ءماجىلىس سپيكەرى ەرلان قوشانوۆ  مەملەكەت باسشىسىنىڭ تاپسىرماسىمەن تۇركيا رەسپۋبليكاسىنىڭ ۇلتتىق كۇنىنە ارنالعان سالتاناتتى جيىنعا قاتىسىپ، باۋىرلاس تۇرىك حالقىن انادولى ەلىنىڭ قۇرىلعانىنا 101 جىل تولۋىمەن قۇتتىقتادى.

پالاتا توراعاسى ءوز سوزىندە قازاق حالقى تاۋەلسىزدىگىن ەڭ العاش تانىعان مەملەكەت رەتىندە تۇركيانى ەرەكشە قادىرلەيتىنىن اتاپ ءوتتى.

– بىلتىر عانا تامىرلاس ەلدىڭ عاسىر تويىن وزدەرىڭىزبەن بىرگە اتاپ وتكەن ەدىك. بيىل دا بۇل يگى ءداستۇر جالعاسىن تاۋىپ جاتىر، – دەدى ەرلان قوشانوۆ.

بيىل ەكى ەل اراسىندا دوستىق جانە ىنتىماقتاستىق تۋرالى كەلىسىمگە قول قويىلعانىنا 30 جىل تولىپ وتىر.

– ءبىزدىڭ دوستىعىمىزدىڭ تامىرى بۇدان دا تەرەڭدە جاتىر. سان عاسىرلىق ورتاق تاريحىمىز، مادەني-رۋحاني ساباقتاستىعىمىز سوعان كۋا. سول ەكىجاقتى قارىم-قاتىناس، بابالارىمىز سالىپ كەتكەن سارا جول جىل وتكەن سايىن جاندانىپ، ىنتىماعىمىز ورلەپ-وركەندەپ كەلەدى. قازىرگى تاڭدا قازاقستان مەن تۇركيا اراسىنداعى ىنتىماقتاستىق كەڭەيتىلگەن ستراتەگيالىق ارىپتەستىك دەڭگەيىنە جەتتى. وعان ءبىزدىڭ ەلدەرىمىزدىڭ كوشباسشىلارى قاسىم-جومارت توقاەۆ پەن رەجەپ تايپ ەردوعاننىڭ اراسىنداعى مىزعىماس دوستىق بەرىك نەگىز بولۋدا. جانە قازاق-تۇرىك قارىم-قاتىناسىن جاڭا دەڭگەيگە كوتەرۋگە زور سەپتىگىن تيگىزۋدە، – دەدى پالاتا توراعاسى.

ءماجىلىس سپيكەرى ستراتەگيالىق سەرىكتەستىكتىڭ ەرەكشە قارقىن الۋىندا قازاق-تۇرىك پارلامەنتارالىق ىنتىماقتاستىعىعىڭ ەڭبەگى مول ەكەنىنە نازار اۋداردى.  وعان بيىل مامىر ايىندا تۇركيا ۇلى ۇلتتىق ءماجىلىسىنىڭ توراعاسى نۋمان كۋرتۋلمۋشتىڭ قازاقستانعا رەسمي ساپارى سەرپىن بەردى.

ەرلان قوشانوۆ ەكى ەلدىڭ زاڭ شىعارۋشى ورگاندارى مەملەكەت باسشىلارىنىڭ ۋاعدالاستىقتارىن قارقىندى ىسكە اسىرۋعا بەلسەنە اتسالىساتىنىن ايتتى.

سونىمەن قاتار، 2024 جىلى تۇركى مەملەكەتتەرى ۇيىمىنا 15 جىل تولادى. ءماجىلىس توراعاسى وسى ايتۋلى داتامەن دە قۇتتىقتاپ، باۋىرلاس حالىقتارعا باق-بەرەكە تىلەدى.

ءماجىلىستىڭ ءباسپاسوز قىزمەتى

Abai.kz