بۇگىن قر ءماجىلىسىنىڭ دەپۋتاتى، اقىن قازىبەك يسا «Facebook» الەۋمەتتىك جەلىسىندەگى جەكە پاراقشاسىندا «مادەنيەتكە مادەنيەتتى بىلەتىن باسشى كەرەك» دەگەن اتپەن ءبىر توپ قوعام قايراتكەرلەرىنىڭ اشىق حاتىن جاريالادى.

قازىبەك جارىلقاسىنۇلى: «كەشە 12 قاراشادا ەكى ەڭبەك ەرى - ءاسانالى ءاشىموۆ پەن دۋلات يسابەكوۆ باستاعان، حالىق ارتىستەرى مەن حالىق جازۋشىلارى قوستاعان ايگىلى مادەنيەت قايراتكەرلەرى كينو سالاسىنداعى قالىپتاسقان اۋىر احۋالعا نارازىلىق ءبىلدىرىپ، قر پرەزيدەنتى ق.توقاەۆتان جاعدايدى باقىلاۋعا الۋدى سۇراپ، اشىق حات جازدى. «مادەنيەتكە مادەنيەتتى بىلەتىن باسشى كەرەك!» - دەپ  مالىمدەدى ونەر تارلاندارى»، - دەپ جازىپ، اشىق حاتتىڭ تولىق ءماتىنىن جاريالادى.

اشىق حاتتى وسى گيپەرسىلتەمەدەن وقۋعا بولادى: قازىبەك يسا پاراقشاسى.

اشىق حات قر پرەزيدەنتى قاسىم-جومارت توقاەۆقا، ۇكىمەت باسشىسى ولجاس بەكتەنوۆكە جانە قازاقستان پارلامەنتىنىڭ قوس پالاتاسىنداعى دەپۋتاتتارعا باعىتتالالعان ەكەن.

اشىق حاتتا نە جازىلدى؟

ال وعان قول قويۋشىلار دەپ: ءاسانالى ءاشىموۆ، دۋلات يسابەكوۆ، نۇرجۇمان ىقتىمباەۆ، سماعۇل ەلۋباي، دوسحان جولجاقسىنوۆ، تالعات تەمەنوۆ، قانات تورەبايلار كورسەتىلگەن.

«مادەنيەت سالاسىنا مادەنيەتتى بىلەتىن باسشى كەرەك ەكەنى كۇن سايىن سەزىلۋدە. سول سەبەپتى ءبىز، كينوگەرلەر وتاندىق كينو سالاسىنداعى قوردالانعان پروبلەمالاردى شەشۋ جولدارىن تالاپ ەتىپ، بيلىككە قايرىلۋعا ءماجبۇرمىز»، - دەگەن حات يەلەرى قازاقستان پرەزيدەنتى قاسىم-جومارت توقاەۆتى ش. ايمانوۆ اتىنداعى «قازاقفيلم» كينوستۋدياسىنا شاقىرىپ، كينوگەرلەرمەن تىكەلەي كەزدەسۋ وتكىزۋدى سۇرايدى.

ءبىز اشىق حاتقا قول قويعان قازاقستاننىڭ ەڭبەك ەرى ءاسانالى اشىموۆكە حابارلاسىپ، ءمان-جايدى سۇرادىق.

سۋرەت: qazaqstan.tv سايتىنان الىندى.

ءاشىموۆ: ەشقانداي حاتقا قول قويمادىم!

«مەن ەشقانداي اشىق حاتقا قول قويعان جوقپىن. تەك ءمينيستردىڭ قابىلداۋىنا جازىلۋدى ءوتىنىپ، حات جولداعان بولاتىنبىز. ال قازىرگى مادەنيەت مينيسترلىگىنە كوڭىلىم تولادى. مينيسترلىكتىڭ جۇمىسىنا قارسىلىق بىلىدىرەتىندەي ەش حاتقا قول قويمادىم»، - دەپ قىسقا قايىردى ءاسانالى ءاشىموۆ.

ءماجىلىس دەپۋتاتى قازىبەك يسا بۇگىن «Facebook» جەلىسىندە ۇكىمەت باسشىسى ولجاس بەكتەنوۆتىڭ اتىنا تاعى دا دەپۋتاتتىق ساۋال جولداپ، بىلاي دەدى: «ەلىمىزدەگى مادەنيەت سالاسىنداعى ۇزدىكسىز جالعاسىپ جاتقان كەلەڭسىزدىكتەرگە، ۇلتتىق كينوداعى اۋىر احۋالعا ەڭ الدىمەن مادەنيەتتەن حابارسىز مادەنيەت باسشىلارى جاۋاپتى ەكەنىن مالىمدەپ، ۇكىمەت باسشىسىنان شۇعىل شارا قولدانۋدى تالاپ ەتتى».

ءبىر نازار اۋدارارلىعى – اتالعان دەپۋتاتتىق ساۋالدى قولداپ قول قويدى دەگەن ءماجىلىس دەپۋتاتتارىنىڭ كەيبىرى كەيىن تىزىمنەن الىنىپ تاستالدى. اۋەلگى تىزىمدە ەسىمدەرى كورسەتىلگەن دانيا ەسپاەۆا مەن ماكسيم روجين كەيىن قول قويۋشىلار تىزىمىندە كورسەتىلمەگەن.

سۋرەت: el.kz سايتىنان الىندى.

ماكسيم روجين: ءمينيستردىڭ جۇمىسىنا وڭ قارايمىن!

ءبىز ءماجىلىس دەپۋتاتى ماكسيم روجين مىرزاعا دا حابارلاسىپ، ءمان-جايدى سۇرادىق. روجين مىرزا قىزمەتىنە بايلانىستى جينالىستا ەكەنىن ايتىپ، رەداكتسيامىزعا ءوز پىكىرىن ورىس تىلىندە، جازباشا جولدادى. ءبىز اتالعان پىكىردى قازاق تىلىندە ۇسىنامىز:

«دەپۋتاتتىق ساۋال كەزىندە مەن سۇحبات (ينتەرۆيۋ) بەرۋ ءۇشىن سىرتقا شىعىپ كەتتىم. دەپۋتاتتىق ساۋالدى تىڭداعان جوقپىن. ول تۋرالى كەيىن، جاريالانعان سوڭ عانا ءبىلدىم.

جالپى ءمينيستردىڭ جۇمىسىنا وڭ قارايمىن. تۇسىندىرە كەتەيىن:

مينيستر ايدا بالاەۆا بۇل سالاعا باسشى بولىپ العاشقى كەلگەن كەزىندە-اق، ەكىنشى تاعايىندالعان كەزىندە دە بالالارعا ارنالعان كونتەنتتى جالپى مەملەكەتتىك تىلگە كوشىرۋ بويىنشا جۇيەلى جۇمىس باستالدى. مينيسترلىك بالالارعا ارنالعان بەينە جانە باسپا كونتەنتىمەن، باق-تارمەن جۇيەلى تۇردە اينالىسا باستادى.

حالىقارالىق Nickelodeon HD, TiJi بالالار ارنالارى ءبىزدىڭ بالالارىمىز ءۇشىن قازاق تىلىندە سويلەي باستادى، بۇل جۇمىس بىرنەشە جىلدان بەرى ايدا بالاەۆانىڭ ۇسىنىسى مەن جەكە باستاماسىمەن جۇزەگە اسىرىلىپ كەلەدى. مەن ءۇشىن بۇل مينيسترلىك جەتەكشىلىك ەتەتىن ماڭىزدى سالالاردىڭ ءبىرى»، - دەدى ماكسيم روجين.

تاقىرىپقا تۇزدىق: بۇگىن ايدا عالىمقىزى ءماجىلىستىڭ جالپى وتىرىسىنان كەيىن باق وكىلدەرىنە پىكىر ءبىلدىرىپ، «قازاقفيلمدەگى» داۋ-دامايعا بايلانىستى كينوستۋديا جابىلا ما؟» دەگەن سۇراققا جاۋاپ بەردى.

سۋرەت: time.kz سايتىنان الىندى.

مينيستر بالاەۆا: «قازاقفيلم» جابىلمايدى!

مينيستر بالاەۆا: «ارينە، جابىلمايدى، مۇنى مينيستر رەتىندە رەسمي تۇردە جاريالايمىن. بۇل – ءبىزدىڭ تاريحىمىز. كينو مەن كينەماتوگرافيانىڭ دامۋى «قازاقفيلم» تاريحىمەن تىكەلەي بايلانىستى. سوندىقتان بۇل كاسىپورىندى ساقتاپ، ونى دامىتۋ – ۇرپاق الدىنداعى پارىزىمىز»، - دەپ جاۋاپ بەردى ايدا بالاەۆا.

ونىڭ ايتۋىنشا، بۇگىندە مادەنيەت جانە اقپارات مينيسترلىگىنىڭ كينوستۋديانى تىكەلەي قارجىلاندىرۋعا قۇزىرەتى جوق.

«سوندىقتان قازىر ءبىز ناقتى شارالاردى قاراستىرىپ جاتىرمىز. بىرىنشىدەن، بۇل ماسەلەنى زاڭنامالىق دەڭگەيدە رەتتەۋ، ياعني «قازاقفيلم» كينوستۋدياسىن مەملەكەتتىك تاپسىرىس ارقىلى جانە جەكەلەگەن تەتىكتەر ارقىلى تىكەلەي قارجىلاندىرۋ كەرەك. وسى ورايدا مەنەدجەرلىك ءتاسىلدى قايتا قاراۋدامىز. بۇگىندە «قازاقفيلمنىڭ» ءوزى دە، ينفراقۇرىلىمى دا وتە قيىن جاعدايدا ەكەنىن ايتقىم كەلەدى. جالپى، قارجىلاندىرۋ جوق جەردە دامۋ تۋرالى ايتۋدىڭ قاجەتى جوق»، - دەدى ايدا بالاەۆا.

P.S

ءبىزدىڭ ماقالا جاريالانعاننان كەيىن ەكىنشى تاراپ رەداكتسيامىزعا حابارلاسىپ، اتالعان اشىق حاتتىڭ تەك ءماجىلىس دەپۋتاتى قازىبەك يسانىڭ پاراقشاسىندا عانا ەمەس، Jasalash.kz پورتالى مەن الەۋمەتتىك جەلىلەردە جاريالانعانىن ايتتى.

ودان بولەك، ءاسانالى ءاشىمىوۆ باستاعان حالىق ارتىستەرىنىڭ اتالعان اشىق حاتقا قول قويعانىن كورسەتەتىن قۇجاتتى رەداكتسيامىزعا ۇسىندى.

Abai.kz