بۇگىن ءماجىلىس ەۋرازيالىق ەكونوميكالىق وداق شەڭبەرىندە اۋىل شارۋاشىلىعى ونىمىنە ارنالعان قويمالىق كۋالىكتەردى شىعارۋ (بەرۋ), ولاردىڭ اينالىسى مەن وتەلۋ قاعيدالارى تۋرالى كەلىسىمدى راتيفيكاتسيالادى.

بۇل تۋرالى ءماجىلىس دەپۋتاتى سەرىك ەگىزباەۆ حابارلادى.

​«قۇجات ەۋرازيالىق ەكونوميكالىق وداق ايماعىندا قويمالىق كۋالىكتەردى پايدالانۋ ارقىلى اۋىل شارۋاشىلىعى سالاسىنداعى ىنتىماقتاستىقتى نىعايتۋعا جانە اۋىل شارۋاشىلىعى ونىمدەرىنىڭ ءوزارا ساۋداسىن دامىتۋعا باعىتتالعان.

​زاڭ جوباسىن قابىلداۋ قويمالىق كۋالىك ۇستاۋشىلاردىڭ قوسىمشا قاراجات تارتۋىنا مۇمكىندىك بەرەدى. بۇل ءوز كەزەگىندە فەرمەرلەردىڭ جۇمىسىن وڭتايلاندىرادى. سونداي-اق ەلەكتروندى ساۋدانى دامىتىپ، قازاقستاندىق استىق قولحاتىن ىلگەرىلەتۋ مەن پايدالانۋعا ىقپال ەتەدى»، - دەيدى دەپۋتات.

ايتا كەتەيىك، قازاقستان تارابى 2023 جىلى 31 شىلدەدە 5 مەملەكەت قول قويعان كەلىسىمدى راتيفيكاتسيالاپ وتىر.

«بۇل ەلىمىز ءۇشىن اۋىل شارۋاشىلىعىنداعى تسيفرلاندىرۋ دەڭگەيىن ودان ءارى ارتتىرۋعا، ەلدىڭ ەكونوميكالىق دامۋىن جاڭا ساتىعا كوتەرۋگە مۇمكىندىك بەرەدى.

​قويمالىق كۋالىكتەر شىعارىلاتىن (بەرىلەتىن) اۋىل شارۋاشىلىعى ونىمدەرىنىڭ تۇرلەرى ەاەو ەلدەرىنىڭ زاڭناماسىمەن ايقىندالادى. ەاەو ەلدەرىندە شىعارىلعان (بەرىلگەن) قويمالىق كۋالىكتەر تىزىلىمدەرىنە ەنگىزىلگەن جانە شارت تالاپتارىنا سايكەس كەلەتىن قويمالىق كۋالىكتەردى وسى مەملەكەتتەر ءوزارا مويىندايدى»، - دەيدى سەرىك ەگىزباەۆ.

Abai.kz