سىزدەر ءۇشىن دە كوزكورگەن كورشى قىتاي، ىلە قازاق وبىلىسىنىڭ ءار وڭىرىنەن وتكەن اپتادا ون ەكى ونەرپاز قازاق بالالارى اسپان استى مىڭداعان جىلداردىڭ  ۇلتتىق وركەنيەتىن قالىپتاستىرعان ەجەلگى مىسىر شاھارداي الاتاۋلى الماتى قالاسىنا قىسقا مەرزىمدى بەس كۇندىك مادەني جانە تۋريستتىك ساپارمەن قوناققا كەلدى. كۇتىپ الدىق.

30 قىركۇيەك وركەنيەت پەن ونەردىڭ ورداسى الماتىنىڭ تابالدىرىعىن اتتاعان تاستۇلەكتەر، ەرتەسى ەرەكشە ءبىلىم ورداسى - جۇسىپبەك ەلەبەك اتىنداعى رەسپۋبليكالىق ەسترادا جانە تسيرك كوللەدجىندە بولدى. جاسى ءدۇپ التىداعى سانجار جانە ونىڭ ونەردەگى ساپتاستارىن اتالعان كوللەدجدىڭ  ديرەكتورى قر ەڭبەك سىڭىرگەن قايراتكەرى، بەلگىلى ءانشى، كومپوزيتور جەڭىس سەيدۋللاۇلى التىن باسىن كىشىرەيتىپ الدارىنان بالاشا قۇراقۇشىپ قارسى الىپ، ءارى، قاتارداعى قاراپايىم جانداي تاريحى تەرەڭدە جاتقان كوللەدجدىڭ كەشەگىسى مەن جارقىن بۇگىنىن بىلگىر گيد بالاداي ءوزى تانىستىردى. تۇستەن كەيىنگى كەزدەسۋ كونتسەرتىندە اتالى ءسوز سويلەپ، مەرەكەنىڭ شىمىلدىعىن اشىپ بەردى. «بالقيانى» ورىنداعان ايبار ساتايۇلى ساحانانىڭ دا، ساپتاستارىنىڭ دا ابرويىن تىك كوتەردى. زالدا ينە شانشىر ورىن جوق، دۇركىن-دۇركىن سوعىلعان شابىت سيلار قول شاپالاق، اسەم ءان، فورتەپيانودان ورىلگەن جان تەبىرەنتەر مۋزىكا، كۇمبىر كۇيدەن تىس، نۇرداۋلەتۇلى ۇلىق ەسىمدى ءبىر ورەن دوستىق تۋرالى توگىلتىپ ولەڭ وقىدى. قيقۋلاعان قوشەمەت، ارينە ەستىمەگەن ەلدە كوپ دەمەكشى كوللەدج وقۋشىلارىنىڭ ۇستەم ونەرىنە الىستان كەلگەن بالالار دا، باستاپ كەلگەن باپكەرلەر دە ءدان ريزا.

ەكىنشى كۇن تاۋداي تالابى بار ءانشى-ءبيشى ونەرلى بالالار الماتىنى ارمانسىز ەركىن ارالادى. قىزىعى مەن قىزىعارى كوپ ويىنمەن وي قۋعان ەستى بالالار ىقىلىس اتىنداعى حالىق مۋزىكالىق اسپاپتار مۇراجايىن، قر ورتالىق مەملەكەتتىك مۇراجايىن، قاستەەۆ اتىنداعى مەملەكەتتىك ونەر مۇراجايىن ارالاپ كوردى. شابىت الىپ، شاتتانىپ قانشا ءجۇرىپ شارشاعاندارىن دا سەزبەي قالدى. ارباتقا كەلگەندە قىزىق قۋعان بال داۋرەن بالالىق شاق ءبارىن دە بىردەن ۇمىتتىرىپ جىبەردى. جان-جاقتارىنا كەزەك-كەزەك كوز سالادى. وزدەرىندەي بالالارمەن دە، باسقالارمەن دە تانىسىپ جاتتى، بىرگە ءجۇردى، سەلفي جاسادى. جەتكىنشەكتەر تىم جايدارلى، ءان ايتىپ، كۇي شەرتىستى. ادەتتە بايقامايسىڭ، كورەگەن كوز بولسا كورەتىن دۇنيە بىزدە دە كوپ ەكەن. بۇلدىرشىندەر قالانى دا، دالانى دا، قىزىل-جاسىل كوپ دۇنيەنى قارادى، كوردى، ءبىلدى. جاپىراق جۇرەك جاس قايىڭ قىرشىندار ءار نارسەگە قانشالىق ءمان بەردى  بىلمەيمىن، بىراق ءماز-ءمايرام.

ءۇشىنشى كۇن،  كۇن شايداي اشىق. كۇنباعىستاي كۇن نۇرىنان ءنار الىپ ءوسىپ كەلە جاتقان بالعىن جاستار كوكتەن - كوكتوبەدەن التىن كۇننىڭ استىندا التىن كۇز – ارۋ الماتىعا كوز سالدى، ءبارىنىڭ كوزالدى شىنىمەندە عاجاپ كورىنىستەر كوشكىنى. شىمبۇلاقتىڭ شىڭدارىندا جاس شىنارلار 2000م. بيىك - وقجەتپەستەن ويداعى  قازاقستان قوناقۇيىن ىزدەيدى. انە، مىنە دەگەنشە بىرەۋى تاپتى، ماقتاندى، مارقايدى. شىركىن، بالالىق شاق دەسەڭشى. 16:00-دە بار ءبىلىم مەن ونەردىڭ ۇيىتقىسى، وتاۋى وقۋشىلار سارايىنىڭ ۇجىمى  ولاردى اسا قۇرمەتتى ءبىر قوناقتارىنداي الدارىنان جۇگىرە شىعىپ اۋلا ورتاسىندا كۇتىپ الدى. بالالاردى تاڭ قالدىرعان ەكسكۋرسيادان سوڭ تاعى ءبىر رەتتىك كەزدەسۋ كونتسەرتتىمىز باستالىپ تا كەتتى.

جالپى ەكى مارتە جينالعان كونتسەرتتە قوناقتار قازاقستاندىق بالالاردان شابىت الىپ، شىڭدالعانى شىندىق. اتتاناردا جەتەكشىلەرى داۋلەت پەن جاينا ريزاشىلىقتارىن ءبىلدىرىپ، وقۋشىلار سارايىن قوناققا شاقىرىپ جاتتى. البەتتە بۇل ءىس-شارا مەن ساپاردىڭ دا  تۇپكى ماقساتى دا وسى ەدى - ءوزارا ۇيرەنۋ، بارىس-كەلىس جاساسۋ، اسىرەسە ەكى ەل مادەني بايلانىستارىن بالالار اراسىندا ءوزارا دامىتۋعا جول اشۋ.

وسى ورايدا بىزدە مادەنيەت قوعامدىق بىرلەستىكتىڭ اتىنان رەسپۋبليكالىق ەسترادا جانە تسيرك كوللەدجىنىڭ باسشىسى سەيدوللاۇلى جەڭىس مىرزاعا، الماتى قالاسى ءبىلىم باسقاراماسىنا، باسقارمانىڭ وقۋشىلار سارايىنىڭ ديرەكتورى ايگۇل بولاتبەكقىزىنا ايتار العىسىمىز شەكسىز!

ءتورتىنشى كۇننىڭ تىرلىگى ءبىر-بىرىمىزگە تىلەك ايتۋدان، قوشتاسۋدان باستالدى. قالانى ۇناتىپ، بىزگە باۋىر باسىپ قالعان بالالار كۇن ارقان بويى كوتەرىلگەندە اندەتىپ اتتانىپ كەتە باردى.

ءيا، ءبارى دە جاقسى ءوتتى، كەتتى. دەسەدە بالا بولسا دا جاس جۇرەككە نە ۇيالاعانى ءبىزدى قىزىقتىرعان ءبىر جۇمباق بولىپ قالا بەردى.

كەزدەسكەنشە!...

دۋمان امانۇلى

Abai.kz