فورۋمنىڭ اشىلۋىندا ءسوز سويلەگەن سەنات توراعاسى، الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ماۋلەن اشىمباەۆ مەملەكەت باسشىسى قاسىم-جومارت توقاەۆتىڭ فورۋم دەلەگاتتارىنا جولداعان قۇتتىقتاۋ حاتىن وقىپ بەردى.

«بارشاڭىزدى ءبىرىنشى جاس ءدىني ليدەرلەر فورۋمىنىڭ اشىلۋىمەن قۇتتىقتايمىن. مەن وسىدان ەكى جىل بۇرىن الەمدىك جانە ءداستۇرلى دىندەر كوشباسشىلارىنىڭ VII سەزىندە ونىڭ جۇمىسىن جانداندىراتىن جاڭا تاسىلدەر ويلاستىرۋدى ۇسىنعان ەدىم. فورۋم دەلەگاتتارى بۇل ۇسىنىستى ءبىراۋىزدان قولدادى. قازىر وسى باعىتتا بىرقاتار يگى باستاما تابىستى جۇزەگە اسىرىلىپ جاتىر. سونىڭ ءبىرى - جاس ءدىني ليدەرلەر فورۋمى. الەمدىك جانە ءداستۇرلى دىندەر كوشباسشىلارىنىڭ سەزى وركەنيەتتەر ۇندەستىگىن ورنىقتىرىپ، بەيبىتشىلىك پەن كەلىسىمدى دارىپتەيتىن بىرەگەي ديالوگ الاڭى سانالادى»، - دەلىنگەن قۇتتىقتاۋ حاتتا.

پرەزيدەنت دىندەر اراسىنداعى ديالوگقا جاس بۋىن وكىلدەرىن جۇمىلدىرۋ ۋاقىت تالابى ەكەنىن ايتادى.

«سەبەبى وسكەلەڭ ۇرپاق قاشان دا جاسامپازدىق پەن جاڭاشىلدىقتىڭ جارشىسى. ءتۇرلى ەلدە تۇراتىن جاستاردىڭ ءدىن سالاسىنداعى ىنتىماقتاستىعى ادامزاتتىڭ رۋحاني بولاشاعىن ايقىنداۋعا تىكەلەي اسەر ەتەدى. قازىر الەمدە گەوساياسي قايشىلىقتاردىڭ سالدارىنان ءتۇرلى سىن-قاتەرلەر پايدا بولدى. وسى الماعايىپ كەزەڭدە حالىقارالىق قاۋىپسىزدىكتىڭ جاڭا جۇيەسىن قالىپتاستىرۋ وتە ماڭىزدى. بۇل رەتتە ءدىن كوشباسشىلارى ايرىقشا ءرول اتقارادى. ال وعان جاستاردىڭ بەلسەنە قاتىسۋى جۇمىسقا تىڭ سەرپىن بەرەرى ءسوزسىز. قازاقتىڭ ۇلى ويشىلى اباي «تولىق ادام» تۋرالى ايتىپ كەتكەن بولاتىن. بۇل تۇجىرىم اعىلشىن تىلىندەگى «a person of integrity»، ياعني، پاراسات-پايىمى مەن ءبىلىمى تولىسقان، بويىنا رۋحاني قۇندىلىقتاردى سىڭىرگەن ادال ازامات دەگەن ۇعىممەن ۇندەس. سوندىقتان جاستاردى تولىق ادام بولۋعا ۇمتىلىپ، الەمنىڭ دامۋىنا ۇلەس قوسۋعا شاقىرامىن. فورۋم جۇمىسىنا ساتتىلىك تىلەيمىن. ىزگىلىك جولىنداعى ىستەرىڭىز تابىستى بولسىن»، - دەپ جازىلعان پرەزيدەنتتىڭ قۇتتىقتاۋىندا.