەسپىز. ءبىزدىڭ جالعىز ستراتەگيالىق وداقتاسىمىز رەسەي. ەڭ ماڭىزدى دالەل – ول جەردە ءبىزدىڭ ءبىر ميلليون ازامات جۇمىس ىستەيدى»، - دەيدى ماساليموۆ.

كەزىندە قىرعىز كوممۋنيستىك پارتياسىنىڭ تىزگىنىن ۇستاپ، جوعارعى كەڭەسكە دەپۋتات بولىپ كەلگەن ماساليموۆتىڭ بۇل ايتقاندارى ونسىز دا رەسەيدەگى ءتۇرلى ساياساتكەرلەردىڭ اۋزىمەن كۇن سايىن ايتىلىپ، كوتەرىلىپ جۇرگەن ۇقشۇ كۇشتەرىن رەسەيگە كومەككە اتتاندىرۋ تۋرالى داۋلى ماسەلەنىڭ قىزىل شوعىن قايتا ۇرلەگەنمەن تەڭ بولدى.

الگىندە عانا بەلارۋس باسشىسى لۋكاشەنكو دا ۇقشۇ اسكەرىن رەسەيگە كومەككە اتتاندىرۋ تۋرالى ءسوز قوزعاعان ەدى. ەندى قىرعىزدان ماساليموۆ شىعىپ، بۇيدەپ وتىر...

ايتپاقشى، سول ۇقشۇ اسكەرى قازىر قىرعىز جەرىندە. بىرلەسكەن اسكەري وقۋ-جاتتىعۋ وتكىزىپ جاتىر.

ءتۇيىن: ءبىز ۇقشۇ كۇشتەرىن رەسەيگە جىبەرۋگە ءۇزىلدى-كەسىلدى قارسىمىز! قازاقستان ءسىم-ءى كۋرسكىدەگى جاعدايلارعا قاتىستى ءوز مالىمدەمەسىن جاساپ: «قازاقستان بۇۇ جارعىسىن باسشىلىققا الىپ ارەكەت ەتەدى. ءبىز كەز كەلگەن جانجالدىڭ ديپلوماتيالىق جولمەن شەشىلۋىن قولدايمىز»، - دەگەن بولاتىن.

ءيا، ءار مەملەكەت ءوز ازاماتتارىن قورعاۋعا مىندەتتى. مەيلى ول شەكارانىڭ سىرتىندا بولسا دا! سوندىقتان، رەسەيدەگى وتانداستارىن ماساليموۆ پەن جاپاروۆ، جولىن تاۋىپ، وزدەرى قۇتقارسىن! بىزدەن اسكەري ارالاسۋدى مۇلدە سۇراماسىن!  بۇل ءبىزدىڭ مەملەكەتىك مۇددەمىزگە قايشى! ءبىزدىڭ جالعىز ستراتەگيالىق ارىپتەسىمىز - رەسەي ەمەس!

Abai.kz