ءوزىنىڭ پرەزيدەنتتىك مەرزىمى اياقتالۋعا از قالعاندا اقش پرەزيدەنتى جو بايدەن ۋكراينا ءۇشىن اسا ماڭىزدى شەشىمدەردىڭ ءبىرىن قابىلدادى. اق ءۇي ءوزى بەرگەن قارۋمەن ۋكرايناعا رەسەيدىڭ ىشكى اۋماقتارىنداعى اسكەري نىساندارعا سوققى جاساۋعا رۇقسات بەردى. بۇل تۋرالى Mezgil.kz اقپاراتتىق پورتالى جازدى. 

بايدەن اكىمشىلىگىنىڭ بۇل شەشىمىن جاھان اقپاراتى جارىسا جازىپ جاتىر. ۋكراينانىڭ اسكەري ءھام ساياسي باسشىلىعى اقش بيلىگىنە بىرنەشە جولى قايرىلۋ جاساپ، رەسەيدىڭ ىشكى اۋماقتارىنا سوققى جاساۋ ءۇشىن جاقتاستار بەرگەن قارۋدى قولدانۋعا رۇقسات سۇراپ جۇرگەلى تالاي ۋاقىت ءوتتى.

«New York Time» پەن «Washington Post» قاتار تاراتقان اقپاراتتا: «اقش پرەزيدەنتى جو بايدەن مەن ونىڭ اكىمشىلىگى ATACMS تاكتيكالىق-باليستيكالىق زىمىراندارىن پايدالانىپ، رەسەي اۋماعىنا سوققى جاساۋعا رۇقسات بەرگەنى» جازىلعان.  بۇل اقپاراتتى «ۆۆس» مەن «CNN» دە راستادى.

اقش-تىڭ بۇلاي شەشىم قابىلداۋىنا سەبەپ – رەسەيگە كومەككە سولتۇستىك كورەي اسكەرىنىڭ جىبەرىلۋى بولعان. انىعى: رەسەيگە كومەككە بارعان كيم اسكەرىنىڭ (كحدر اسكەرى) كۋرسكى مايدانىنا جىبەرىلۋىنە اقش وسىلاي جاۋاپ بەرگەن.

«Washington Post»: «اقش-تىڭ رەسەي اۋماعىن سوققىلاۋ ءۇشىن اقش قارۋىن قولدانۋعا رۇقسات بەرۋى – سولتۇستىك كورەي اسكەرىنىڭ كۋرسكىگى جىبەرىلۋىنە جاۋاپ. بۇل قادام پحەنياندى رەسەيگە تاعى دا اسكەر جىبەرۋدەن تەجەۋ ءۇشىن جاسالدى. سولتۇستىك كورەي ليدەرى كيم چەن ىن رەسەيگە اسكەر جىبەرۋ قاتە شەشىم ەكەنىن، ونىڭ قۇنى قىمباتقا تۇسەتىنىن ءتۇسىنۋى كەرەك»، - دەپ جازدى.

اقش تاراپىنان كوپ كۇتتىرگەن رۇقسات رەسمي جاريالانعان سوڭ، ىلە-شالا ۇلىبريتانيا مەن فرانتسيا دا وزدەرى بەرگەن ءھام بەرەتىن الىس قاشىقتىققا سوققى جاساۋعا ارنالعان قارۋلارمەن رەسەي اۋماعىن اتقىلاۋعا رۇقسات بەردى دەگەن اقپارات تارادى. بۇل اقپاراتتى فرانتسيانىڭ «Le Figaro» باسىلىمى جازدى.

بۇل ءۇشىن فرانتسيا مەن ۇلىبريتانيا ۋكرايناعا «Storm Shadow/SCALP-EG» باليستيكالىق زىمىراندارىن بەرۋدى جوسپارلاعان.

پرەزيدەنت زەلەنسكي نە دەيدى؟

ۋكراينا پرەزيدەنتى زەلەنسكي كەشە كەشكىسىن اتالعان جاڭالىققا قاتىستى بىلاي دەپ پىكىر ءبىلدىردى: «بۇگىن الەمنىڭ ءبىرسىپىرا اقپاراتى ۋكرايناعا رەسەي اۋماعىن سوققىلاۋعا رۇقسات بەرىلگەنىن جازىپ جاتىر. بىراق، سوققى سوزبەن جاسالمايدى! سوققى جاريا جاسالمايدى! زىمىراندار ءوز قۋاتىن ىستە كورسەتەدى! مىندەتتى تۇردە!»، - دەپ قىسقا قايىردى.

پرەزيدەنت پۋتين نە دەيدى؟

ماسكەۋدىڭ رەسمي تۇلعالارى ازىرگە اتالعان شەشىمگە قاتىستى جارىتىپ پىكىر بىلدىرمەسە دە، رەسەي پرەزيدەنتى پۋتين وسىعان دەيىن: «رەسەيدىڭ ىشكى اۋماقتارىنا سوققى جاساۋعا رۇقسات بەرۋ – ناتو-نىڭ سوعىسقا تىكەلەي ارالاسۋىن بىلدىرەدى. مۇنداي زىمىراندار سپۋتنيكپەن باسقارىلادى. ال ۋكراينانىڭ ءوزىنىڭ سپۋتنيكتەرى جوق. دەمەك، ناتو سپۋتنيكتەرى قولدانىلادى»، - دەپ سويلەگەن.

ءتۇيىن: بايدەن اكىمشىلىگىنىڭ بۇل شەشىمى قازىر جاھاندىق اقپاراتتىڭ قىزۋ تالقىسىندا. دەسە دە، ساراپشىلار رەسەي مەن ۋكارينا اراسىنداعى پوتەنتسيالدى كەلىسسوزدەرگە دەيىن ۋكراينا رەسەي اۋماعىنا ءبىرسىپىرا سوققى جاساپ، ءوز پوزيتسياسىن نىعايتۋعا تىرىسادى دەپ بولجايدى. سوققىلاردىڭ دەنى كۋرسكى وبلىسىنىڭ اۋماعىنا جاسالۋى مۇمكىن ەكەنى ايتىلادى. ال اقش-تىڭ سايلانعان پرەزيدەنتى ترامپتىڭ كومانداسى بايدەن اكىمشىلىگىنىڭ بۇل شەشىمىنە كەلىسپەيتىنىن مالىمدەپ جاتىر.

Abai.kz