بەلارۋس پرەزيدەنتى الەكساندر لۋكاشەنكو كەشە توعىز ەلدىڭ ەلشىلەرىنەن سەنىم گراموتالارىن قابىلداپ، القا-قوتان جيىن وتكىزدى. سول جيىندا بەلارۋس باسشىسى قازاقستان پرەزيدەنتى قاسىم-جومارت توقاەۆقا ەرەكشە سالەم جولداپ، الدىنداعى ايتقان ايىپتاۋ سوزدەرىن تەرىستەگەندەي بولدى.

سونىمەن، لۋكاشەنكو نە دەيدى؟رەسەي

«قازاقستان ءبىز ءۇشىن ماڭىزدى، ۋاقىت سىنىنان وتكەن دوس، ستراتەگيالىق سەرىكتەس جانە وداقتاس. بۇگىندە ەكى ەلدىڭ ورتاق مۇددەسى جوق سالا ءىس جۇزىندە جوق. ىنتىماقتاستىقتىڭ جوعارى ديناميكاسىن جىل سايىنعى ميلليارد دوللارلىق تاۋار اينالىمى مەن ونەركاسىپتىك كووپەراتسياداعى تابىستى جوبالار دالەلدەيدى»، - دەدى لۋكاشەنكو.

بەلارۋس پرەزيدەنتى قازاقستان پرەزيدەنتى توقاەۆقا قازاقستاننىڭ شانحاي ىنتىماقتاستىق ۇيىمىنا توراعالىعى كەزىندە ەلگە كورسەتىلگەن جان-جاقتى قولداۋى ءۇشىن العىس ايتتى.

ەسكە سالايىق، تامىز ايىندا بەلارۋس پرەزيدەنتى الەكساندر لۋكاشەنكو «روسسيا 1» تەلەارناسىنا بەرگەن سۇحباتىندا:

«ءبىز كەيبىر پوستكەڭەستىك مەملەكەتتەرىمىز سياقتى ابىگەرگە ءتۇسىپ جاتقان جوقپىز: ولار رەسەيدەن بىردەڭە العىلارى كەلەدى، بىراق ونىڭ ورنىنا ەشتەڭە بەرمەيدى. بۇلاي جۇمىس ىستەمەيدى. بىرگە بولايىق! سول رەسەيگە كەلىپ، قولداۋ، كومەك سۇرايتىن ۋاقىت الىس ەمەس»، – دەگەن ەدى.

الەكساندر لۋكاشەنكو: «ءبىز كەيبىر پوستكەڭەستىك مەملەكەتتەر سياقتى تۇلكىبۇلاڭ ساياسات ۇستانا المايمىز. ولار رەسەيدەن بىردەڭە العىسى كەلەدى. بىراق ونىڭ ورنىنا ەشتەڭە بەرمەيدى. ولاي بولمايدى. بىرگە بولايىق!

رەسەيگە كەلىپ، قولداۋ مەن كومەك سۇراعان ۋاقىتتان كوپ ۇزاعان جوقپىز. مىسالى،  قازاقستاندا ءبىر وقيعا بولدى (2022  جىلعى قاڭتارداعى قايعىلى وقيعالاردى، سول كەزدە ەلگە ۇقشۇ كۇشتەرىنىڭ كىرگىزىلگەنىن مەڭزەپ وتىر - رەداكتسيا). قازاقستان كىمنەن كومەك سۇرادى؟ قىتايدان با، ءۇندىستاننان با؟ الدە پاكىستاننان با؟ جوق! «پۋتين، لۋكاشەنكو، كومەكتەسىڭىز»، - دەدى. سونان سوڭ، تۇسكە دەيىن-اق، ءبىزدىڭ ۇشاقتار قازاقستانعا قوندى. ءسويتىپ ءبارى تىنىشتالدى»، - دەگەن ەدى.

ال كەشە بەلارۋس باسشىسى سوزىنەن تايقىپ: «قاسىم-اكەگە ايتىڭىزشى، ول ءبىزدىڭ ەڭ ادال دوسىمىز بولعان جانە بولا بەرەدى. قاجەت ەمەس مەديانى وقىماڭىزدار، ازىراق تىڭداڭىزدار. سىزگە كوپ راحمەت. ءبىز كەزدەسىپ، ماسەلەلەرىمىزدى تالقىلايمىز دەپ ۇمىتتەنەمىن»، – دەدى تيمۋر جاقسىلىقوۆقا.

لۋكاشەنكونىڭ تامىزداعى سوزدەرىنەن سوڭ قازاقستاننىڭ سىرتقى ىستەر مينيسترلىگى بەلارۋس ەلشىسى پاۆەل ءۋتيۋپيندى شاقىرعان ەدى. مينيستر مۇرات نۇرتىلەۋ قازاقستاننىڭ بۇۇ جارعىسى مەن حالىقارالىق قۇقىقتىڭ نەگىزگى نورمالارىنا سايكەس تەڭگەرىمدى جانە بەيبىتشىل سىرتقى ساياسات جۇرگىزىپ جاتقانىن اتاپ ءوتتى.

«ءبىزدىڭ ەلىمىز مەملەكەتتەر اراسىنداعى بارلىق كەلىسپەۋشىلىكتەر ساياسي جانە ديپلوماتيالىق جولدارمەن شەشىلۋى ءتيىس ەكەنىنە نىق سەنىمدى. قازىرگى گەوساياسي جاعدايدا مەملەكەت باسشىسى ازىرلەگەن ەلىمىزدىڭ سىرتقى ساياسي باعىتى ءوزىنىڭ تيىمدىلىگىن كورسەتتى. وسىعان بايلانىستى مينيستر بەلارۋس تاراپىن استانانىڭ بولىپ جاتقان ۇدەرىستەرگە قاتىستى ۇستانىمىن وبەكتيۆتى باعالاۋعا شاقىردى»، - دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.

Abai.kz